Hɔrɔya 15

Musa nun bani Isirayila kaanu la beeti bɔɛ

1Wo kɔma, Musa nun bani Isirayila kaanu ka beete bɔɔ Alatala ye, anu ko:

«N be beete bɔɔla le Alatala ye,

bayi a bata a la mansaya sɛnbɛ yita.

Soeenu yo, a laborilanu yo,

a bata anu ladula ba tɔ.

2N sɛnbɛ mu Alatala le la,

n mɛn be ale len na ko beete bɔɔla.

A bata ma n na malakisilá la.

N na Ala le mu a la,

n be a matɔgɔla le koola.

Ale le mu n baaba Marige la,

n be a tantula le.

3Kɛlɛ malá yati le mu Alatala la.

A tɔgɛ yati le mu Alatala.

4Firauna la sarɛtinu nun a la sɔɔrenu,

a ka anu lafili ba tɔ.

A la sɔɔri kuntigi masubɛreŋɛnu,

anu dulata Kulunyuma ba je tɔ.

5Mɔrɔŋɛnu ka anu mabutin.

Anu jigita ba daŋɛ tɔ iko kure.

6Ee Alatala! I bolo ɲinma bole makilanta i sɛnbɛ la ko la.

Ee Alatala! I bolo ɲinma bole si i jague la ko tiɲa le.

7I be i kɛlɛɲɔgɛnu laboela le i la mansaya nɔɔra la.

I tini i la dumɛ lasanba anu ma,

i be anu bintanna le iko biŋɛ.

8I la foofe sɛnbɛ ka ba je madɛn,

mɔrɔŋɛnu mayɛlɛta iko tatta,

ba je balata ba tɛma.

9Mɔ jaguenu ka a fɔ le, anu ko:

aa anu si mɔ jokki le, han anu ni mɔ take,

aa anu mɛn ni kɛlɛ tɔnɛ jigan,

aa anu nɛɛ ni sɛɛwa.

Aa anu ni anu la fanda kayanma jigan,

aa anu ni nɔ sɔtɔ mɔ kunma.

10Kɔnɔ i la foofe sɛnbɛ ka a ma,

ba ka anu mabutin.

Anu madulata je mɔrɔŋɛ sɛnbɛ la, iko sunbu.

11Ee Alatala, Ala miniman be, bɔɔ ile la?

Ɲɔmɔ si to iko ile,

min na saniyaŋɛ be malanna,

ɲɔmɔ le makilanta,

a bɛnta min ni matɔgɔ?

ɲɔmɔ le be kabanakoenu mala?

12I ka i bolo ɲinma bole lafonti tun,

duge ka anu kunun.

13I ka i la jama kan kunka,

i ka anu latagaman i la kanunteya butɔ.

I sɛnbɛ be a maren, i be anu kun sɔla i la dula saniyandeŋɛ la.

14Jamanɛ donu to ka wo mɔɛ,

anu juse bɔɔta.

Wo jamanɛnu tɔ, Filisiti kaanu juse sɛrɛnta kilaŋɛ la,

15Edɔmi ɲatonkanu, wonu tugun kilanta,

Mowaba mansanu sɛrɛnta.

Fayida limaniya bɔɔta Kanana kaanu bɛ bolo.

16Ee Alatala, kilaŋɛ nun jusu bɔɛ bata anu masɔtɔ,

i la sɛnbɛ wale ka anu bɛ lamɔdɛ iko kure,

han i la jama tanbita,

i bata jama min kunka.

17Ee Alatala, i be anu donila le,

i ni anu lasabati i la kɔnkɛ kunma,

min mu i la kɛɛ la.

Dula le mu wo la, i be ka min masubɛren i yɛtɛ ye sigidula la,

i bolenu mɛn be ɲɔ maren i la dula saniyandeŋɛ la, Marige!

18Alatala la mansaya te ban kudai!»

19Firauna la soeenu, anun a la sarɛtinu anun a la soo laborilanu bɛ to jigita ba tɔ, Alatala ka ba je latuntun anu kunma. Kɔnɔ bani Isirayila kaanu kan tagamanta le ba tɛma, anu kɛŋɛ ma kima.

20Mariyama, nabiyonmɛ muse, Harona barenmuse tugun ka boote jigan, musenu bɛ bɔɔta anu ka a jokki, anu bɛ nun anu la bootenu, anu be yangula. 21Wo butɔ, Mariyama ka beete labita, a ko:

«Wo beete bɔɔ Alatala ye,

bayi a bata a la mansaya sɛnbɛ yita mɔ la.

Soeenu yo, a laborilanu yo,

a bata anu ladula ba tɔ.»

Maara je

22Wo tanbi kɔma, Musa ka bani Isirayila kaanu jigan bɔɔla Kulunyuma ba dala, a ka anu kun sɔ Suuru janfue la. Anu ka tele saba tagamaŋɛ ma janfue tɔ, anu ma je yen. 23Anu nata dula do tɔ ka min tɔgɔ Maara, kɔnɔ anu ma nɔ ɲɔ je minna bayi wo ka a taran ɲɔ je kuna. Wolo mu, Maara tɔgɛ be fɔren wo dula kunma.#15:23 Fondo kunama le tɔgɔ Hebure kuma tɔ «Maara». 24Jama fɔlɔta Musa maɲimila kuma tɔ, anu tota a fɔla: «Mɔ ɲan be ji miniman de minna?» 25Wo butɔ, Musa tugun ka a da ladi Alatala ye, Alatala ka lɔgɔ boliŋɛ do yita a la. Musa ka wo lafili je tɔ, je sɛɛyata.

Alatala ka a la sariyanu nun a la yamɔrenu don anu bolo ɲɔ le, a mɛn ka anu hakkile mafɛlɛ ɲɔ le. 26A ko anu ma: «Ka wo ka n kulɛ lamɔɛ a ɲinma la, nde Alatala, wo la Ala, ka wo mɛn tagata telen n ɲɛ, wo ka n na yamɔre bɛ bita, wo ka n na sariya bɛ labatu, n te bandiya koron yo lasanba wo ma, iko n ka min nasanba Misira kaanu ma, bayi nde mu Alatala le la min si wo lakendeya.»

27Wo kɔma, anu tagata ke Elimi: tenge tan nun fila be ɲɔ, anun tamare lɔgɔ bi wɔrɔwila. Anu madɛnta je kɛnna ɲɔ.

Currently Selected:

Hɔrɔya 15: MOG

Highlight

Compare

Copy