Hɔrɔya 14
14
Misira kaanu la bani Isirayila kaanu jokki koe
1Alatala kumata Musa ye, a ko: 2«Kuma bani Isirayila kaanu ye, anu ni kila du a ma, anu ni naa madɛn Pi Hahiroti saa mafanna, Migidoli saa nun ba tɛma. Baali-Sefon saa tabɛŋɛ tɔ, anu be anu madɛndula ɲiɲala ɲɔ le, ba dala. 3Firauna tini wo mɔɛ, a si a mira le ka a fɔla bani Isirayila kaanu bata sama duge butɔ, anu bata lakɛtɛn janfue tɔ. 4N si Firauna hakkile labɛlɛya le a ni anu jokki. Kɔnɔ n si naa koe ma Firauna nun a la sɔɔrenu la, wolo si a ma n si naa mamatɔgɛ sɔtɔ. Wo butɔ, Misira kaanu si naa a lɔn de ka a fɔla nde le mu Alatala la.»
Bani Isirayila kaanu ka a ma ɲɔgɔnna le.
5Misira mansa to bata lalɔn ka a fɔla bani Isirayila jama bata bori, a nun a la walilanu hakkile yɛlɛmanta bani Isirayila kaanu la ko la. Anu ka a fɔ: «Wo mɔ be fen maren ka, bani Isirayila kaanu boloka koe la anu ni taga? Wo mɔ bata fo mɔ la walilanu la.» 6Firauna ka soeenu kiti a la sarɛti la, a ka a la jama doni a fɛ. 7A ka sarɛti ɲinma kɛmɛ wɔɔrɔ jigan, anun sarɛti tɔɛ bɛ. Mɔgɔ saba saba be a bɛ butɔ. 8Wo butɔ, Alatala ka Firauna Misira mansa hakkile labɛlɛya han a ka bani Isirayila kaanu jokki, minnu bɔɔta Ala sɛnbɛ sabu la. 9Misira kaanu ka anu jokki anun anu la soe bɛ, Firauna la sarɛtinu, a la soo laborilanu anun a la kɛlɛ malá jamanu. Anu ka bani Isirayila kaanu hasɛ madɛnden ba dala, Pi Hahiroti mafanna, Baali-Sefon tabɛŋɛ tɔ.
10Firauna to be sutuyala anu la, bani Isirayila kaanu ka anu ɲa lasaagi kɔma, anu ka Misira kaanu yen nala anu kɔma kisanna. Anu kilanta koola, anu belebeleta Alatala tɔgɛ la. 11Anu ka a fɔ Musa ye, anu ko: «Gaburenu ɲan te sɔtɔ ba bitugun Misira? Wolo be a maren, i be mɔ natiren de ba janfue tɔ, alako mɔ ni na faga yan? I be fen de maren mɔ la ka, mɔ labɔɔ koe la Misira? 12Kaa mɔ bele kɛ-lɛ fɔla i ye nun Misira? Mɔ ko nun: ‹I ni a to mɔ ni wali Misira kaanu ye, wolo fisa mɔ ye mɔ fagareŋɛ ko janfue tɔ.› » 13Kɔnɔ Musa ka jama jaabi, a ko: «Wo kana kilan, wo lakara, wo si a yen bi Alatala be wo lakisila ki min na, bayi wo be Misira kaanu minnu yenna wo la, wo te anu yen bitugun abada. 14Wo lakara, Alatala le be wo la kɛlɛ mala.»
15Wo butɔ, Alatala ka a fɔ Musa ye, a ko: «I be belebelela n na fenna? A fɔ bani Isirayila kaanu ye anu ni wuli taga koe la. 16Ile tugun, i ni i la tungare lawuli i ni i bole lafonti ba kunma, a ni fatan fila la, alako bani Isirayila kaanu ni tɛgɛ ba tɛma, dugu bala tɔ. 17Nde tugun, n si Misira kaanu hakkile labɛlɛya le, alako anu ni wo jokki. Kɔnɔ n si naa koe ma Firauna nun a la sɔɔrenu anun a la sarɛtinu nun soo laborilanu la, wolo si a ma n si naa mamatɔgɛ sɔtɔ. 18Ka n bata ban mamatɔgɛ sɔtɔla Firauna kunma wagate min tɔ, sala a la sarɛtinu kunma, anun a la soo laborilanu, Misira kaa bɛ si a lɔn de, nde len mu Alatala la.»
19Ala la maleka min be sɔren bani Isirayila jama ɲatɔ tagala, a saagita a tota anu kɔma. Luuture madɛndeŋɛ tugun bɔɔta anu ɲatɔ, a nata to anu kɔma, 20a tota Misira jama nun bani Isirayila jama tɛma. Wo luuture mata doenu ye dibe le la, a mata doenu tugun ye su muru ta yore le la. Wo butɔ, kɛ mamadɛn fila ma nɔ kela ɲɔgɔn ma han ɲɔ kɛnɛta.
21Awa, Musa to ka a bole lafonti ba kunma, Alatala ka je kasan su muru tele yɛlɛ fɔɲɛ sɛnbɛ la. A ka ba je fatan fila la, a ka ba ma kan bala la. 22Anu tɛgɛ tɛmuɛ, je mata anu ye tatta la bolo ɲinma tɔ nun bolo mara tɔ. Bani Isirayila kaanu tɛgɛta ba tɛma duge be balaren. 23Misira kaanu ka anu jokki. Firauna la soeenu bɛ anun a la sarɛtinu nun a la soo laborilanu sɔta anu kɔma ba tɛma. 24Ɲɔ la kɛnɛ banba mafanna, Alatala ka a ɲa lataga Misira kaanu la jama ma kabɔɔ ta yore nun luuture madɛndeŋɛ tɔ, a ka Misira jama ɲatadon. 25A ka anu la sarɛtinu kɛŋɛnu matuntun ɲɔgɔn na, anu la tagamaŋɛ lanɛɛbita. Wo butɔ, Misira kaanu ka a fɔ: «Wo mɔ bori bani Isirayila kaanu la, bayi Alatala le be mɔ kɛlɛla anu ye.»
26Alatala ka a fɔ Musa ye, a ko: «I bole lafonti ba kunma, je ni dusu Misira kaanu kunma, anu la sarɛtinu nun anu la soo laborilanu kunma.» 27Awa, Musa ka a bole lafonti ba kunma. Ɲɔ la kɛnɛ la sutuyareŋɛ, ba mɛn be tasaagila a la iko a be ki min na nun. Misira kaanu be borila wagate min tɔ, anu bɛnta je la, Alatala ka a ma je dusuta anu kunma ba butɔ. 28Je tasaagita. Sarɛtinu, soo laborilanu anun Firauna la sɔɔre bɛ minnu be bani Isirayila kaanu jokkiren ba tɔ, wonu bɛ samata le je tɔ. Hali dɔndɔ ma to anu tɔ.
29Kɔnɔ bolo ɲinma nun bolo mara tɔ, je mata bani Isirayila kaanu kan ye tatta le la nun. Anu tɛgɛta le anu kɛŋɛ la ba tɛma be balaren. 30Wo lun, Alatala ka bani Isirayila jama lakisi Misira kaanu sɛnbɛ ma. Bani Isirayila jama ka Misira kaa fagareŋɛnu yen de ba dala. 31Anu ka a yen Alatala be sɛnbɛ banba min nawaliren Misira kaanu la ko tɔ. Jama ka biliya sa Alatala ma, anu ka lannanteya doni Alatala nun a la kiila Musa ma.
Currently Selected:
Hɔrɔya 14: MOG
Highlight
Share
Compare
Copy
Want to have your highlights saved across all your devices? Sign up or sign in
