2 Tesaloniki 3
3
Ala mataran koe
1N nɛɛnɛdɔndɛnu, a tɔɛ la wo ni Ala mataran mɔ ye alako Marige la kibaru ɲinma ni to malansanna teriya la, a mɛn ni biliya iko a be biliyaren wo bata ki min na. 2Wo mɛn ni mamataraŋɛ ma mɔ ye mɔ ni kisi kalabantenu nun mɔgɔ koroŋɛnu ma, bayi dɛnkɛnɛya bele a bɛ bolo. 3Kɔnɔ Marige be tola a la kuma le kɔma: a ni wo lasabati ka wo latanga Sentanɛ ma. 4Mɔ be laaren Marige la wo la ko tɔ, ka a fɔla mɔ bata wo yamɔri koe minnu la, wo be anu mala. Mɔ mɛn be laaren a la, wo mɛn si naa wonu ma tugun. 5Awa, Marige tugun ni wo juse sɔ Ala la kanunteya kila ma, anun a la mɔgɔ masubɛreŋɛ la timiladiya ma.
Fuyantenu lasii koe
6N nɛɛnɛdɔndɛnu, mɔ bata wo yamɔri wo mɔ Marige Isa Ala la mɔgɔ masubɛreŋɛ tɔgɛ la, wo ni yanfaya dɛnkɛnɛyabaganu la minnu be anu fan maren fuyantenu la,#3:6 dɛnkɛnɛyabaganu la minnu be anu fan maren fuyantenu la Tumado dɛnkɛnɛyabaga wali balenu le mu wonu la, minnu be laaren Isa la. Kɔnɔ anu bele sɔnden walila balu sɔtɔ koe la bayi anu bata a mɔɛ aa Isa be na koe tɔ. mɔ ka kuma min nati wo ma, anu bele tagamanna a la. 7Wo yɛtɛ ka a lɔn wo bɛnta mɔ ladegenna ki min na. Bayi, mɔ to be wo tɛma wagate min tɔ nun, mɔle ma ma fuyante la. 8Mɔ ma mɔgɔ yo la dɔmɛ dɔmɔ fu, fɔ ka to wale bɛlɛŋɛ mala sue nun tele han mɔ korita, alako mɔ la ko kana ma kote la dodo ye. 9A si dagɛ mɔ ye nun mɔ ni fondonu sɔtɔ wo la, kɔnɔ mɔ ma sɔn wo la alako mɔ ni ma misale la wo ye, wole tugun ni mɔ ladegen. 10Hali mɔ be wo tɛma wagate min tɔ, mɔ ka wo yamɔri kɛ-lɛ la, mɔ ko: ka mɔgɔ yo ma sɔn walila, a kana dɔmɔre ma. 11Adun, mɔ bata a mɔɛ kɔtɛ aa mɔgɔ donu be wo ɲaama, anu bata anu yɛtɛ ma fuyantenu la. Anu bele wali yo mala fɔ domire. 12Minnu be wo mala, mɔ be wonu yamɔrila ka anu lasii Ala la mɔgɔ masubɛreŋɛ wo mɔ Marige Isa tɔgɛ la, mɔ ko anu ni wale ma sabare la, anu ni anu yɛtɛ bolofeŋɛ dɔmɔ.
13Mɔ nɛɛnɛdɔndɛnu, wo kana kori ko ɲinma ma koe la. 14Mɔ ka kuma min fɔ kɛ bataakɛ tɔ, ka a taranta mɔgɔ bele wo labatula, wo ni wo lakɔrɔsi koola. Wo kana da diya yo ɲini wo tigi la alako a ni malu. 15Kɔnɔ wo bɛ butɔ, wo kana a ma wo jague la de, wo ni a lasii iko wo nɛɛnɛdɔndɛ.
Kɔntɔri tɔɛ
16Awa, jususa tige Marige yɛtɛ ni wo juse sa tɛmuɛ bɛ tɔ, a mɔɔle bɛ la. Marige ni to wo bɛ fɛ.
17Nde Pɔlu le be kɛ kɔntɔre sɛbɛla n yɛtɛ bole la wo ma. N na bataakɛ bɛ be matɔnkumaren kaa le. N bolo baa le ka. 18Ala mu a mala mɔ Marige Isa, Ala la mɔgɔ masubɛreŋɛ la hinnɛ ni to wo bɛ fɛ. ⸂Amina.⸃
Currently Selected:
2 Tesaloniki 3: MOG
Highlight
Share
Copy
Want to have your highlights saved across all your devices? Sign up or sign in
