Yaguba 1

Kɔntɔre

1Bataakɛ le mu ka, a be fatanden nde Yaguba le la, Ala nun a la mɔgɔ masubɛreŋɛ Marige Isa la joŋɛ. N bata wo kɔntɔn, wole Ala la jama bɔnsɔ tan nun fila minnu be malansanden jamanɛnu butɔ.#1:1 Ala la jama bɔnsɔ tan nun fila minnu be malansanden jamanɛnu butɔTaureta Musa be bani Isirayila jama la ko fɔren, wo bɔnsɔ tan nun fila bɛ labɛndeŋɛ le mu anu la nun. Dɛnkɛnɛyabaga minnu bɛ be sɔren Isa kɔma, Yaguba be wonu bɛ labɛndeŋɛ misaliren Isirayila bɔnsɔ tan nun fila le la, wo ka a taran anu be malansanden dunuya bɛ butɔ.

Sɛɛwa koe tɔɔrɛ butɔ

2N nɛɛnɛdɔndɛnu, ka tɔɔrɛ mɔɔle min yo ka wo masɔtɔ a ni ma wo ye ɲagaliŋɛ la, 3bayi wo ka a lɔn, hali wo tɔɔrɛ be wo masɔtɔla, kɔnɔ ka wo ma taga dɛnkɛnɛya boloka, wo tɔɔrɛ ɲan be mala sabue la wo ye wo ni timiladiya. 4Kɔnɔ wo ɲan ni limaniya lakamali ka timiladiya! Wolo si a ma, wo ni ma mɔgɔ kamalireŋɛ hagiga la fenfen bele toren minnu la ko la.

5Ka hakkilimaya bele mɔgɔ do bolo wo tɛma, a tigi ni Ala táran. A si a sɔtɔ le, bayi Ala te dumɛn mɔgɔ yo ma a ni a yigitɛgɛ, fɔ a ni i kɔ a yiriwareŋɛ le la. 6Kɔnɔ fɔ mɔgɛ ni Ala mataran dɛnkɛnɛya le la, a kana sikkɛ feu, bayi mɔgɔ sikkɛreŋɛ be toren de iko mɔrɔŋɛ, fɔɲɛ be min nawulila a ni a matuntun ka a kasan. 7Wo tigi kana a mira a be fondo le sɔtɔla Marige la. 8A hakkile bele sɔren Ala dɔrɔn de la; a be fenfen min mala, a te sɔn tola kila dɔndɔ kɔma.

Fugariya nun bannaya

9Fugari dɛnkɛnɛyabaga ni sɛɛwa, ka a fɔla Ala bata a la ko mayɛlɛ. 10Kɔnɔ banná kan, ka Ala be a la ko majigila, wo ni ma a ye sɛɛwa la, bayi a la ko be nala banna le iko burun butɔ ɲagama feere. 11Tele tini yɛlɛ anun a tini bandi, ɲagama si bala le han a feere ni yɛlɛn, a la mamajaboe ni ban. A be ɲɔgɔnna le banná tugun ye. A be a la walenu tɔ tɛmuɛ min tɔ, a be nagasila wo tɛmuɛ le.

Mɔgɔ latantan koe

12Hɛra be mɔgɛ ye min be a timiladiyala tɔɔrɛ butɔ, bayi ka a bata ban wo tɔɔrɛ lamuɲula, Marige si a kunnawuli le a ni kise dii a ma. A be wolo lahiriren a kanunteŋɛnu ye. 13Mɔgɛ tini di tantanna a la tɔɔrɛ wagate, a kana a fɔ Ala le be a latantanna, bayi a sɔgɔ bele Ala la feu ale yɛtɛ ni ko koroŋɛ ma, a mɛn te adama yo latantan ko koroŋɛ ma koe la. 14Ade, kɔnɔ adamadeŋɛ yɛtɛ diyanankoe ko koroŋɛ le be a latantanna. Wolo be a masabala han a ni a laboe. 15Mɔgɛ diyanankoe ko koroŋɛ tini bue jigan, a la deŋɛ be mala junube le la. Junube tugun tini ban sɛnbɛ sɔtɔla, a la deŋɛ be mala faga le la.

16N nɛɛnɛdɔndɔ kanunteŋɛnu, wo kana wo yɛtɛ majuguya. 17Kɔɔre ɲinma bɛ, anun min yo kaɲin mɔgɛ ye, a bɛ be fatanden Daali Mansa le la min be saŋɛ tɔ, min be malanfeŋɛnu daren. Ala te masara, a la mamakɛnɛŋɛ te masara dibe la. 18A yɛtɛ sagoe, a bata wo mɔ ma a la deŋɛnu la a la tɔɲa kuma sabu la, a ka wo mɔle fɔlɔfɔlɔ le kɛrɛkɛrɛ wo mɔ ni ma a tɛŋɛ la a la dalifeŋɛnu bɛ tɛma.

Ala la kuma lamɔɛ koe nun ka a labatu

19N nɛɛnɛdɔndɔ kanunteŋɛnu, wo ni wo hakkile to kɛ kuma ma: Wo dɔndɔ dɔndɔ bɛ ni haujɛ wo tolomasɔ koe la, wo kana teriya kumala, wo juse kana yɛlɛ teriya la, 20bayi mɔgɛ la dumɛŋɛ te ko telendeŋɛ ma Ala ɲakɔtɔ. 21Wolo mu, wo ni ko manɛfireŋɛ nun ko koroŋɛ mɔɔle bɛ boloka. Ala bata kuma min nasabati wo juse tɔ, wo ni wo bita mamajige butɔ, bayi wo kuma si nɔ wo lakisila.

22Wo ni Ala la kuma labatu. Ka wo ka a mɔɛ le tun, kɔnɔ wo ma a ma, wo bata wo fan majuguya. 23Wo tanbi kɔma, ka mɔgɛ min ka Ala la kuma lamɔɛ, kɔnɔ a ma a jokki, a be tola le iko mɔgɛ min tini be a yɛtɛ ɲakɔtɔ lasagala ninimatoe ma; 24a ni a lasaga, a ni taga, a ni ɲina kisanna a ɲakɔtɔ ma a be ki min na nun. 25Kɔnɔ mɔgɛ mɔɔle do tugun be ɲɔ, a be sariya kamalireŋɛ fɛlɛla a ɲinma la, sariya min si hɔrɔya dii mɔgɛ ma. Wo tigi be timiladiyala sariya ma, a bele ɲinaren a ma, a mɛn ka a labatu. Awa, min be wo tɔ, hɛra be wo tigi ye.

26Ka mɔgɔ yo ka a yɛtɛ mira diinɛlá la, kɔnɔ ka a bele a yɛtɛ tabitala a da ma, wo tigi be a yɛtɛ majuguyala le. A la diina sɔdula yo bele. 27Diina beeyareŋɛ, kɔnɔ yo bele min na Ala ɲakɔtɔ, ale le mu ka: wo mɔ ni mɛnni aliyatimɛnu nun furuɲa musenu ma anu be anu la tɔɔrɛ min tɔ, wo mɔ mɛn ni mɔ yɛtɛ tabita, dunuya koe kana kɔnɔ to wo mɔ la.

Currently Selected:

Yaguba 1: MOG

Highlight

Copy