2 Tesaloniki 1
1
Kɔntɔre
1Bataakɛ le mu ka, a be fatanden nde Pɔlu, Silasi nun Timote le la, tagala wole Tesaloniki saa dɛnkɛnɛyabaga jama ma, minnu bata ma wo mɔ Baaba Ala nun a la mɔgɔ masubɛreŋɛ, Marige Isa tɛŋɛ la. 2Wo mɔ Baaba Ala nun a la mɔgɔ masubɛreŋɛ Marige Isa ni hinnɛ nun jususa dii wo ma.
Marige Isa tana luŋɛ kiiti koe la
3N nɛɛnɛdɔndɛnu, mɔ bɛnta mɔ ni Ala tantu wo la ko la tɛmuɛ bɛ tɔ. Iyon, wo kaɲin, bayi, wo la dɛnkɛnɛya be koloyala a ɲinma la, anun wo dɔndɔ dɔndɔ bɛ la kanunteya be kunmasala ɲɔgɔn ye. 4Wo butɔ, mɔ be wo matɔgɔla Ala la dɛnkɛnɛyabaga jama donu ye, wo to be timiladiyaren, wo be dɛnkɛnɛyaren ka ɲagankata nun tɔɔrɛ bɛ lamuɲu. 5Wo bɛ le be a yitaren Ala be nala kiiti telendeŋɛ sala. Wo kiite butɔ, a si wo jigan mɔgɛnu la minnu bɛnta tola a la mansabaya niiniŋɛ kɔtɔ, wo be tɔɔrɔren Ala la mansabaya min na ko la.
6-7Iyon, mɔgɛnu minnu be wo ɲagankatala, ka Ala be anu sɔŋɛ diila ɲagankatala le la, wole tugun minnu bata ɲagankata, ka a tagata suleŋɛ le dii wo ma, a ni a dii mɔle tugun ma, ko telendeŋɛ le mu wo la Ala ye. A si wo ma le Marige Isa nun a la maleka sɛnbɛmanu be nala tɛmuɛ min tɔ bɔɔla saŋɛ tɔ. 8Anu nun ta mɛlɛŋɛ le be jigila. Ala lɔnbalenu, minnu bele wo mɔ Marige Isa la kibaru ɲinma labatula, anu sɔŋɛ be diila ɲagankata le la. 9Anu si tɔɔrɔ le ka kasara abada, Marige si anu layanfaya le ale nun a sɛnbɛ nɔɔrɔreŋɛ la. 10A si na le wo lun alako a manton saniyandeŋɛnu bɛ ni a yen, anu ni kaabɛ, anu ni a matɔgɔ. Adun, wole tugun si to le wonu ɲaama, bayi wo dɛnkɛnɛyata le mɔ la seedeɲɔgɔya ma.
11Wo butɔ, mɔ be Ala mataranna wo ye wagati bɛ, mɔ ko wo mɔ Marige Ala ni wo to iko a dagɛta ki min na mɔgɛ ye a be min keleren. Mɔ mɛn ko a ni wo la hanige ɲinma bɛ lakamali, anun wo la wali ɲinma min be maren dɛnkɛnɛya sabu la. Wo be mala a sɛnbɛ le sabu la. 12Mɔ be wo mamataraŋɛ mala alako Marige Isa ni mamatɔgɛ sɔtɔ wo sabu la, wole tugun ni mamatɔgɛ sɔtɔ Isa la. Kɛ bɛ be mala Ala nun a la mɔgɔ masubɛreŋɛ Marige Isa la hinnɛnteya sabue le la.
Currently Selected:
2 Tesaloniki 1: MOG
Highlight
Share
Copy
Want to have your highlights saved across all your devices? Sign up or sign in