Room 9
9
Pútuun pa niŋ payenka mpimamale ka
1Eeha inci iyyem ha ti hisoku hátikin Eenucee ya, hiti páni; inci neetaat ti kincaam. Kunuuwam enka Kunuu ka keenape ka nkicaaŋane ka, kisayanaasayan nii hiti páni. 2-3Inci taakaataak kúnuul kenfakat niŋ ñíseeña ñeepayantoo ti yaanam kamma pakanam Pusuwif pa, síi ya etoom. Niŋ eehe hípiyini pitaako, inci láfilafi Pútuun pa pipiñanam píkatinoolee niŋ Eenucee ya, iyyema ekina efeewun pakanam nkafakanee. 4Poko kayem pakati Israyel. Pútuun pa mpíhinii epuuk etempo, apan mpíyisanii hamake etempo. Mpiliil písiyool neyii, mpuwufanii hilim ha heesiiŋanee ha hiti Móyiis, mpíyisanii fa efikawaaseen po, mpíyinananii eeha mpikaakaayii ha íhinu. 5Poko kayem pakati miin ma miti Abraham, Isaak niŋ Jakob, payenka Pútuun pa mpimamale ka. Eenucee ya lompo ti oom miin náafulii ta náayenoonii ta an, akina ayem Pútuun pa ti waah óo waah. Alímaati úmuloo tan óo tan! Amíini.
6Inci sokut nii Pútuun pa píhinut eeha mpíyinanane ha. Kaatuko epuuk ya pakati Israyel púlooŋ tom kayem epuuk ya pánipani pakati Pútuun pa. 7Apan neetaat nii keesoke ka Abraham maamaa púlooŋ kayem epuuk pánipani ya pakati Pútuun pa, kaatuko Pútuun pa pusokoosok: “Ti Isaak aafataak miin emma inci íyyinananuu ma.”#Púcook 21:12 8Eehuu híyisane nii, keesoke ka Abraham maamaa ti nampuke, poko púlooŋ tom kayem epuuk ya pakati Pútuun pa. Pale epuuk ya keepukee ka pínapii ti eeha mpíyinanane ha, payenkuu mpucoke nii epuuk etempo. 9Kaatuko ehe eeha mpíyinanane ha, hisok: “Pulay ti caanak ence inci fáñohoonii, tempo aali afaataak cikampaani.”#Púcook 18:10,14
10Eehuu lamma tom, pale Pútuun pa pusokaasok lompo Rebeka hikee. Rebeka ayem maamaa ati unaa Isaak aaloo. Naasa munow miti máasupak. 11-12Pale háati le niŋ máasupak ma efimupukee, Pútuun pa mpusoke Rebeka nii: “Añiini áhampaatiin a afaayeno amiikan ti kahiineen ka.”#Púcook 25:23 Ta mpusoke ta eehuu, káhinut cántum heenape niŋ heenaput. Pútuun pa píhinaahin eehuu pípiyisan nii pikina mpimamal. Mpimamalmamal an samat nii fa mpílafiye fa, pale neetaat kamma heenape eeha náahine ha. 13Fiyuu inkiicee ti hilim ha hiti Pútuun pa nii: “Jakob inci íllafiye, pale innat Esawu.”#Malaki 1:2-3
14Eeheyme efuusokaa? Fo Pútuun pa peecoonoolut? Haani, hitaakiit! 15Kaatuko pusokaasok Móyiis: “Iyyísanyisan pálafi niŋ paket hikaw ti payenka inci immamale ka.”#Efúlii 33:19
16Ooto Pútuun pa mpimamalmamal pakan paka, neetaat kamma nkálafiye kapimamalee, neetaat lompo kamma nkáhin kata kati kasayanee. Pale Pútuun pa mpimamal an ti paket hikaw etempo. 17Kaatuko kiiceekiic ti hilim ha hiti Pútuun pa nii, Pútuun pa pusok amansa ya ati Esipt: “Inci hínuu aapiyeno amansa kati yísani sempe sa sitoom, caacawam incicoopee pan óo pan ti etaam ya.”#Efúlii 9:16 18Ooto Pútuun pa mpimamalmamal aŋa mpílafiye ya hitaaku paket hikaw teyoo, mpimamal lompo aŋa mpílafiye ya kaayankan ekunoo.
Káñiken ka kiti Pútuun pa niŋ paket hikaw etempo
19Pikee pa akee naasokam: “Iyyema Pútuun pa mpíhin pakan paka kapuwen fiyuu, weyme uwune mpuwatanii nene? Kaatuko ayme áfaayini hipooku eeha Pútuun pa mpiyemoo ha ti hítunku ápihin?” 20Inci fasok oom an: “Awe yem ayme, awe an lamma, aakati ñahan fiyuu Pútuun pa? Fo waah weeteefee niŋ hikaf efuusok eeteefe wo ya, 'Weyme uwune anteefam fiye?' 21Fo ateefa ayinaat íhinu héesuumoo niŋ hikaf ha hiteyoo? Fo ayinaat kaamemanool niŋ hikaf ha hoonool huu epool eti káasisikool keetaake hikaw niŋ lompo epool eti káasisikool keetaakut hikaw?”
22Pútuun pa mpílafi káyisan káñiken etempo niŋ sempe etempo. Ekina ewune mpiliil pakakee paka payenka ammeya ka nii, po hátikin efikasa káñiken etempo nkápucaloolee. Pale mpuwunii eloŋ mpumukut neyii meemak. 23Pílafilafi káyisan ti eehuu hisaanumate ha hiti hamake etempo ti payenka mpitaake ka paket hikaw, payenka mpimamale ka píliilum púlunta pa kati kasa hamake ha. 24Apan pakan paka payenkuu kayem unaa, unaa payenka mpiyonkale ka, neetaat ti Pusuwif pa lamma, pale focaa lompo keeneetaat ka Pusuwif. 25Fiyuu mpusoke ti púkoo ya eti ayaamakoola ya Hoseya nii:
“Keeneetaat ka pakanam, inci fayonkalii pakanam;
payenka inci íllafiit ka, inci fálafiyii.” #
Hoseya 2:23
26 “La inci insokii la faw: 'Nineetaat pakanam',
toko efikayonkalee epuuk ya pakati Pútuun pa peeyem pa kaloŋa.” #
Hoseya 1:10
27Ayaamakoola ya Esayi náaceekii kiti Israyel, apusok:
“Háati fa pakati Israyel nkameeŋe fa samat nii esiya ya eti kaatii ka,
pakan caahinkilis teyii lamma efikafakanee.
28 Kaatuko Ateeteyo áfaahin kíiti mpacas etaam ya,
náahin ho fo hipa pak.” #
Esayi 10:22-23
29Samat nii fa Esayi naasoke fa faw:
“Iyyema Ateeteyo ati sempe sa púlooŋ
atowanut keesoke unaa maamaa,
anti ucukaa nii pakati Sotom, # 9:29 Pakan paka pakati Sotom niŋ pakati Komola kakancaakanc hínum meemak, ekina ewune Pútuun pa mpúpucalool pisaatee pa piteyii (Púcook 18:17–19:27)
nuunakoolaa lompo nii pakati Komola.” #
Esayi 1:9
Pakati Israyel niŋ ekooŋan ya éesuume ya
30Ooto eeheyme efuusokaa? Keeneetaat ka Pusuwif kaŋesut piyeno pakan keecoonoole hátikin Pútuun pa, pale Pútuun pa mpucokii nii keecoonoole kamma káyinan ka kiteyii ti Eenucee ya. 31Antúŋ pakati Israyel, keeŋese ka piyeno keecoonoole ti hilim ha heesiiŋanee ha, kataakut ho. 32Weyme uwune? Kaatuko kaŋesaaŋes piyeno keecoonoole pínapii ti eeha nkáhin ha, pale neetaat ti káyinan. Nkáfukoolo ti énankiin ya eyya netah ya pakan paka, 33samat nii fa inkiicee fa ti hilim ha hiti Pútuun pa, hisok:
“Sincan, inci oopa ti kaahintan énankiin ti tíntiŋ ya eti Siyon,
eyya newas pakan paka éfukoolo nkanow.
Pale aŋa éeyinane ya teyoo atasuu.” #
Esayi 8:14; 28:16
Kuloonaay © Wycliffe Bible Translators, Inc. 2026.