Room 8
8
Eloŋ ti sempe sa siti Kunuu ka keenape ka kiti Pútuun pa
1Ooto fiye keeyem ka ti Yéesu Eenucee ya, Pútuun pa étipihinii kíiti, etipisiiŋanii lompo ti pisiya. 2Kaatuko sempe sa siti Kunuu ka keenape ka enka nkuwufan ka eloŋ ya éefulii ya ti Yéesu Eenucee ya, insifakani ti sempe sa siti kaamuuyen niŋ eket. 3Hilim ha heesiiŋanee ha hiti Móyiis hiyinaat íhinu eehuu kamma pakan paka nkataakut sempe siti hítuulu ho. Pale Pútuun pa mpíhin ho: mpúpoñii añii etempo ápiyenoonii an apucuk samat nii unaa pumuuyena pa, kati afakan unaa ti kaamuuyen. Fiyuu Pútuun pa mpúpucaloole sempe sa siti kaamuuyen ka keeyem ka ti páhin ti unaa. 4Píhinaahin eehuu ancuk úyiniyaa eloŋ pántoon samat nii fa hilim ha heesiiŋanee ha nihisoke fa, unaa payenka ammeya ka nii uneetaataa ti eloŋ samat nii fa kunuu unaa keenaput ka nkílafiye fa, pale samat nii fa Kunuu ka keenape ka nkílafiye fa.
5Pánipani keeyem ka ti eloŋ samat nii fa kunuuwii keenaput ka nkílafiye fa, héesuume ha kunuuwii keenaput ka nkámiilool. Pale keeyem ka ti eloŋ samat nii fa Kunuu ka keenape ka nkílafiye fa, poko héesuume ha Kunuu ka keenape ka nkámiilool. 6Niŋ an ámiiloolaa héesuume ha kunuuwoo keenaput ka, oopa ti ihiiŋu ti pítin eket; pale niŋ an ámiiloolaa héesuume ha Kunuu ka keenape ka, oopa ti ihiiŋu ti pítin eloŋ niŋ kásuumaay. 7Payenka nkámiilool ka tan óo tan héesuume ha kunuuwii keenaput ka, pikamool Pútuun pa. Kátuulut hilim ha heesiiŋanee ha hiti Pútuun pa, kayinaat ho fala hítuulu. 8Apan payenka nkámiilool ka héesuume kunuuwii keenaput ka, kayinaat íhinu héesuume ha Pútuun pa.
9Pale aluu, nineetaat payenka nkáhin ka héesuume ha kunuu aluu keenaput ka, pale héesuume ha Kunuu ka keenape ka kiti Pútuun pa, niŋ pánipani kikinaakin ti aluu. Niŋ an ataakut Kunuu ka kiti Eenucee ya, aneetaat an ati Eenucee ya. 10Pale niŋ Eenucee ya akinaa ti aluu, háati fa sinii aluu insiñaŋe fa eket kamma umuuyen, Kunuu ka keenape ka efikuwufan aluu eloŋ kamma Pútuun pa mpucoke aluu nii pakan keecoonoole. 11Niŋ Kunuu ka keenape ka kiti Pútuun pa péelitanii pa Yéesu ti eket ya kikinaa ti aluu, ooto Pútuun pa poonool puu péelitanii pa Eenucee ya ti eket ya, efipuwufan eloŋ sinii aluu seeyem sa ti eket. Efípihin eehuu pínapii ti Kunuu ka keenape ka keekine ka ti aluu.
12Ooto pakanam ti káyinan, taakaataak waah ewwa nuuñaŋaa íhinu, pale uneetaat kanapan kunuu unaa keenaput ka. 13Kaatuko ínnihinaa héesuume ha kunuu aluu keenaput ka, efiniket. Pale innimukaa pawenal aluu peenaput pa pínapii ti Kunuu ka keenape ka, efiniloŋ. 14Payenka Kunuu ka keenape ka nkítintiŋan ka, payenkuu epuuk Pútuun pa. 15Apan Kunuu ka keenape ka enka Pútuun pa mpuwufane ka aluu kineetaat kiti íhinu aluu pimiikan, ancuk niyeniyaa ti eloŋ eti hifeyu nene. Pale kunuu enka mpuwufane ka aluu kiti íhinu aluu epuuk etempo. Kikina nkútunk unaa upuceekaa upusokaa: “Paapaa!” 16Kunuu ka keenape ka faŋ etenko, nkíyisanyisan kunuu unaa nii unaa epuuk Pútuun pa. 17Páawoo unaa epuuk etempo, efuutaakaa himpaac ti hisaanumate ha eeha mpimanke ha pakan etempo. Efuutaakaa teeho ti coonool niŋ Eenucee ya, kaatuko niŋ utaakaa ti kúnuul ka kiteyoo, efuutaakaa lompo ti hamake ha hiteyoo.
Hamake ha hiti Pútuun pa hiti hátikin
18Híiniyaamhiini nii hamake ha eeha Pútuun pa éfipiyisan ha unaa hiyinaatee kaakufumool niŋ kúnuul enka nuuyemaa ka ti hicuku féefiye. 19Kaatuko waah wa púlooŋ ewwa Pútuun pa mpiliile wa, uwwa ti hítuulu niŋ kahiliikan ta Pútuun pa mpikaakaay ta káyisan keeyem ka epuuk etempo. 20Kaatuko waah wa púlooŋ weeliilee wa uñaneeñan. Ukina tom uŋese eehuu, Pútuun pa píhine ho. Pale cíki yoopiya toko nii, 21hikee hinoom, Pútuun pa efipifakan waah óo waah weeliilee ti káfulan pañan pa piti eket niŋ káapucalool. Niŋ pifakanaa wo, efuutaak lompo ti hamake ha hiti epuuk Pútuun pa. 22Uméyiyaameyi nii waah wa weeliilee wa púlooŋ uwwa ti hiliku niŋ ti kúnuul fo fíyooy samat nii aal eeyem ti hipuku. 23Eehuu lamma tom, háati unaa faŋ unaa lompo keetaake ka Kunuu ka keenape ka, keeyem ka waah wa úyaañ wa ewwa Pútuun pa mpuwufane wa unaa, unka ti hiliku ti saan unaa. Ti oom hiliku, unaa unka ti hítuulu Pútuun pa ti kahiliikan pípihin unaa epuuk etempo pántoon, mpuwufan unaa sinii séeyeeni. 24Kaatuko niŋ cíki eyye nuufakanee. Cíki eecukee eneetaat nene cíki: fo an afaatowo ti hitaaku cíki ti waah ewwa naacuke? 25Pale niŋ utaakaa cíki ti waah ewwa nuucukutaa fala, núutuulaatuul wo ti kamukut.
26Fo lompo incuke, Kunuu ka keenape ka nkiyankanan unaa niŋ káyinan ka kutuunaa kitaakut sempe. Kaatuko úmiitaa eeha nuuñaŋaa kaluum Pútuun pa, pale Kunuu ka keenape ka nkuluum Pútuun pa kiti unaa samat nii an eeyem ti hiliku, hiliku eeha ammeya nii an ayinaat kakaman. 27Apan Pútuun pa empa mpucuk pa saan sa pímeyimeyi pámiiloolal Kunuu ka keenape ka, kaatuko nkuluumluum po kiti pakan etempo samat nii fa mpílafiye fa.
28Uméyiyaameyi nii, kéelafiye ka Pútuun pa, payenka mpiyonkale ka samat nii eeha mpihintane ha kati píhin, Pútuun pa mpíhiniihin heenape tan óo tan ti waah óo waah weetaakiyii. 29Pútuun pa pímeyiyiimeyi píliilum púlunta pa, mpimamalii kapucuk nii Añii etempo, ancuk Añii etempo ayeniyaa añii áyaañ ti miin menfakat. 30Payenka mpimamale ka, piyonkalii-yonkal lompo; payenka mpiyonkale ka, pucokiicok lompo nii pakan keecoonoole; payenka mpucoke ka nii pakan keecoonoole, puwufaniiwufan lompo hamake etempo.
Iheeku fo muus
31Eeheyme efuusokaa kiti eehuu? Niŋ Pútuun pa umpa niŋ unaa, ayme afaapook unaa? 32Pikina peekatut pa Añii etempo, pale mpuwufanoo apiket kamma unaa púlooŋ, puume conko etipuwufan unaa waah óo waah neyoo? 33Ayme afaanook unaa, unaa payenka Pútuun pa mpimamale ka? Fo Pútuun pa? Haani, kaatuko pikina faŋ etempo pusoke nii unaa pakan keecoonoole. 34Ayme afaasiiŋan unaa ti pisiya? Fo Yéesu Eenucee ya? Haani, kaatuko akina faŋoo aketaaket náalitaniyee ti eket ya; apan oopa ti epees yáali ya eti Pútuun pa, náayemi ti kaluum etempo kiti unaa. 35Ayme áfaayini káakatinool unaa niŋ pálafi pa piti Eenucee ya? Fo kúnuul, niŋ fotom fo páciite, niŋ fotom fo kaakallanee, niŋ fotom fo épankul, niŋ fotom fo ñáfalfali, niŋ fotom fo seemak, niŋ fotom fo káakuntu? 36Kiiceekiic ti hilim ha hiti Pútuun pa, nii:
“Kamma aluu nuucuk eket hinak óo hinak;
nuucokee samat nii písaacii peeñaŋee hitaaŋu.” #
Kícimu 44:22
37Pale ti eehuu púlooŋ uheekaaheek fo muus, pínapii ti akina éelafiye ya unaa. 38Kaatuko inci híiniyaamhiini hat nii neetaat eket niŋ fotom eloŋ, neetaat pumaleekoo niŋ fotom kísaalumant, neetaat hiti fíyooy niŋ fotom hiti kacom, niŋ fotom keetaake ka sempe, 39neetaat pahaan niŋ fotom páloos, niŋ fotom waah óo waah weeliilee, eehuu fiyuu púlooŋ étihiyini káakatinool unaa ti pálafi pa piti Pútuun pa peeyem pa ti Yéesu Eenucee ya Ateeteyo ati unaa.
Kuloonaay © Wycliffe Bible Translators, Inc. 2026.