Room 10
10
1Aluu pakanam ti káyinan, eeha inci íllafiye ha ti yaanam niŋ eeha inci illuum ha Pútuun pa hiyem, álimaati Pusuwif pa kafakanee. 2Méyimeyi nii nkawenwen niŋ saanii hak Pútuun pa, pale kámiit po. 3Kámiit fa Pútuun pa mpucok fa pakan paka nii keecoonoole, nkaŋes kaasiiŋan faŋii fa an afaayeno eecoonoole. Ooto kapookaapook fa Pútuun pa mpucok fa an nii eecoonoole. 4Kaatuko Eenucee ya áhinaahin hilim ha heesiiŋanee ha hiti Móyiis hipipa, mantefa kéeyinane ka teyoo púlooŋ, Pútuun pa mpucokii nii pakan keecoonoole.
Kafakanee ka kiti an óo an éeyinane
5Eehe Móyiis naakiice kiti kéelafiye ka hinapu ti hilim ha heesiiŋanee ha kapiyeno keecoonoole hátikin Pútuun pa. Hisok: “An óo an éehine waah óo waah ewwa hilim ha heesiiŋanee ha nihisoke ha, afaataak eloŋ pínapii teeho.”#Lewitik 18:5 6Pale keecoonoole ka kamma káyinan ka kiteyii nkasoksok: “Timpi sok ti yaani, 'ayme afaasilo alacana?'#Kakaman 30:12 (pucuk fiye nii áalafilafi éwananii Eenucee ya). 7Timpi sok lompo, 'ayme afaawano pati keekete ka?' (pucuk fiye nii áalafilafi élitanii Eenucee ya ti eket ya).” 8Ooto weyme efuusokaa? Kiiceekiic nii: “Hilim ha hiti Pútuun pa hílaaŋuti, uuha ti putumi niŋ ti yaani.”#Kakaman 30:14 Hilim eehuu hiyem hilim ha hiti káyinan ka eeha núutuunan ha. 9Niŋ áakupaa niŋ putumi hátikin pakan paka nii Yéesu ayem Ateeteyo, íyyinan lompo ti yaani nii Pútuun pa pílitaniyoo-litan ti eket ya, aafafakanee. 10Kaatuko náayinanaa ti yaani, aafacokee nii eecoonoole; náakupaa niŋ putumi, aafafakanee. 11Pánipani hilim ha hiti Pútuun pa hisok nii: “aŋa éeyinane teyoo, atasuu.” 12Ooto Pusuwif pa niŋ keeneetaat ka Pusuwif kaleha. Ateeteyo oonool lamma nkataake, aŋa nasampan meemak pakan paka púlooŋ keeyonkaloo ka. 13Kaatuko hilim ha hiti Pútuun pa hisok: “An óo an eeyonkale caacaw ca citi Ateeteyo, afaafakanee.”#Sowel 2:32
14Pale puume efikayonkaloo niŋ káyinanut teyoo? Puume éfikayinan teyoo niŋ kásiit caacawoo? Puume éfikasi caacawoo niŋ an átuunanutii? 15Puume an áfaatuunanii niŋ apoñutee? Hilim ha hiti Pútuun pa hisok: “Súumanani-súumanani niŋ an ácoliyoo niŋ ekooŋan éesuume!”#Esayi 52:7 16Pale an óo an tom acoone ekooŋan ya éesuume ya. Kaatuko ayaamakoola ya Esayi asok: “Ateeteyo, ayme áyinane ekooŋan ya etoonii?”#Esayi 53:1 17Ooto káyinan nataakotaako niŋ áasiyaa; hísiyu naataako pínapii ti hilim ha hiti Eenucee ya.
18Pale inci picakan: fo pakati Israyel kásiit ekooŋan ya? Ee, kásiyaasi yo! Hilim ha hiti Pútuun pa hisok:
“Kilim ka kiti payenka nkátuunan ka hilim ha
kísiyeesi ti etaam ya púlooŋ,
ekooŋan ya eteyii
neecol pan óo pan ti púlunta pa.” #
Kícimu 19:4
19Inci pinene cakan, fo pakati Israyel kámiit ho? Ee, kámeyimeyi. Kaatuko ti caanak ca citi Móyiis, Pútuun pa pusokaasok:
“Inci fáhin aluu nipimelo pakan keeneetaat síi eti páni.
Inci fáhin aluu nípiñiken ti síi eecohatiit.” #
Kakaman 32:21
20Pútuun pa lompo mpútunk Esayi apusok niŋ híyiinate:
“Keeŋesutam ka kacukaam,
íyyisanoolo ti keeyonkalutam ka.” #
Esayi 65:1
21Pale pakati Israyel, Pútuun pa pusok:
“Hanakan ha púlooŋ inci ímpantin sipeesam pakanam kati kákey,
pale nkapookam, apan nkásiiŋoonii ti inci.” #
Esayi 65:2
Kuloonaay © Wycliffe Bible Translators, Inc. 2026.