Room 7
7
Hilim ha heesiiŋanee ha ti pinimo
1Aluu pakanam ti káyinan, aluu payenka inci iyyem ka ti káakup nímeyimeyi hilim ha heesiiŋanee ha hiti Móyiis. Fo nímiit nii, hitaakaataak sempe ti an niŋ oopa kaloŋa lamma? 2Usincanaa ti aal eenimiye: hilim ha heesiiŋanee ha hiti Móyiis hisok nii, afaatowo ti áyiinoo niŋ áyiin a oopa kaloŋa. Pale niŋ áyiinoo aketaa, ayihaayih ti hilim ha heesiiŋanee ha heecenkii ha. 3Niŋ ahintiyaa niŋ akee áyiin, áyiinoo kaloŋa, ooto afaacokee nii nihaañiya. Pale niŋ áyiinoo aketaa, aneetaat fiye ti hilim ha heesiiŋanee ha. Ayíniyini nene pinimo ti akee áyiin, apan atayeno nihaañiya.
4Pakanam ti káyinan, ínkeyyoo ti hilim ha heesiiŋanee ha hiti Móyiis, aluu lompo niketaaket pínapii ti enii ya eti Eenucee ya ati Pútuun pa. Fiyuu innineetaat fiye ti keeyem ka ti hilim ha heesiiŋanee ha, pale ti pakati aŋa éelitaniyee ya ti eket ya, mantefa eloŋ ya eti unaa neetaak papukal peenape piti kámakiyan Pútuun pa. 5Pánipani ta nuuyeniyaa ta ti sempe sa siti kaamuuyen ka, hilim ha heesiiŋanee ha níhiyiyalyiyal hínum pálafi pa piti unaa peenaput pa, eloŋ ya eti unaa kati etaak papukal empa éfiputunk unaa ti eket. 6Pale fiye uyihaayih, uneetaataa fiye ti sempe sa siti hilim ha heesiiŋanee ha heecoke ha unaa, kaatuko ínkeyyoo teeho, uketaaket. Fiye úyiniyaayini piyeno pimiikan pakati Pútuun pa ti pawenal péeyeeni, ti sempe sa siti Kunuu ka keenape ka, apan neetaat ti pawenal pa peemaamane pa péefulii pa ti hilim ha heesiiŋanee ha.
Hilim ha heesiiŋanee ha niŋ kaamuuyen
7Pikee pa an nene asok: “Fo hilim ha heesiiŋanee ha kaamuuyen?” Haani, hitaakiit! Pale hikina hiwune inci ímmeyi weyme uyem kaamuuyen. Kaatuko niŋ hilim ha heesiiŋanee ha hisokut: “Timpi siiŋan níkini ti waah uti an,”#Efúlii 20:17 inci anti méyiyaati weyme uyem kaasiiŋan níkin ti waah uti an. 8Pale kaamuuyen, naanaaco ti hilim ha heesiiŋanee ha, ápihinam pisiiŋan níkinam ti hícump waah. Niŋ hilim ha heesiiŋanee ha hínum hitaakiit, kaamuuyen atataak sempe. 9Púcook pa, inci peeloot méyi hilim ha heesiiŋanee ha, yenaayeno kaloŋa. Pale ta hilim ha heesiiŋanee ha níhicolii ta, kaamuuyen náayenoonii kaloŋa, 10inci inket. Hilim ha heesiiŋanee ha heeñaŋe ha íhinu pakan paka kapuloŋ, níhihinam piyeno an eekete. 11Kaatuko kaamuuyen, naanaaco ti hilim ha heesiiŋanee ha apicaakoolam, apan naamukam pínapii ti oom hilim heesiiŋanee. 12Ooto hilim ha heesiiŋanee ha heekuule, apan heekiicee ha teeho púlooŋ heekuule, nihicoonool nihinap.
13Pikee pa an nene asok: “Fo hilim ha heesiiŋanee ha heenape ha hiwune inci inket?” Haani, hitaakiit! Pale kaamuuyen, ánapiyoonap ti heenape ha ancuk kati amukam. Fiyuu hilim ha heesiiŋanee ha níhihine unaa úpumeyiyaa weyme uyem kaamuuyen, niŋ fa kaamuuyen naahaŋe fa káanapaati waah óo waah.
14Uméyiyaameyi nii hilim ha heesiiŋanee ha, ti Pútuun pa níhifulii. Pale inci an kenseŋ, apan íyyemi lompo amiikan ati kaamuuyen. 15Kaatuko inci míit eeha inci ínhin ha: hínantoo eeha inci íllafiye ha íhinu, pale heenaput ha eeha inci innate ha, hikina inci ínhin. 16Apan iyyema inci hínaa eeha íllafiit ha, incoon nii hilim ha heesiiŋanee ha hinapaanap. 17Ooto fiye inci tom ínhin ho, pale kaamuuyen ka keekine ka ti inci. 18Inci méyimeyi nii panap akinut ti inci, ekina eyem panap akinut ti kunuuwam keenaput ka. Pánipani inci láfilafi íhinu heenape, pale taakut sempe sa. 19Kaatuko heenape eeha inci íllafi ha íhinu, hínantoo ho, pale heenaput eeha inci íllafiit ha, hikina inci ínhin. 20Apan niŋ inci hínaa heenaput ha eeha inci íllafiit ha, ooto fiye inci tom ínhin ho, pale kaamuuyen ka keekine ka ti inci.
21Kaatuko eehe inci incuke: niŋ inci láfiyaa íhinu heenape, heenaput ha uuha niŋ inci. 22Inci taakaataak pásuuma ti yaanam ti hilim ha heesiiŋanee ha hiti Pútuun pa. 23Pale sikee sempe sitaakaataako ti inci, seekufut nii siti hilim ha heesiiŋanee ha, ínsiyemi ti pítaakool niŋ kunuuwam. Sempe ensuu ínsihinam amiikan ati kaamuuyen ka keeyem ka páhantuwayam. 24Ñiyema puume inci iyyem ti pikallo! Ayme akaakaayam kafakan ti enii eyye eeyemaam ya ti kátintiŋan ti eket? 25Usokaa Pútuun pa apalaka, peefakanaam pa pínapii ti Ateeteyo Yéesu Krista ati unaa!
Ooto ti ecohatoyam, inci amiikan ati hilim ha heesiiŋanee ha hiti Pútuun pa, pale ti kunuuwam keenaput ka, inci amiikan ati kaamuuyen.
Kuloonaay © Wycliffe Bible Translators, Inc. 2026.