Room 6
6
Fa nuuneetaataa fa fiye ti sempe sa siti kaamuuyen ka
1Pikee pa an naasok: “Fo efuutowiyaa ti kaamuuyen ancuk Pútuun pa píyisanaa panap etempo pihaŋhaŋ toko?” 2Haani, hitaakiit! Inkéyyoo ti kaamuuyen, uketaaket, uneetaataa fiye ti sempe etenko. Puume efuutowiyaa eloŋ tenko? 3Fo nímiit nii, unaa púlooŋ, ta nuunanfaa ta ti Yéesu Eenucee ya ti pátise ya, unanfaananf ti eket ya eteyoo? 4Ooto ti pátise nuuketaa neyoo, nuuhokee neyoo, ancuk samat nii fa Eenucee ya náalitaniyee fa ti eket ya pínapii ti hamake ha hiti Paapaa ya, unaa lompo núuyiniyaa hitaaku eloŋ éeyeeni.
5Kaatuko niŋ úyenooniyaa pakoonool neyoo ti eket ya eteyoo, efuuyeniyaa lompo pakoonool neyoo ti élitoonii ya eteyoo ti eket ya. 6Uméyiyaameyi nii kunuu unaa keemaamane ka kipempeŋee-pempeŋ neyoo ti kuluwaa ya, ancuk sempe sa siti kaamuuyen ka sípucaloolee ti sinii unaa, etinene uyeniyaa pimiikan pakati kaamuuyen. 7Kaatuko an óo an eekete, aneetaat fiye ti sempe sa siti kaamuuyen ka.
8Páawoo uketaaket neyoo, Eenucee ya, úyinanaayinan lompo nii efuuyeniyaa kaloŋa neyoo. 9Kaatuko úmeyiyaameyi nii Eenucee ya álitaniyeelitan ti eket ya, apan atinene aket. Eket ya etaakut nene sempe teyoo. 10Inkéyyoo ti kaamuuyen, aketaaket poonool kóŋ, pale ínkeyyoo ti Pútuun pa, oopa kaloŋa. 11Ooto aluu lompo níhin eehe: ínkeyyoo ti kaamuuyen, nicok faŋ aluu nii pakan keekete, pale ínkeyyoo ti Pútuun pa, nicok faŋ aluu nii pakan keeyem kaloŋa pínapii ti Yéesu Eenucee ya.
12Ooto timpi nikatan kaamuuyen kipitaak sempe ti sinii aluu seekaakaay sa eket, ancuk timpi nítunkee nípihin heenaput eeha ínsilafiye ha. 13Timpi niwufan sinii aluu ti kaamuuyen, samat nii pucoolaŋ piti íhinu heenaput. Pale niwufan so Pútuun pa samat nii pakan kéelitaniyee ti eket, inniwufan po faŋ aluu pántoon, samat nii pucoolaŋ piti íhinu heecoonoole. 14Kaatuko kaamuuyen etinene kitaak sempe ti aluu, kamma innineetaat keeyem ka ti hilim ha heesiiŋanee ha hiti Móyiis, pale keeyem ka ti panap pa empa Pútuun pa mpíyisane pa aluu.
Pimiikan Pútuun pa
15Páawoo uneetaataa ti hilim ha heesiiŋanee ha hiti Móyiis, pale ti panap pa piti Pútuun pa, pikee pa an naasok: “Fo cooneecoon kati umuuyenaa?” Haani, hitaakiit! 16Fo nímiit nii inniwufanaa faŋ aluu an, apan ínnituuloo, níyenooniyoo-yeno pimiikan pa pakateyoo? Fiye nisincan, manti niyeno pimiikan pakati kaamuuyen enka nkúcoopii ka eket, niŋ fotom inniyeno pimiikan pakati hítuulu Pútuun pa, apan mpucok aluu nii pakan keecoonoole. 17Pale usokaa Pútuun pa apalaka, kaatuko aluu keeyeniye ka púcook pa pimiikan pakati kaamuuyen, unka nicoke fiye kíp ti hítuulu pakalaŋanal empa innisayane pa. 18Aluu nineetaat fiye pimiikan pakati kaamuuyen, pale pimiikan pakati íhinu heecoonoole. 19Inci oopa ti káakup niŋ aluu púwiini kamma ínnituuniit, waah ewwe etuucaaŋ aluu taamanta an ayankananut aluu. Ti púcook pa inniwufanufan faŋ aluu samat nii pimiikan pakati íhinu heenaput niŋ heekuulut, ekina ewune innihaŋhaŋ toko ínnihine heenaput. Pale fiye, niwufan faŋ aluu samat nii pimiikan pakati íhinu heecoonoole, ancuk niyeniyaa ti eloŋ eekuule.
20Ta inniyeniye ta pimiikan pakati kaamuuyen, nikilincanoolutee nípihin heecoonoole. 21Eeheyme heenape innitaake ti heenaput eeha inniyeniye ha íhinu ti oom caanak? Eehuu fíyooy heesuuwanana ti aluu, kamma níhicoopii eket! 22Ooto nineetaat fiye ti sempe sa siti kaamuuyen ka, pale aluu pimiikan pakati Pútuun pa. Eeha innitaake ha po hiyem eloŋ eekuule, apan ti pikelan efinitaak eloŋ eepayantoo. 23Kaatuko cooy ya eti kaamuuyen ka eyem eket, pale eeha Pútuun pa mpuwufane ha haahaw hiyem eloŋ ya eepayantoo ya ti Yéesu Eenucee ya Ateeteyo ati unaa.
Kuloonaay © Wycliffe Bible Translators, Inc. 2026.