Room 5
5
Fa Yéesu náasuumiyanoole fa unaa niŋ Pútuun pa
1Páawoo Pútuun pa pucokaacok unaa pakan keecoonoole kamma núuyinanaa, ekina ewune kásuumaay nkitaako ti pututa unaa nempo, kamma Ateeteyo Yéesu Krista ati unaa. 2Akina ápankine unaa pítin pa, nuunakiyaa upuloŋaa ti panap pa piti Pútuun pa kamma núuyinanaa. Ti panap empuu nuusiiŋiyaa fiye kíp. Apan núumakiyanooliyaa ti cíki eyya nuutaakaa ya ti hamake ha hiti Pútuun pa. 3Eehuu lamma tom, pale núumakiyanooliyaa lompo niŋ ucukaa kúnuul, kamma nuumeyaa nii kúnuul nápukii kamukut, 4kamukut náapukii pútuuno piti an, pútuuno náapukii cíki. 5Apan cíki eyyuu etewas unaa ñusuu, kaatuko Pútuun pa puwasaawas pálafi etempo ti saan unaa, pínapii ti Kunuu ka keenape ka enka mpuwufane ka unaa.
6Pánipani, ta nuuyinaataa ta efakanoolo, Eenucee ya ati Pútuun pa naakete ti putum pumuuyena pa. Ahínaahin eehuu ti hinoom eeha Pútuun pa mpisiiŋane ha. 7Loomut aapucuk an naakete ti putum akee, háati oom akee naayeno eecoonoole. Pikee pa an náahaañi eket ti putum an eenape. 8Pale Pútuun pa fiye mpíyisane fa mpílafiye fa unaa: ta nuuyeniyaa ta pumuuyena, Eenucee ya naakete ti putum unaa.
9Hísim ha hiteyoo hiwune Pútuun pa mpucok fiye unaa pakan keecoonoole. Ooto puume conko etuufakanee ti káñiken ka kiti Pútuun pa pínapii teyoo? 10Unaa uyeniyaayeno pikamool Pútuun pa; pale núusuumiyanoolee nempo pínapii ti eket ya eti Añii etempo. Páawoo úsuumiyanoolee-súumiyanool nempo pínapii ti eket ya eteyoo, puume conko etuufakanee pínapii ti eloŋ ya eteyoo? 11Eehuu lamma tom, pale núumakiyanooliyaa ti Pútuun pa kamma Ateeteyo Yéesu Krista ati unaa, éesuumiyanoole ya unaa nempo.
Ataam niŋ Eenucee ya
12An oonool lamma ácoopii kaamuuyen ti púlunta empe, akina ayem Ataam; púful toko, eket néecolii pínapii ti kaamuuyen. Fiyuu eket néekeyii ti pakan paka púlooŋ kamma pakan paka púlooŋ nkamuuyene.
13Uméyiyaameyi nii, kaamuuyen ayenaayeno ti púlunta empe le niŋ Pútuun pa efipuwufan Móyiis hilim ha heesiiŋanee ha. Ti oom caanak, páawoo hilim ha heesiiŋanee ha peeloot hitaako, Pútuun pa pucokut umuuyen wa. 14Pale kápiliŋ ti caanak ca citi Ataam fo ti caanak ca citi Móyiis, eket ya ecukaacuk nii amansa eetaake sempe. Neemukal pakan paka púlooŋ, háati keemuuyenut ka samat nii Ataam, éetuulut ya eeha Pútuun pa mpusokoo ha.
Ataam ayeniye anakool a ati eeñaŋe ya ékey. 15Pale kaamuuyen ka kiti Ataam kilehut nii eeha Pútuun pa mpuwufan ha haahaw. Páni, hícump pakan kakete kamma kaamuuyen ka kiti an a oonool a aŋe. Pale Pútuun pa, panap empa mpíyisane pa pihaŋa pafom, apan eeha mpuwufane ha haahaw hícump pakan pínapii ti an oonool, eeyem ya Yéesu Krista, ihaŋa pafom meemak. 16Fo lompo incuke, eeha Pútuun pa mpuwufane ha haahaw hilehut nii héefulii ha ti kaamuuyen ka kiti an oonool. Kíiti ya enapanaanapan kaamuuyen koonool, neewun Pútuun pa mpisiiŋan pakan paka ti pisiya, pale eeha Pútuun pa mpuwufane ha haahaw nihinapan hícump umuuyen, nihiwun mpucok pakan paka nii keecoonoole. 17Pánipani an oonool amuuyene, apan eket ya neeyeno amansa ati hícump pakan kamma an a oonool a aŋuu. Pale kamma an oonool, Yéesu Krista, eeha nuutaakaa ha ihaŋa meemak. Keesaye ka panap pa penfakat pa piti Pútuun pa, Pútuun pa efipucokii nii pakan keecoonoole, efikaloŋ nkayeno pumansa kamma Yéesu Krista.
18Ooto samat nii fa Ataam kaamuuyen ka kiteyoo koonool ka nkuwune fa pakan paka púlooŋ kasiiŋanee ti pisiya, fo lompo pawenal pa poonool pa piti Yéesu Krista peecoonoole pa mpuwune Pútuun pa pupucok pakan paka púlooŋ nii keecoonoole, páhin empuu mpuwufanii eloŋ. 19Fa káatuulaati ka kiti an oonool nkuwune fa hícump pakan kapiyeno pumuuyena, fo lompo incuke hítuulu ha hiti an oonool hiwune hícump pakan kápiyenoonii keecoonoole.
20Hilim ha heesiiŋanee ha hiti Móyiis hisiiŋanee-siiŋan ancuk kaamuuyen kati kihaŋ toko nkimeeŋe. Pale la kaamuuyen nkimeeŋe, panap empa Pútuun pa mpíyisan pa mpihaŋhaŋ toko epenano. 21Fiyuu, samat nii fa kaamuuyen naataake fa sempe ti pakan paka náacoopii eket, fo lompo panap empa Pútuun pa mpíyisane pa mpitaak sempe siti hicoku pakan nii keecoonoole. Eehuu hiwune núuyiniyaa hinapu ti Ateeteyo Yéesu Krista ati unaa uputaakaa eloŋ eepayantoo.
Kuloonaay © Wycliffe Bible Translators, Inc. 2026.