Room 4
4
Pútuun pa hicoku etempo Abraham eecoonoole
1Nisincan ti maamaa ati unii Abraham. Weyme utaakiyoo? 2Niŋ Pútuun pa pucokaacok Abraham nii eecoonoole kamma waah ewwa náahine wa, anti ataak hínum la áfaasik ápiseepinoolo, pale hátikin Pútuun pa tom. 3Weyme hilim ha hiti Pútuun pa nihisoke kiti eehe? Hisok: “Abraham áyinanaayinan ti Pútuun pa ekina ewune Pútuun pa mpucokoo nii eecoonoole.”#Púcook 15:6
4Niŋ an áhinaa, nacooyeecooy. Cooy eyyuu eneetaat eti haahaw pale eteyoo. 5Pale niŋ an áhinut, apan náayinan ti Pútuun pa peecoke pa pumuuyena pa nii keecoonoole, káyinan ka kiteyoo nkuwun Pútuun pa kati pucokoo nii eecoonoole. 6Dawid lompo naasok hoonool hoonool huu, ta náakupe ta kiti hiyihu ha hiti an aŋa Pútuun pa mpucoke nii eecoonoole peesincanut eeha náahine ha. Asok:
7 “Kayihaayih poko payenka Pútuun pa mpuponkete ka umuuyen wa uteyii,
payenka Pútuun pa mpifiile ka heenaput eeha nkáhine ha.
8 Ayihaayih an aŋa Ateeteyo naacokut umuuyen wa uteyoo.” #
Kícimu 32:1-2
9Fo hiyihu eehuu, hiti keenakanee ka lamma? Fo neetaat lompo hiti keenakanutee ka? Usokaasok ho hínum: Abraham káyinan ka kiteyoo kuwune Pútuun pa mpucokoo nii eecoonoole. 10Eehuu teyme nihitaakiye? Fo ta Abraham naanakiye ta? Niŋ fotom fo akina peenakiit? Ee, Pútuun pa pucokoocok nii eecoonoole akina peeloot anako. 11Púful toko, Pútuun pa mpusokoo anakanee. Kanakan enkuu kiyem lánkamaasi ya éeyisane ya nii Pútuun pa pucokoocok nii eecoonoole kamma káyinan ka kiteyoo, apan ti oom caanak akina peeloot anako. Fiyuu Abraham náayenoonii paapaa ya ati pakan paka púlooŋ kéeyinane ka ti Pútuun pa poko peenakiit. Ancuk poko púlooŋ lompo, Pútuun pa mpucokii nii keecoonoole. 12Abraham lompo ayem paapaa ya ati keenakiye ka, pale keenakiye ka tom púlooŋ, keenakiye ka lamma kéeyinane ka ti Pútuun pa, samat nii fa maamaa ati unii Abraham mpáahin fa akina peenakiit.
13Pútuun pa mpusok Abraham nii, akina niŋ miin ma miteyoo, efipuwufanii púlunta pa ancuk piyeniyaa piteyii. Pusokaasok eehuu neetaat kamma Abraham náatuule hilim ha heesiiŋanee ha, pale kamma Pútuun pa faŋ etempo mpucokoo nii eecoonoole pínapii ti káyinan ka kiteyoo. 14Iyyema keeyem ka ti hilim ha heesiiŋanee ha lamma kañaŋe hitaaku eeha Pútuun pa mpíyinanane ha, ooto káyinan waah tom, apan eeha Pútuun pa mpíyinanane ha, hitaakut nafaa. 15Hilim ha heesiiŋanee ha hiwune Pútuun pa mpíñiken ti pakan paka kamma nkátuulut ho. Pale la taakut hilim heesiiŋanee, toko lompo taakut kaamuuyen.
16Ooto káyinan kuwune nuukaakaayaa hitaaku eeha Pútuun pa mpíyinanane ha unaa. Ekina éyisane nii, Pútuun pa, ti panap etempo mpuwufane unaa eehuu haahaw. Fiyuu inhiina unaa hat nii, Abraham keesokoo púlooŋ maamaa efikataak ho. Neetaat nii pakati hilim ha heesiiŋanee ha lamma efikataak ho, pale focaa lompo keetaake ka káyinan ka kiti Abraham. Akina ayem paapaa ya ati unaa púlooŋ, 17samat nii fa inkiicee fa ti hilim ha hiti Pútuun pa, hisok: “Inci fáhini faaf ati písii peemeeŋe.”#Púcook 17:5 Abraham ayem paapaa ya ati unaa ti ñíkin Pútuun pa empa náayinane pa tempo. Pikina péelitanii pa keekete ka, mpiliil waah weetaapala uliilee.
18Abraham naataak cíki la cíki neetaakiit, apan náayinan. Fiyuu náayenoonii faaf ati písii peemeeŋe, samat nii Pútuun pa fa mpusokoo fa: “Keesokuu maamaa fiyuu efikameeŋ.”#Púcook 15:5 19Ta Pútuun pa mpusokoo ta eehuu, Abraham ti máamun sitiil keme. Náameyi nii waah utowiitoo fo eket, apan aaloo Sara eemaamane, náayemi lompo caakonta. Háati fo, Abraham ataapala álakum ti káyinan ka kiteyoo. 20Ayékuniit káyinan ti Pútuun pa, ataakut lompo kunuu kúsupak ti eeha mpíyinananoo ha. Pale káyinan ka kiteyoo nkihaŋ toko nkitaake sempe, náamakiyan Pútuun pa. 21Híiniyoohiini hat nii Pútuun pa éfipiyini íhinu eeha mpíyinananoo ha. 22Ekina ewune Pútuun pa mpucokoo nii eecoonoole. 23Pale kilim enke: “Pútuun pa mpucokoo nii eecoonoole,” kikiicutee Abraham lamayoo. 24Kikiiceekiic lompo unaa payenka Pútuun pa efipucok ka nii keecoonoole, unaa kéeyinanaa ka ti Pútuun pa péelitanii pa Ateeteyo Yéesu ati unaa ti eket ya.
25Umuuyen wa uti unaa uwune naawufanee apumukee, hicokuyee ha hiti unaa nii keecoonoole hiwune náalitaniyee.
Kuloonaay © Wycliffe Bible Translators, Inc. 2026.