Room 3
3
Pucoonool pa piti Pútuun pa
1Pikee pa akee naasok: “Páawoo kanakan awunut Pútuun pa mpifakan unii, Pusuwif pa, ooto weyme Pusuwif pa nkataake pihaŋ keeneetaat ka Pusuwif?” 2Inci fañahan oom an a nii: “Hícump ti waah óo waah!” Héeyaañe ha hiyem, hilim ha hiti Pútuun pa, ti Pusuwif pa nihiñomanee. 3Pale hícump Pusuwif káyinanut Pútuun pa kátuulut po lompo. Fo káayinanaati ka kiteyii efikuwun Pútuun pa lompo étipihin eeha mpíyinanane ha? 4Haani, hitaakiit! Háati pakan paka púlooŋ nkáyemi ñincaama, ekina ekitut Pútuun pa piyeno tooñaa. Pánipani, kiiceekiic ti hilim ha hiti Pútuun pa, hisok:
“Niŋ áakupaa, pakan paka púlooŋ éfikameyi nii tooñaa,
apan niŋ an anookuu ti kíiti, aafaheekoo.” #
Kícimu 51:4
5Niŋ káacoonooliyaati ka kiti unaa kíyisanaa pucoonool pa piti Pútuun pa picaaŋ cataŋ, ooto weyme efuusokaa? Fo Pútuun pa pucoonoolut, niŋ píñikenaa ti unaa? (Inci oopa ti káakup niŋ aluu samat nii fa pakakee paka nkákup fa.) 6Hankaay, peecoonoole! Niŋ Pútuun pa pucoonoolut, puume éfipiyini íhinu kíiti púlunta pa? 7Pale pikee pa akee naasok: “Niŋ kincaam enka inci incaam ka kíyisanaa picaaŋ cataŋ tooñaa ya eti Pútuun pa, apan nkipenan kámakiyan etempo, ooto weyme uwune Pútuun pa kati pisiiŋanam ti pisiya samat nii amuuyena?” 8Pale niŋ úkupaa fiyuu, weyme uwune etuusokaa: “Uhínaa heenaput ancuk heenape hífuliyoo teeho”? Pakakee paka nkateñal unaa, kapusok nii fiyuu nuukalaŋan pakan paka. Kaasiiŋanee ka kiteyii ti pisiya keecoonoole.
Káataakiyaati an eecoonoole
9Ooto weyme? Fo unii Pusuwif pa uhaŋa keeneetaat ka Pusuwif? Haani, hitaakiit! Kaatuko payaapa káyisan nii Pusuwif pa niŋ keeneetaat ka Pusuwif kalehaaleh ti kaamuuyen. 10Samat nii fa inkiicee fa ti hilim ha hiti Pútuun pa nii:
“Taakut an eecoonoole, háati an oonool.
11 Taakut an eetaake kunuu,
taakut an eeŋese Pútuun pa.
12 Pakan paka púlooŋ kalincaalinco,
nkápuco ti coonool.
Taakut an aŋa náhin heenape, háati oonool.” #
Kícimu 14:1-3; 53:1-3; Ekelesiyas 7:20
13 “Kilim ka kiteyii nkihaaŋo samat nii kiyaak kéepankinee,
kíleeluufuyii, nkacaakool nenko pakan.” #
Kícimu 5:9
“Kuna eti ufepa néeyemi ti kipinii.” #
Kícimu 140:3
14 “Ñutumii iññimeeŋ hiñanu niŋ paseeña.” #
Kícimu 10:7
15 “Wootii nuucas, iyyema pikaayu himuku an.
16 Pan óo pan nkakaaye,
nkakat toko sisok nkápucalool.
17 Kámiit pítin pa piti kásuumaay ka.” #
Esayi 59:7-8
18 “Ñíkinii iññisuuc hátikin Pútuun pa.” #
Kícimu 36:1
19Fiye, úmeyiyaameyi nii waah óo waah ewwa hilim ha heesiiŋanee ha hiti Móyiis nihisoke, hisokaasok ho ti keeñaŋe ho ka hítuulu, ancuk an atataak la áfaatii hátikin Pútuun pa, incaaŋ cataŋ nii pakan paka púlooŋ kanowaanow tempo. 20Kaatuko íhinu eeha hilim ha heesiiŋanee ha nihisoke ha, hiwunut Pútuun pa mpucok an samat nii eecoonoole. Pale eeha hilim ha heesiiŋanee ha nínhin ha hikina hiyem, íhinu pakan paka kati kámeyi nii kamuuyenaa-muuyen.
Pacokal Pútuun an nii eecoonoole
21Pale fiye, Pútuun pa píyisanaayisan fa efipucok fa an nii eecoonoole peenaput ti hilim heesiiŋanee ha hiti Móyiis. Antúŋ púpukoo pa piti hilim ha heesiiŋanee ha niŋ piti piyaamakoola pa pakati Pútuun pa picempesaa-cempes eehuu. 22Pakan paka payenka Pútuun pa mpucoke ka nii keecoonoole, poko kayem kéeyinane ka púlooŋ ti Yéesu Krista. Pínapii ti káyinan ka kiteyii Pútuun pa mpucokii nii keecoonoole. Pakan paka púlooŋ kalehaaleh, 23kaatuko poko púlooŋ keemuuyene, kayinaat hicuku nii Pútuun pa. 24Pale Pútuun pa, ti panap etempo, mpucokii pakan keecoonoole. Mpíhin ho haahaw pínapii ti Yéesu Eenucee ya, eenoome ya pakan ti himiikanate ha hiti umuuyen wa uteyii. 25Pútuun pa púpoñiyoopoñ Eenucee ya apiyeno kaawaaseen ka, ancuk hísim ha hiteyoo hífulanaa umuuyen wa uti pakan paka kéeyinane ka teyoo níhisuumiyanoolii nempo. Pútuun pa píhinaahin eehuu pípiyisan pakan paka fa mpiyem fa peecoonoole. Kaatuko ti púcook pa, umuuyen ewwa pakan paka nkáhine wa, mpíhin fiye nii pucukut wo kamma mpumukute ti hítuulu. 26Pale kaawaaseen enkuu kíyisanaayisan fiye fa mpiyem fa peecoonoole. Fiyuu mpiyem peecoonoole te mpucok an óo an éeyinane ti Yéesu Krista nii eecoonoole.
27Fo towaatowo heewune an kati ámakiyanoolo? Haani, háati hoonool hitaakiit! Weyme uwune? Fo hítuulu ha hiti unaa hilim ha heesiiŋanee ha hiwune? Haani. Káyinan ka kiti unaa kuwune. 28Nuusokaasok nii Pútuun pa pucokaacok an nii eecoonoole kamma káyinan ka kiteyoo ti Yéesu Krista, pale neetaat kamma náatuule hilim ha heesiiŋanee ha hiti Móyiis. 29Niŋ fotom, fo Pútuun pa piti pakati Pusuwif pa lamma? Fo pineetaat lompo Pútuun pa piti keeneetaat ka Pusuwif? Ee, pikina Pútuun pa piteyii lompo, 30kaatuko Pútuun poonool lamma pitaakiye. Efipucok Pusuwif pa nii keecoonoole kamma káyinan ka kiteyii, mpucok lompo keeneetaat ka Pusuwif nii keecoonoole kamma káyinan ka kiteyii koonool kuu. 31Fo hisoku nuuyaakeyaa nii, hilim ha heesiiŋanee ha hitaakut nafaa kamma káyinan ka? Haani, hitaakiit! Káyinan ka kuwune nuusokaa nii, hilim ha heesiiŋanee ha hitaakaataak nafaa.
Kuloonaay © Wycliffe Bible Translators, Inc. 2026.