Room 2
2
Pútuun pa fa éfipihin kíiti pakan paka
1Ooto awe, aŋa ínhin ya kíiti pakakee paka, aataakut la áafatii hátikin Pútuun pa. Niŋ áahinaa kíiti akee, faŋi ánhine kíiti, kaatuko ánninhinhin waah ewwa nkáhin wa lompo. 2Uméyiyaameyi nii Pútuun pa mpíhinhin kíiti pucoonool payenka nkáhin ka waah ewwuu. 3Ooto awe aŋa nínhin ya kíiti payenka nkáhin ka waah ewwuu, háati fa awe nínhin fa moonool moonool muu, fo cukuucuk nii aafafak, niŋ Pútuun pa píhinaa kíiti pakan paka? 4Niŋ fotom fo áawiiniyanaa-wíiniyan hisaanumate ha hiti panap pa piti Pútuun pa niŋ hiti kamukut etempo ti hítuulu? Fo áawiiniyanaa-wíiniyan po kamma mpihiliikanut íhinuyi kíiti? Fo áamiit nii panap pa piti Pútuun pa piñaŋuu hítunku áapuwunko páhinali peenaput pa?
5Pale aayankaayank ekun, apan áalafiit púwunko umuuyen wa utii. Kamma eehuu, Pútuun pa mpíñiken ti awe pihaŋhaŋ toko. Iyyémi ti káacumpool faŋi káñiken ka kiti Pútuun pa, fo ti hinoom eeha Pútuun pa mpikaakaay ta káyisan káñiken etempo niŋ kíiti etempo eecoonoole ya. 6Efipucooy an óo an ti páhinaloo. 7Pútuun pa efipuwufan eloŋ eepayantoo payenka nkamukut ka ti íhinu heenape. Fiyuu nkaŋes Pútuun pa kati pímakiyanii mpúmulii mpuwufanii eloŋ eepayantoo. 8Pale keeyem ka ti páhaŋool apan nkapook tooñaa ya nkanapan heenaput, éfipiyisanii káñiken etempo kenfakat ka. 9An óo an aŋa náhin heenaput, efikacuk kúnuul niŋ ñíseeña, píyaañ ti Pusuwif pa puwant ti keeneetaat ka Pusuwif. 10Pale an óo an aŋa náhin heenape, Pútuun pa éfipimakiyanoo, mpúmuloo, mpuwufanoo kásuumaay, píyaañ ti Pusuwif pa puwant ti keeneetaat ka Pusuwif. 11Kaatuko Pútuun pa pifisakanoolantoo an.
12Keeneetaat ka Pusuwif, niŋ kamuuyenaa, nkáhinhin ho péemiit hilim ha heesiiŋanee ha hiti Móyiis. Pútuun pa éfipihinii kíiti peenaput ti hilim ha heesiiŋanee ha hiti Móyiis. Pale Pusuwif pa, keetaake ka hilim ha heesiiŋanee ha, éfikahinee kíiti pínapii ti hilim ha heesiiŋanee ha niŋ kátuulut ho. 13Kaatuko payenka nkásiitan ka hilim ha heesiiŋanee ha kenseŋ, kaneetaat keecoonoole hátikin Pútuun pa. Haani! Payenka nkáhin ka eeha nihisoke ha, poko kayem keecokee ka nii keecoonoole. 14Pakan paka keeneetaat ka Pusuwif, kéemiit ka hilim ha heesiiŋanee ha hiti Móyiis, niŋ káhinaa eeha hilim ha heesiiŋanee ha nihisoke ha, háati fa nkámiit ho fa, káyisanaayisan nii kámeyimeyi ti kunuuwii eeha nkañaŋe ha íhinu. 15Fiyuu nkáyisan nii eeha hilim ha heesiiŋanee ha nihisoke ha an áhin hikiiceekiic ti saanii. Kunuuwii lompo nkíyisan nii eehuu hiti pánipani, kaatuko kunuuwii nkusokii kiti eeha nkayem ha ti íhinu nii heenape, man heenaput. Pámiiloolalii lompo, pikee pa mpunookiinook, pikee pa mpisiiŋiyii. 16Eehuu efihicukee picaaŋ cataŋ ti hinoom eeha Pútuun pa éfipihin ha kíiti pakan paka. Ti hinoom eehuu, heeyolee ha hiti pakan paka mpikaakaay íhinu kíiti, pínapii ti Yéesu Krista, samat nii fa ekooŋan ya éesuume ya eyya inci íntuunan ya neesoke fa.
Pusuwif pa niŋ hilim ha heesiiŋanee ha hiti Móyiis
17Fiye inci oopa ti káakup niŋ awe, awe eesoke ya nii awe Asuwif, intaak cíki ti hilim ha heesiiŋanee ha hiti Móyiis, ímmakiyanoolo kamma ayyem ti payenka Pútuun pa mpimamale ka. 18Aámeyimeyi eeha Pútuun pa mpílafiye ha, apan hilim ha heesiiŋanee ha nihikalaŋani aakati kiiw heehaŋe ha panap eeha an naañaŋe ha íhinu. 19Aacokaacok faŋi nii átintiŋana kéefuume ka, niŋ ecaaŋ ti keeyem ka ti énimaan. 20Incokoolo lompo nii átintiŋana pusoŋ pa niŋ akalaŋana epuuk ya, kaatuko áayinanaayinan nii hilim ha heesiiŋanee ha híyisanuuyisan kameye ka niŋ tooñaa ya picaaŋ cataŋ. 21Ooto awe aŋa inkalaŋan a pakakee paka, fo aakalaŋanantoo faŋi? Awe eeyem a ti káatuunan nii an añaŋut káalipu, fo álliplip? 22Awe aŋa eeyem a ti káatuunan nii an añaŋut pihinto niŋ aal eenimiye, fo anhintohinto niŋ pakaal keenimiye? Awe aŋa eesoke ya nii aanataanat pínaati, fo álliplip ti pínaati pa la nkawaaseen la? 23Awe aŋa nímmakiyanoolo ya nii áameyimeyi hilim ha heesiiŋanee ha hiti Móyiis, ansuuwansuuwan Pútuun pa, kamma ántuulut ho. 24Kaatuko kiiceekiic ti hilim ha hiti Pútuun pa, hisok: “Keeneetaat ka Pusuwif nkateñalteñal caacaw ca citi Pútuun pa kamma aluu.”#Esayi 52:5
25Ti miin ma miti Pusuwif pa, kanakan ayem waah ewwa aññaŋe íhinu, naanapanaa eeha hilim ha heesiiŋanee ha nihisoke ha. Pale awe eenakiye ya, náatuulut hilim ha heesiiŋanee ha, cukaacuk fiye nii eenakiit. 26An óo an eeneetaat Asuwif, ekina eyem an eenakiit, niŋ áhinaa samat nii fa hilim ha heesiiŋanee ha nihisoke fa, fo Pútuun pa etipucokoo nii an eenakiye? 27Aŋa eenakiit a apan náhin eeha hilim ha heesiiŋanee ha nihisoke ha, afaanooki, awe Asuwif a. Kaatuko háati fa annakanee fa te intaak hilim ha heesiiŋanee ha, áatuulut ho.
28Hipukuyee Asuwif hiwunut an naayeno Asuwif pánipani, kanakan enka nkucukee ka ti enii kuwunut kanakan nkiyeno kiti pánipani. 29Pale Asuwif pánipani ayem Asuwif páhantuwayoo, kanakan pánipani ayem kanakan kiti yaan. Kanakan enkuu kéefulii ti Kunuu ka keenape ka kiti Pútuun pa, pale kúfuliyoot ti hilim ha heesiiŋanee ha heekiicee ha. Asuwif a pánipani aŋuu, Pútuun pa mpúmuloo, pale neetaat pakan.
Kuloonaay © Wycliffe Bible Translators, Inc. 2026.