Room 1
1
Kakican ka
1Inci Póol, amiikan ati Yéesu Eenucee ya, yem ti hikiicu leetal eyye, kicanaa aluu. Pútuun pa piyonkalaam-yonkal kati yeno apoñapoñ, mpiyenanam ti kaapii kati túunan ekooŋan etempo éesuume ya. 2Ekooŋan eyye mpifiyye mpíyinanane pínapii ti piyaamakoola etempo ti hilim etempo heesampanee ha. 3Ekooŋan eyyuu, ékupaakup kiti Añii etempo, éefulii ya ti miin ma miti amansa ya Dawid ta náayenoonii ta an. 4Apan pínapii ti Kunuu ka keenape ka enka nkukuulan ka unaa, Pútuun pa mpisiiŋanoo apiyeno Añii etempo eetaake ya sempe, ta náalitaniyee ta ti eket ya. Akina ayem Yéesu Krista Ateeteyo ati unaa. 5Akina awune Pútuun pa mpisampan unii upuyeno pupoñapoñ, mantefa núuhin pakati púlunta pa púlooŋ káputuul po kamma nkáyinane po. Eehuu núuhin ancuk caacawoo císiyyaa. 6Aluu lompo unka ti pakan paka payenkuu, payenka Pútuun pa mpiyonkale ka kati kayeno pakati Yéesu Krista.
7Inci oopa ti hikiicu aluu púlooŋ keeyem ka Room payenka Pútuun pa mpílafiye ka, apan mpiyonkal aluu nipiyeno pakan etempo keesampanee ka. Alímaati Pútuun pa Paapaa ati unaa niŋ Ateeteyo Yéesu Krista kasampan aluu, nkawufan aluu kásuumaay.
Póol pálafi pa piteyoo pikaayu hiyoop kéeyinane ka pakati Room
8Píyaañ pusok Pútuun pa piti unaa apalaka kamma aluu púlooŋ pínapii ti Yéesu Krista, kaatuko káyinan ka kiti aluu nkúkupeekup pan óo pan ti púlunta pa púlooŋ. 9Pútuun pa, empa inci iyyem pa ti páhin niŋ kunuuwam púlooŋ, ti káatuunan ekooŋan ya éesuume ya eti añii etempo, pímeyimeyi nii, inci yékuniit po kaluum kiti aluu. 10Tan óo tan ta inci iyyeniye kaluum, illuum Pútuun pa nii, niŋ súumaa po, mpípankinam pítin kati yíni ékey hiyoop aluu ti pikelan. 11Kaatuko inci láfilafi meemak ékey hicuku aluu, íncoopii aluu kaasampan kéefulii ti Kunuu ka keenape ka, ancuk káyinan ka kiti aluu kitaakaa sempe. 12Ekina eyem: láfilafi inci niŋ aluu kati uyankananoolaa upucokaa piliit kamma káyinan ka kutoom niŋ kiti aluu ka.
13Aluu pakanam ti káyinan, inci láfilafi kati nímeyi nii incokcok hinoom kati kéy hiyoop aluu, pale tan óo tan intaak waah weekalaam fo fiye. Illáfi páhin pa putoom kati pitaak papukal puu ti aluu samat nii fa mpitaake fa ti pikee písii pa. 14Inci an eeñaŋe káatuunan pakan paka púlooŋ ekooŋan ya éesuume ya, samat nii an eetaake nikopu. Intaak nikopu ti keelekoole ka niŋ keelekoolut ka, ti keecohatiye ka niŋ pusoŋ pa. 15Eehuu hiwune inhiliikan káatuunan ekooŋan ya éesuume ya ti aluu keeyem ka Room.
Sempe sa siti ekooŋan ya éesuume ya
16Inci suuwut káatuunan ekooŋan ya éesuume ya, kamma neeyem sempe sa siti Pútuun pa ensa insifakan sa an óo an éeyinane: píyaañ ti Pusuwif pa, puwant ti keeneetaat ka Pusuwif.#1:16 Niŋ ekina tom: “píyaañ ti Pusuwif pa, puwant ti Pikilek pa.” 17Páni ekooŋan ya éesuume ya éyisanaayisan fa Pútuun pa mpucok fa an nii eecoonoole: eehuu ti káyinan lamma. Ti káyinan níhicooke, ti káyinan efihikelan, samat nii fa inkiicee fa ti hilim ha hiti Pútuun pa. Hisok: “An eecoonoole, afaataak eloŋ pínapii ti káyinan ka kiteyoo.”#Hapakuk 2:4
Kaamuuyen ka kiti pakan paka púlooŋ
18Pútuun pa umpa ti káyisan púfulii alacana nii píñikenaañiken ti pakan paka kamma nkamuuyen nkapook po. Ti pawenalii peenaput pa nkahok tooñaa ya. 19Eeha an áfaayini ha kameye kiti Pútuun pa íhiiniyiihiini hat, kaatuko pikina faŋ etempo píhiiniyanii ho. 20Pánipani, kápiliŋ ta Pútuun pa mpiliile ta púlunta pa, pakan paka nkayina kameye puume mpucuke. An ayinaat po hicuku, pale niŋ utahaa kunuu ti waah ewwa mpiliile wa, efuucukaa picaaŋ cataŋ sempe etempo seepayantoo sa, niŋ pacuk etempo. Ooto pakan paka kataakut la éfikatii hátikin Pútuun pa. 21Kaatuko háati fa nkameya fa kiti Pútuun pa, kámulut po samat nii fa nkañaŋe fa, kasokut po lompo apalaka. Pale nkácim ti pámiiloolalii peetaakut pa nafaa, kunuuwii keesoŋiye ka lompo nkínim. 22Kacokoolaa-cokoolo nii keecohatiye, pale nkáyenoonii pusoŋ. 23Nkapook ékilipo hátikin hamake ha hiti Pútuun pa peeketantoo pa, pale nkákilipo hátikin kumuum keememanoolee, kiti pakan payenka efikaket, kiti pusuwa, kiti púlukuleen piti woot upaakiil, niŋ empa mpúhuunoolo.
24Ekina ewune Pútuun pa mpikatanii kápihin heekuulut ha eeha nkálafiye ha ti saanii, fo nkáhin ti pututayii heesuuwanana niŋ siniinii. 25Nkapook tooñaa ya eti Pútuun pa nkawufan faŋii ti kincaam. Nkákilipo hátikin waah ewwa mpiliile wa nkawaaseen wo lompo, nkakatan Pútuun pa Aliila ya peeñaŋee pa hímulu fo cancowiyaaw. Amíini.
26Ekina ewune Pútuun pa mpikatanii ti pacul pa peesuuwanana empa nkámiiloole pa ti kikawii. Pakaal paka nkakat pihinto niŋ pákayiin paka, kapica nkahinto aal niŋ aal, apan eehuu hiñaŋut pitaako. 27Pákayiin paka lompo nkakatan pihinto niŋ pakaal paka kapica nkahinto áyiin niŋ áyiin, nkásuuno ti pacul pa penfakat pa ti pákawiyii pákayiin, nkáhin heesuuwanana. Fiyuu nkasaye ti siniinii cooy ya eti pawenalii niŋ pámiiloolalii peenaput pa.
28Kamma nkámiiloolut nii, kameye Pútuun pa kitaakaataak nafaa, ekina ewune, Pútuun pa mpikatanii ti ecohato ya eteyii eetaakut ya nafaa kápihin waah ewwa nkañaŋut wa íhinu. 29Kunuuwii nkimeeŋ niŋ heecoonoolut, heenaput, pakanc niŋ pálafi hitaaku. Eloŋii neemeeŋ niŋ paheeka, kamukal pakan, páhaŋool, tapalee niŋ pafint kunuu. Nkáyemi púkuufa, 30púpucaloola pakan niŋ keenate Pútuun pa. Kátuulantoo an, kákulooliit apan nkamec, nkásuusi ti heenaput, kátuulut pupukayii. 31Kataakut hikaw, káhinantoo eeha nkasok ha, kálafiit an, apan kataakut paket hikaw. 32Nkámeyi meemak fa Pútuun pa mpikaakaay fa íhinu kíiti payenka nkawen ka fiyuu: payenkuu kañaŋa eket. Pale háati fa nkameya ho fa, káyekuniit íhinu eehuu, ínsuumii lompo ti payenka nkáhin ho ka.
Kuloonaay © Wycliffe Bible Translators, Inc. 2026.