Room 15
15
Ihínu héesuume ha pakakee paka
1Unaa kéetuuniyaa ka ti káyinan, uñaŋutaa hiŋes héesuume ha unaa, pale uñaŋaa kayankanan kéetuuniit ka. 2An óo an ti unaa aŋes íhinu héesuume ha pikinooloo, ancuk káyinan ka kiteyii kihaŋa nkitaake sempe. 3Kaatuko háati Eenucee ya aŋesut íhinu héesuumoo ha, samat nii fa inkiicee fa ti hilim ha hiti Pútuun pa, hisok: “Kateñal enka nkateñaluu ka, inci nkateñale.”#Kícimu 69:9 4Kaatuko heekiicee ha púlooŋ faw ti hilim ha hiti Pútuun pa, hikiiceekiic kati hikalaŋan unaa nihipenan kamukut ka kiti unaa, nihiyankanan unaa upusiiŋiyaa kíp. Fiyuu éfuuyiniyaa hitaaku cíki.
5Pútuun pa empa mpipenan pa unaa kamukut te mpiyankanan unaa upusiiŋiyaa kíp, álimaati píhin nípisiyool ti pámiiloolal poonool, samat nii fa Yéesu Eenucee ya náayisane fa aluu. 6Ancuk aluu, ti kunuu koonool niŋ ti hilim hoonool, ínniyini hímulu Pútuun pa, Paapaa ya ati Ateeteyo Yéesu Krista ati unaa.
Ekooŋan ya éesuume ya eti pakan paka púlooŋ
7Ooto nisayanool samat nii fa Eenucee ya naasayane fa aluu. Niŋ níhinaa fo, Pútuun pa éfipimakiyanee. 8Inci pusok aluu eehe: Eenucee ya ákeyyookey apiyeno áhina ati Pusuwif pa. Ahínaahin eehuu kati ahankan eeha Pútuun pa mpíyinanane ha símaamayii, náayisan nii eeha Pútuun pa mpusoke ha hiti tooñaa. 9Akéyyookey lompo ancuk keeneetaat ka Pusuwif kámulaa Pútuun pa, kamma paket hikaw etempo, samat nii fa inkiicee fa ti hilim ha hiti Pútuun pa. Hisok:
“Ekina ewune inci fámuli ti pututa keeneetaat ka Pusuwif,
incook ti caacawi.” #
2 Samiyel 22:50; Kícimu 18:49
10Nene hisok lompo:
“Aluu keeneetaat ka Pusuwif,
nitaak pásuuma ti coonool niŋ pakan paka pakati Pútuun pa!” #
Kakaman 32:43
11Nene hisok:
“Aluu púlooŋ keeneetaat ka Pusuwif, ninimpan Ateeteyo.
Nímuloo, aluu púlooŋ keeyem ka ti etaam ya.” #
Kícimu 117:1
12Esayi lompo asok ti hilim ha hiti Pútuun pa, nii:
“Akee áfaafulii ti miin ma miti Yesaay,
áfaalempii kati ayeno ati hikaw ha ati keeneetaat ka Pusuwif,
apan efikanaŋ teyoo cíki ya eteyii.” #
Esayi 11:10
13Alímaati Pútuun pa empa mpuwufan pa cíki, pimeeŋan aluu niŋ pásuuma penfakat niŋ kásuumaay kenfakat kamma ínniyinane tempo. Fiyuu, sempe sa siti Kunuu ka keenape ka éfisihin aluu nipihaŋhaŋ toko innitaake cíki fo muus.
Heewune ha Póol naakiic
14Aluu pakanam ti káyinan, inci híiniyaamhiini nii aluu keenape meemak, ínnimeyi heeñaŋee ha kameye, ínniyini lompo puwunool kunuu. 15Pale ti leetal eyye, inci oopa ti kánawunan aluu niŋ híyiinate ukee waah wa píhiini hat. Inci hínaahin eehuu kaatuko, Pútuun pa ti panap etempo mpíhinaam 16piyeno áhina ati Yéesu Eenucee ya ti keeneetaat ka Pusuwif. Páhin empa inci iyyem pa ti íhinu piti káatuunan ekooŋan ya éesuume ya, pucukaacuk nii piti awaaseena ati Pútuun pa, ancuk keeneetaat ka Pusuwif kayeniyaa pucuk fiye nii kaawaaseen kéesuume Pútuun pa, payenka Kunuu ka keenape ka nkukuulane ka.
17Ooto inci oopa ti emaayoolo ti páhin pa piti Pútuun pa empa inci ínhine pa, kamma Yéesu Eenucee ya. 18Kaatuko inci étihaañi hisoku waah niŋ neetaat eeha Eenucee ya náahine ha pínapii ti inci, ancuk keeneetaat ka Pusuwif kátuulaa Pútuun pa, pínapii ti kilim enka insoke ka niŋ ti pawenalam. 19Ahínaahin ho niŋ sempe siti hícump píyisan niŋ weecukantee, pínapii ti sempe sa siti Kunuu ka keenape ka kiti Pútuun pa. Fiye, lan óo lan la inci inkaaye, písik Jerusalem fo ti mah ma miti Ilili, inci túunanaatuunan pántoon ekooŋan ya éesuume ya eti Eenucee ya. 20Inci láfilafi kati túunan ekooŋan ya éesuume ya ti pisaatee pa empa ammeya pa nii an ásiit fala caacaw ca citi Eenucee ya, ancuk inci timpi siiŋan kiniŋ ka kutoom ti kiniŋ kúcook kiti akee. 21Inci hínaahin samat nii fa inkiicee fa ti hilim ha hiti Pútuun pa. Hisok:
“Kéetuunanutee ka kiteyoo efikacukoo,
keetaapala kási ka caacawoo, éfikameyi.” #
Esayi 52:15
22Eehuu nihiloomam kayokan, ekina ewune inci yinaat ékey puu ti aluu.
Póol pálafi pa piteyoo pikaayu Room
23Inci taakaa fiye sitiil píllafi ékey puu ti aluu hiyoop aluu. Pale fiye páawoo payaapa páhin pa putoom ti mah emme pe, 24niŋ súumaa ti Pútuun pa, fáŋoncii piyoop aluu niŋ yeniyaa pikaayu ti mah ma miti Españ, mantefa inniyankananam ti kaakaawool ka kutoom. Apan inci fakampan lati aluu ancuk kunuuwam kipepanaa caahinkiŋ fa íllafiye fa hicuku aluu. 25Pale la inci iyyem la le, oopa ti pikaayu Jerusalem picaawufan kawun pakan paka keesampanee ka pakati Pútuun pa keeyem ka po. 26Kaatuko kéeyinane ka pakati Masetoni niŋ pakati Akayi, katekoolaatekool ti pásuuma kati kawufan keeleke ka ti keesampanee ka pakati Pútuun pa keeyem ka Jerusalem. 27Poko katekoole ti pásuumayii, pale naasincanaa, kayekaniiyekan nikopu. Kaatuko Pusuwif pa kéeyinane ka ti Eenucee ya kayankanane keeneetaat ka Pusuwif kapitaak káyinan, fiye poko lompo keeneetaat ka Pusuwif kañaŋaa kayankanan Pusuwif pa niŋ hisaanumate ha hiteyii. 28Fiye niŋ inci payaa íhinu eehuu apan ínhin kata káputoohi kayankanan enke, inci fákey aluu hiyoop ti pikaayu pa putoom Españ. 29Híiniyaamhiini nii, niŋ inci kéyyoo puu ti aluu, inci fákey niŋ kaasampan kenfakat kiti Eenucee ya.
30Aluu pakanam ti káyinan, kamma Kunuu ka keenape ka nkíhine unaa úpulafooliyaa, ooto inci oopa ti piŋiino aluu eehe ti caacaw ca citi Ateeteyo Yéesu Krista ati unaa: Ninanfam ti kaañañatool ka kutoom ti kaluum Pútuun pa hak inci. 31Niluum ancuk inci fakaa ti kéeyinanut ka pakati mah ma miti Judaay, inniluum lompo keesampanee ka pakati Pútuun pa keeyem ka Jerusalem kati kataak pásuuma ti kawun enka inci íyyemiyii ka ti hicoopu. 32Ooto niŋ Pútuun pa pucoonaa, inci fákey puu ti aluu niŋ kunuu keemeeŋe niŋ pásuuma, íyyekunoolo lati aluu. 33Alímaati Pútuun pa empa mpuwufan pa kásuumaay, piyeno niŋ aluu púlooŋ. Amíini.
Kuloonaay © Wycliffe Bible Translators, Inc. 2026.