Room 16
16
Póol kakican ka kiteyoo pakati Room
1Ehe Feepe, ahoop unaa ti káyinan, ásisikana ati canku ya eti saatee ya eti Kenkele. Inci ñomanoo ti sipees aluu. 2Niwananoo pinap ti caacaw ca citi Ateeteyo samat nii fa keesampanee ka pakati Pútuun pa nkañaŋe fa íhinu. Niyankananoo ti waah óo waah ewwa naasoolahe ti aluu, kaatuko ayankananaa-yankanan hícump pakan, focaa inci lompo.
3Nikicanam Prisila niŋ Akilas, pákawiyam ti páhin pa piti Yéesu Eenucee ya. 4Kanaŋaanaŋ eloŋii fo ti putum eket kati kafakanam. Inci sokaa Pútuun pa apalaka kamma poko, apan neetaat inci lamayam: keeneetaat ka Pusuwif púlooŋ kéeyinane ka, kasokaa lompo apalaka kamma poko.
5Nikicanam lompo canku ya eyya neconcoolo ya ti ekumpaan ya eteyii.
Nikicanam Epenete, áwiyam aŋa inci íllafiye ya, eeyem a áyaañ a éeyinane ya ti Eenucee ya ti mah ma miti Asii.
6Nikicanam Mari, eeyoke ya meemak ti páhin pa piti aluu.
7Nikicanam Antolonikus niŋ Yuña pákawiyam Pusuwif, keeyeniye ka ti núkuluma niŋ inci. Kámeyiyeemeyi meemak ti páhin pa piteyii nii pupoñapoñ, apan nkátikinam piyeno kéeyinane ti Eenucee ya.
8Nikicanam Ampiliyaatus, áwiyam ti Ateeteyo aŋa inci íllafiye ya.
9Nikicanam Uupen, áwiyam ti páhin pa piti Eenucee ya, niŋ lompo áwiyam Sutakis, aŋa inci íllafiye ya.
10Nikicanam Apeles, éeyisane ya picaaŋ cataŋ nii áyinanaayinan ti Eenucee ya.
Nikicanam pakati miin ma miti Alistopul.
11Nikicanam Helotiyon, áwiyam Asuwif.
Nikicanam pakati miin ma miti Naasis kéeyinane ka ti Ateeteyo.
12Nikicanam pakaal paka payenke, Tilifen niŋ Tilifos, keeyem ka ti páhin Ateeteyo, niŋ lompo ahoopam ti káyinan Peesis, aŋa inci íllafiye ya, eeyoke ya meemak ti páhin pa piti Ateeteyo.
13Nikicanam Lufus, aŋa Ateeteyo naamamale ya, niŋ lompo íññaa ateyoo, eeyeniye ya lompo íññaa ti inci.
14Nikicanam Asunkilit, Felekon, Heemes, Patulopas, Heemas, niŋ kéeyinane ka púlooŋ keeyem ka neyii.
15Nikicanam lompo Filolok, Yuli, Nele niŋ ahoopoo, niŋ Olimpas, niŋ pakan paka púlooŋ keesampanee ka pakati Pútuun pa keeyem ka neyii.
16Nikicanool niŋ kaasumpool, samat nii fa kéeyinane ka nkáhin fa. Picanku pa púlooŋ piti Eenucee ya pikicanaa aluu.
Póol kawunoo kunuu kikelan pakati Room
17Aluu pakanam ti káyinan, inci ŋiiniyaa aluu eehe: nitah kunuu aluu ti payenka nkácoopii ka píkatinool ti pututa kéeyinane ka. Nkalincanii-lincan ti pakalaŋanalii peenapoolut pa niŋ eeha innikalaŋanee ha. Nílaaŋii, 18kaatuko pakan paka payenka fiyuu kaneetaat ti páhin Ateeteyo ati unaa Eenucee ya, pale kiti munowii nkayem ti páhin. Niŋ ñutumii ñeesuusa ña niŋ pákupalii péesuumanana pa nkacaakool kéeyiyiit ka. 19Pale aluu, an óo an ámeyimeyi nii nítuulaatuul Ateeteyo. Inci taakaataak pásuuma penfakat kamma aluu. Pale inci láfilafi kati nicohato épinnihin heenape, apan timpi ninakanoolo niŋ heenaput.
20Pútuun pa empa mpuwufan pa kásuumaay, toko fiye púpucaloolaa Seetaani ya t’etaam woot aluu.
Alímaati Ateeteyo Yéesu ati unaa asampan aluu.
21Timote, aŋa inci iyyem ya neyoo ti páhin, niŋ pákawiyam Pusuwif Lusiyus, Sason, niŋ Sosipatel kakicanaa aluu.
22Inci lompo Teetiyus, kicanaa aluu ti caacaw ca citi Ateeteyo, inci aŋa Póol naawufane ya pikiic kilim ka kiteyoo ti leetal eyye.
23Kayus akicanaa aluu. Inci Póol, lateyoo iyyem, apan lateyoo lompo canku ya púlooŋ nepaakool.
Elast aŋa namank ya mañ ma miti saatee ya, niŋ Kaatus an unaa ti káyinan, kakicanaa aluu. 24[#16:24 An ámiit man Póol lompo akiice fiye: Alímaati Ateeteyo Yéesu Krista ati unaa asampan aluu púlooŋ. Amíini.]
Kaluum ka kikelan ka
25Umúlaa Pútuun pa! Píyiniyini íhinu káyinan ka kiti aluu kipitaak sempe pínapii ti ekooŋan ya éesuume ya eyya inci íntuunan ya kiti Yéesu Krista. Ekooŋan eyye éyisane eeha Pútuun pa mpiyole ha púlunta pa píliilumee. 26Apan fiye Pútuun pa piti cancowiyaaw mpíhin ho hípimeyiyee pínapii ti eeha piyaamakoola pa nkakiice ha, mantefa písii pa púlooŋ mpútuul po kamma mpíyinane po. 27Alímaati Pútuun pa peecohatiye pa poonool pa, pitaak hamake ha fo cancowiyaaw, kamma eeha Yéesu Krista náahine ha. Amíini!
Kuloonaay © Wycliffe Bible Translators, Inc. 2026.