Room 14
14
Káahinoolaati kíiti
1Niwanan pinap kéetuuniit ka ti káyinan ka kiteyii, apan timpi níñakalool neyii ti eeha nkámiiloole ha nii heecoonoole niŋ fotom heecoonoolut. 2Akee káyinan ka kiteyoo kucoonoocoon kati ali waah óo waah, pale akee éetuuniit ti káyinan, aliyantoo efoofa. 3Aŋa nali ya waah óo waah añaŋut hítinu eeliyantoo ya waah óo waah. Aŋa eeliyantoo ya waah óo waah añaŋut íhinu kíiti aŋa nali ya waah óo waah, kaatuko Pútuun pa pisayanoosayan. 4Fo awe yem ayme aakati hín kíiti amiikan ati an? Ahámpaatiin a ateyoo ayina hisoku nii anowaanow, man anowut. Antúŋ atanow, kaatuko Ateeteyo áyiniyooyini íhinu ápunowaati.
5Pakakee paka nkámiilool nii hikee hinoom ihaŋa panap kikee ka, pakakee paka nkasok nii kunoom ka púlooŋ kilehe. An óo an, heeyem ha ti kunuuwoo hiñaŋoo pahiine. 6Niŋ an acokaa nii hikee hinoom ihaŋa kikee ka, áhinaahin eehuu kati ámakiyan Ateeteyo. Aŋa nali ya waah óo waah, áhinaahin ho kati ámakiyan Ateeteyo, kaatuko nasoksok Pútuun pa apalaka kiti waah ewwa nali wa. Apan aŋa eeliyantoo ya efoofa, áhinaahin ho lompo kati ámakiyan Ateeteyo, naalompo asok Pútuun pa apalaka kiti waah ewwa nali wa. 7An ti unaa añaŋut eloŋ hak faŋoo, an ti unaa lompo añaŋut eket hak faŋoo. 8Niŋ uloŋaa, uloŋaa hak Ateeteyo, niŋ uketaa, uketaa hak Ateeteyo. Ooto man me unaa unka kaloŋa niŋ fotom nuuketaa, unaa pakati Ateeteyo. 9Kaatuko eehe hiwune Eenucee ya naaket náalitoonii ti eket ya, kati ayeno Ateeteyo ati keeloŋe ka niŋ keekete ka.
10Ooto awe, weyme uwune ánhin kíiti pakani ti káyinan? Weyme uwune lompo ántinii? Unaa púlooŋ efuusiiŋiyaa hátikin Pútuun pa úpuhinee kíiti. 11Kaatuko kiiceekiic ti hilim ha hiti Pútuun pa nii:
“Inci Ateeteyo eeyem a kaloŋa, inci faŋam soke eehe:
'Káacuun óo káacuun éfikikilipo hátikinam,
híleeluuf óo híleeluuf efihisayan nihisok nii inci yem Pútuun pa.'” #
Esayi 45:23
12Ooto, an óo an ti unaa afaasok hátikin Pútuun pa eeha náahine ha.
Káanakanaati kéeyinane ka ti kaamuuyen
13Ooto úyekunooliyaa píhinool kíiti. Eehe nuuñaŋaa hicoku kíp: timpi úhinaa waah ewwa éfuuhin akee ti unaa apunow, ekina eyem, waah weekaakaay kanakan an ti kaamuuyen. 14Páawoo inci oonool niŋ Ateeteyo Yéesu, híiniyaamhiini hat nii waah uneetaat toko weekuulut ti faŋ etewwo. Pale niŋ an acokaa waah nii weekuulut, efuuyeno teyoo waah weekuulut. 15Niŋ aanaŋaa kúnuul an éeyinane kamma waah ewwa alli wa, cukaacuk fiye nii áalafiitoo. Paliyal piñaŋut hiwunu ánhin an aŋa Eenucee ya naakete kiteyoo ápupuul ti káyinan ka kiteyoo. 16Timpi hín eeha efihiwun pakan paka nkateñal eeha ancoke ha nii heenape. 17Kaatuko cáwii ca citi Pútuun pa cineetaat citi hili niŋ pálaani, pale citi íhinu heecoonoole, citi kásuumaay niŋ citi pásuuma, apan eehuu púlooŋ ti Kunuu ka keenape ka níhifulii. 18Niŋ an áhinaa páhin Eenucee ya samat nii fiye, áfaasuum Pútuun pa, apan pakan paka lompo éfikakup teyoo heenape.
19Ooto uŋesaa waah wa weeconcoolanoole wa unaa ti kásuumaay, niŋ weewufane wa sempe káyinan ka kiti pákawii unaa. 20Waah uti hili uñaŋut hiwunu ámpucalool páhin pa piti Pútuun pa. Pánipani waah óo waah ukuulaakuul hili. Pale hili waah ewwa efuuwun an naanow ti kaamuuyen, naput. 21Káaliyaati efoofa, niŋ káalaanaati elaan, niŋ hipooku waah óo waah ewwa efuuwas ani ti káyinan ti kaamuuyen, napaanap.
22Eeha ámmiiloole ha ti eehuu, mank ho ti pututayi niŋ Pútuun pa, apan timpi sok ho an. Ayihaayih, eewatanut a faŋoo ti eeha naacoke ha nii heenape. 23Pale aŋa eeliye ya waah, apan naataak kunuu kúsupak, Pútuun pa pucokoocok nii eemuuyene, kaatuko eeha naayem ha ti íhinu, hífuliyoot ti káyinan. Waah óo waah wéefuliyoot ti káyinan, uti kaamuuyen.
Kuloonaay © Wycliffe Bible Translators, Inc. 2026.