Room 13
13
Hítuulu pakati kikaw ka keeyem ka ti mah ma
1An óo an añaŋaa hítuulu keeyem ka pakati kikaw ka ti mah ma. Pútuun pa lamma piyina kawufan an sempe, apan pikina lompo pisiiŋane pakati kikaw ka.
2Ooto niŋ an apookaa pakati kikaw ka pakati mah ma, apookaapook lompo eeha Pútuun pa mpisiiŋane ha; kéehine ka eehuu efikasiiŋanee ti pisiya. 3Niŋ an áhinaa heenape, atafe pakati kikaw ka pakati mah ma. Pale niŋ áhinaa heenaput, tempo afaafeyii. Niŋ áalafiit hifeyu an eeyem ati hikaw, hín heenape, áfaamuli. 4Kaatuko íhinu naayaake páhin empa Pútuun pa mpuwufanoo pa kati áhin apiyankanani. Pale náahinaa heenaput, feyoo! Kaatuko káakuntu enka naayekane ka, ayekanut ko kenseŋ. Páhin Pútuun pa naayaake kati áyisan nii píñikenaañiken ti éehine ya heenaput. 5Ooto niñaŋaa hítuulu keeyem ka pakati kikaw ka pakati mah ma: neetaat nii aakati fak kaasiiŋanee ti pisiya lamma, pale hikina aññaŋe íhinu náalafiit kawatan faŋi.
6Eehuu lompo hiwune innicooy kúncoo. Kaatuko keeyem ka pakati kikaw ka, píhina pakati Pútuun pa payenka ammeya nii, kañaŋee cooy ti páhin pa piteyii. 7Nicooy an óo an nikopu enna inniyekanoo: iyyema nikopu niti kúncoo óo kúncoo, nicooy no; iyyema niñaŋaa hifeyu an, nifeyoo; iyyema niñaŋaa káamakiyan an, ooto nímakiyanoo.
Nikopu niti pálafooli
8Timpi niyekanool nikopu háati poonool, fo niŋ neetaat nikopu niti pálafooli. Kaatuko aŋa éelafiye pakakee paka, átuulaatuul hilim ha heesiiŋanee ha hiti Móyiis pántoon. 9Kaatuko hilim ha heesiiŋanee ha hisok: “Timpi hinto niŋ aal eenimiye, timpi muk an ti pásuumayi, timpi líp, timpi siiŋan níkini ti waah uti an.”#Efúlii 20:13-15,17; Kakaman 5:17-19,21 Kilim enkuu niŋ kikee kilim ka púlooŋ, ti hilim ha heesiiŋanee eehe nkiyem: “Láfi akinooli samat nii fa állafiye fa faŋi.”#Lewitik 19:18 10Niŋ an álafiyaa akinooloo átahinoo heenaput. Ooto niŋ an ataakaa pálafi, hilim ha heesiiŋanee ha náatuule pántoon.
Ememanoolo ya eti unaa eti éñohoonii ya eti Eenucee ya
11Ooto níhin eehuu, kaatuko nímeyimeyi ti caanak enca nuuyemaa ca tenco. Colaacol nípiyiyo kaatuko kafakanee ka kiti unaa kihaŋa nkúlohanii pihaŋ ta núucookaa ta úyinanaa ti Eenucee ya. 12Hánant ha hílaaŋanaa meemak, toko fiye cilapaa. Ooto ukatanaa pawenal empa mpíhinee pa ti énimaan, kati ukaliyaa pucoolaŋ pa piti ecaaŋ ya empa efuucoopaa pa ti hikam ha. 13Uwenaa pinap fa nuuwenaa fa niŋ hanakan palaw. Ukatanaa hili henfakat niŋ ékuman, úyekuniyaa casupoolat niŋ pahaaño, ukataa páhaŋool niŋ hitaaku paheeka. 14Pale nísool faŋ aluu niŋ Ateeteyo Yéesu Krista, apan timpi nímiilool fa éfinisuumiyan kunuu aluu keenaput ka.
Kuloonaay © Wycliffe Bible Translators, Inc. 2026.