Room 12
12
Eloŋ eti kaawaaseen
1Ooto, pakanam ti káyinan, páawoo Pútuun pa pitaakaataak paket hikaw ti unaa, inci iŋŋiino aluu, niwufan po sinii aluu samat nii kaawaaseen keeyem kaloŋa, nkukuul, nkúsuum lompo Pútuun pa. Fiyuu inniñaŋe po hímulu ti tooñaa. 2Timpi níyipenan pawenal pa piti púlunta empe; pale nikat Pútuun pa puputowo káayeeniyan kunuu aluu, ancuk niyeniyaa pakan kéeyeeni. Inníhinaa eehuu, éfinimeyi eeha mpílafiye ha, hikina hiyem heenape ha, héesuume po ha niŋ héetuuniye ha.
Hícump uwun ti miin ma miti Eenucee ya
3Páawoo Pútuun pa píyisanaam-yísan panap etempo, inci pusok aluu púlooŋ eehe: an ti aluu timpi áseepin úpantiyoo. Timpi nímiilool nii, nihaŋaahaŋ fa inniyem fa, pale niniik káyinan enka Pútuun pa mpuwufane ka aluu kati nímeyi puume inniyem. 4Ti enii unaa, utaakaataak hícump upii, apan kaapii óo kaapii nkitaak páhin etenko. 5Fiyuu nuucukaa: háati fa nuumeeŋaa fa, ucukaacuk nii enii yoonool ti Eenucee ya. Kaapii óo kaapii nkucokoolee ti ukee wa. 6Pútuun pa puwufanaawufan an óo an ti unaa kawun keekufut, pínapii ti panap etempo empa mpíyisane pa unaa. Ooto an óo an eetaake kawun kiti kaayaamakool, ayaamakool samat nii fa káyinan ka kiteyoo nkiyem fa. 7Eetaake ya kawun kiti kayankanan pakakee paka, ayankanan. Eetaake ya kawun kiti kakalaŋan, akalaŋan. 8Eetaake ya kawun kiti kapenan pakan paka páhaañi, apenanii páhaañi. Niŋ ati kiti kawun pakan, awun fo muus; niŋ ati kiti kátintiŋan kéeyinane ka, acok tenko kíp; niŋ ati kiti paket hikaw, áhin ho ti pásuuma.
Pálafi péeyisanee ti pawenal unaa
9Pálafi pa piti aluu piyeno pálafi tíktik. Ninat heenaput, innicok kíp ti heenape. 10Nílafooli niŋ pálafi piti yaan, ínnimakiyan pakakee paka pihaŋ faŋ aluu. 11Timpi nikuuñ, pale saan aluu silum ti páhin pa piti Ateeteyo. 12Nitaak pásuuma kamma cíki eyya innitaake ya. Nimukut ti kúnuul enka innicuke ka, innimukut lompo ti kaluum. 13Niyankanan pakan paka keesampanee ka keeleke ka, inniwanan ekaawoola ya pinap lati aluu.
14Niluum Pútuun pa pipisampan keekallane ka aluu; nisok po pisampanii, timpi nisok po piñanii. 15Niyeno ti pásuuma niŋ keeyem ka ti pásuuma, innikooŋ niŋ keeyem ka ti pukooŋ. 16Nitaak pámiiloolal poonool ti pututa aluu. Timpi niŋes émakiyanoolo, pale niyenoolo niŋ keeleke ka. Timpi nicokoolo nii keecohatiye.
17Niŋ an áhinuu heenaput, timpi ñahanoo heenaput. Pale tah kunuu aakati hín heecoonoole ti ñíkin pakan paka púlooŋ. 18Hín fan óo fan ayyina íhinu aakati kin ti kásuumaay niŋ an óo an. 19Aluu pákawiyam ti káyinan, timpi nínukan ti kéehine ka aluu heenaput, pale nikat ho ti káñiken ka kiti Pútuun pa, kaatuko Ateeteyo asok ti hilim ha hiti Pútuun pa nii: “Kánukan atoom, inci facooyii lompo heenaput eeha n káhine ha.”#Kakaman 32:35 20Pale nene asok:
“Niŋ peep pucokaa akamooli, ufanoo apili,
niŋ pálaani pucokoo, ufanoo apilaan.
Niŋ áahinaa fo, facuk fiye nii kíceket kiti seemak ancoope innaŋ ko ti hikawoo.” #
Kusoku 25:21-22
21Timpi nikat heenaput hipiheek aluu, pale niheek heenaput ti íhinu heenape.
Kuloonaay © Wycliffe Bible Translators, Inc. 2026.