Room 11
11
Káawunkiyaati ka kiti Pútuun pa ti pakati Israyel
1Ooto picakan eehe: Fo Pútuun pa púwunkaawunko pakan etempo Israyel? Haani, hitaakiit! Kaatuko inci faŋam ati Israyel, inci eesoke Abraham maamaa, ínfulii ti miin ma miti Benjamin. 2Pútuun pa púwunkiit pakan etempo, payenka mpimeya ka píliilum púlunta pa. Pánipani nímeyimeyi eeha ayaamakoola ya Elí naasoke ha ti hilim ha hiti Pútuun pa, ta naayeniye ta esampoolo ti Pútuun pa kamma heenaput eeha pakati Israyel nkáhine ha. Asok: 3“Ateeteyo, pakati Israyel kamukalaamukal piyaamakoola pa pakatii, nkápucalool lompo uciin wa utii. Inci lamma towiye, nkáyemi ti hiŋes himukuyam.”#1 Pumansa 19:10,14 4Eeheyme Pútuun pa mpiñahanoo? Pusokoo: “Haani, aaneetaat lamayi. Inci taakaataak pakan síwuli isak niŋ súsupak (7,000) keetowiye keetaapala kákilipo hátikin Baal, énaati ya eteyii.” 5Moonool moonool muu ti caanak ence: taakaataak pakan caahinkilis ti pakati Israyel keetowiye, payenka Pútuun pa mpimamale ti panap etempo. 6Páawoo pimamaliimamal ti panap etempo, ooto pimamalutii kamma waah ewwa nkáhine. Niŋ pimamaliimamal kamma eeha nkáhine ha, panap etempo anti píyeniyaati haahaw.
7Fiye eeheyme efuusokaa? Pakati Israyel kataakut eeha nkayeniye ha hiŋes. Pakan caahinkilis teyii payenka Pútuun pa mpimamale ka kataake ho, pale payenka toko fiye púlooŋ, Pútuun pa mpíhinii kapiyank pukun, 8samat nii fa inkiicee fa ti hilim ha hiti Pútuun pa, hisok:
“Pútuun pa mpuŋotan kunuuwii,
ñíkinii íññifuum, unuuwii nuucoto,
eehuu nihitowo fo fíyooy.” #
Kakaman 29:4; Esayi 29:10
9Amansa ya Dawid lompo asok:
“Alímaati paliyal pa piteyii piyeno kaayeen kiti hikuucu,
mantefa nkanow tenko, Pútuun pa mpisiiŋanii ti pisiya.
10 Alímaati ñíkinii ñínim ancuk timpi káyini hicuku,
ñusonii úññuŋoho tan óo tan kamma kúnuul.” #
Kícimu 69:22-23
11Innene cakan: Ta Pusuwif pa nkáfukooliye ta, fo kanowaanow fo cancowiyaaw? Haani, hitaakiit! Pale kaamuuyen ka kiteyii kuwune keeneetaat ka Pusuwif nkáyiniyee kafakan. Púful toko, oom kafakan kuwune Pusuwif pa nkameliyii. 12Pale iyyema kaamuuyen ka kiti Pusuwif pa kúcoopiyoo púlunta pa hisaanumate, te hinowu ha hiteyii níhicoopii keeneetaat ka Pusuwif hisaanumate, puume conko hisaanumate ha etihihaŋ toko niŋ pakati Israyel púlooŋ kasayanaa Pútuun pa?
Kafakanee ka kiti keeneetaat ka Pusuwif
13Fiye inci oopa ti káakup naaluu keeneetaat ka Pusuwif. Páawoo Pútuun mpupoñam ti aluu keeneetaat ka Pusuwif samat nii apoñapoñ, ekina ewune ímmakiyan meemak eeha Pútuun pa mpiyem ha ti íhinu ti aluu pínapii ti inci. 14Inhínhin fo kati hín pakanam Pusuwif pa kapimelo eeha innitaake ha, apan niŋ súumaa ti Pútuun pa, inci fafakan pakakee teyii. 15Kaatuko ta Pútuun pa mpúwunkiye ta Pusuwif pa, mpúsuumool niŋ púlunta pa. Puume facuk niŋ píyesooniyoo teyii nene? Ekina efeewun keekete ka nkaloŋ nene!
16Niŋ niwufanaa Pútuun pa kúmpuul ka kíyaañ ka enka innimemanool ka niŋ efol ya eti aluu, efol ya púlooŋ efeeyeno eesampanee. Niŋ hínkonk enuun hiyema hiti Pútuun pa, unaay wa púlooŋ lompo efuuyeno etempo. 17Pakati Israyel kacukaacuk nii enuun olif eesukee, ukee unaay eteyyo nuufiitee. Aluu keeneetaat ka Pusuwif nicukaacuk nii unaay uti ekee enuun olif eti elampa, nuucoopee kati utafee la ukee wa nuufiitee la. Fiye munkoc ma emma úmmufulii ma ti enuun ya eesukee ya ummuwufan aluu sempe ti coonool niŋ Pusuwif pa. 18Ekina ewune niñaŋut káaseepin úpanti aluu ti unaay wa weefiitee wa ewwuu. Niŋ níseepinaa úpanti aluu, nínawuno: aluu tom ínnisisikan hínkonk ha, pale hínkonk ha níhisisikan aluu.
19Pikee pa akee ti aluu naasok: “Ukee unaay ufiiteefiit ancuk inci yíniyee hitafu.” 20Eehuu páni. Kafiiteefiit kaatuko káyinanut ti Eenucee ya, apan awe intafee toko kamma áyyinane. Timpi séepin úpantiyi, pale fe. 21Kaatuko niŋ Pútuun pa pitaakut paket hikaw ti Pusuwif pa, keecuke ka nii unaay wa uti pánipani ya uti enuun ya eesukee ya, etipitaak paket hikaw ti awe lompo.
22Ooto sincan panap pa piti Pútuun pa niŋ fa mpifete fa: pifetaafet ti kéetuulut po ka, apan efipinap ti awe niŋ aatowiyaa ti panap etempo. Niŋ áahinut eehuu, awe lompo fafiitee nii kaanaay. 23Niŋ Pusuwif pa káyekuniyaa káayinanaati ka kiteyii, efikatafee nene ti unaay wa la nkayeniye la, kaatuko Pútuun pa píyiniyini ho íhinu. 24Aluu keeneetaat ka Pusuwif, nicukaacuk nii unaay enuun olif eti elampa, weefiitee kati utafee ti enuun eesukee eyya nkaŋantut ya teyyo. Pusuwif pa kayem unaay wa pánipani ya uti enuun ya eesukee ya; puume etikahaŋ pásuum hitafuyee ti enuun eyya nkaŋante ya teyyo?
Kafakanee ka kiti pakati Israyel púlooŋ
25Aluu pakanam ti káyinan, inci láfilafi nípimeyi eeha Pútuun pa mpiyem ha ti íhinu, eeha mpíyisanut ha hínum, ancuk timpi nicokoolo pakan keecohatiye: pakakee pakan ti pakati Israyel, Pútuun pa mpiyankan pukunii. Efikatowo ti eehuu fo ta payenka Pútuun pa mpimamale ka ti písii pa púlooŋ éfikakey ti Eenucee ya. 26Tempo pakati Israyel púlooŋ efikafakanee, samat nii fa inkiicee fa ti hilim ha hiti Pútuun pa, hisok:
“Afakana ya áfaafulii ti tíntiŋ ya eti Siyon,
náafulan ti miin ma miti Jakob káatuulaati ka kiteyii Pútuun pa.
27 Eehe hiyem písiyool pa empa Pútuun pa efipiliil pa neyii
niŋ puponketaa umuuyen wa uteyii.” #
Esayi 59:20-21; 27:9
28Inkéyyoo ti ekooŋan ya éesuume ya, Pusuwif pa káhinaahin faŋii pikamool Pútuun pa kamma aluu keeneetaat ka Pusuwif. Pale ínkeyyoo ti kamamal enka Pútuun pa mpimamale ka, Pútuun pa puloŋaa mpílafiyii kamma eeha mpusoke ha símaamayii. 29Kaatuko Pútuun pa pilamantoo waah ewwa mpuwune wa, niŋ fotom hiyaanu aŋa mpiyonkale ya. 30Ti púcook pa, aluu nítuulut Pútuun pa. Pale fiye Pútuun pa mpitaak paket hikaw ti aluu, kamma Pusuwif pa nkapooke hítuulu po. 31Moonool muu niŋ Pusuwif pa. Poko kátuulut fiye Pútuun pa, kamma Pútuun pa mpitaake paket hikaw ti aluu, mantefa poko lompo nkasa fiye paket hikaw ha hiti Pútuun pa. 32Kaatuko Pútuun pa píhinaahin pakan paka púlooŋ kapiyeno pimiikan pakati káatuulaati, kati pitaak paket hikaw teyii púlooŋ.
Pútuun pa penfakat pa
33O hisaanumate ha hiti Pútuun pa hitaakut pilehu,
niŋ ecohato etempo, niŋ kameye etempo!
Ayme ayina kaawak páloos pa piti heeyem ha ti hikaw etempo?
Ayme afaakaman eeha mpihintane ha?
34Ayme ameya pámiiloolal Ateeteyo?
Ayme ayinoo kawun kunuu?#Esayi 40:13
35Ayme mpaawun Pútuun pa waah
fo kati piñahanoo?#Job 41:11
36Kaatuko pikina piliile waah wa púlooŋ,
mpiyekan lompo waah wa púlooŋ ti epees etempo,
apan waah wa púlooŋ nuutaako hak pikina.
Alímaati caacaw etempo címakiyanee fo cancowiyaaw! Amíini.
Kuloonaay © Wycliffe Bible Translators, Inc. 2026.