Máciya 9
9
Káakuuñan áyiin éehute
1Púful toko, Yéesu náayuuko ti piteen, naafiitan han ha, naakaay ti saatee ya eteyoo. 2Tempo, pakakee pákayiin nkácoopii teyoo áyiin éehute, eehintiye ti kahun. Ta Yéesu naacuke ta káyinan ka kiteyii, naasok éehute ya: “Añiinam, mukut! Umuuyen wa utii uponketee!”
3Fiye, pakakee ti pikalaŋana hilim ha heesiiŋanee ha hiti Móyiis ta nkásiye ta Yéesu naasoke eehuu, nkasokoolo: “Ayíin a aŋe oopa ti kateñal Pútuun pa!”
4Pale Yéesu náameyi eeha nkayeniye ha káamiilool, naasokii: “Weyme uwune innitaak pámiiloolal peenaput empuu ti saan aluu? 5Weyme uhaŋe pásuum hisoku: 'Umuuyen wa utii uponketee,' niŋ ekina tom hisoku 'Lito inkaay?' 6Fiye fáyisan aluu nii inci, Añii An, taakaataak kayine t’etaam kiti kaaponket umuuyen wa.” Fiye naasok éehute ya: “Lito! Coop kahun ka kitii, iyyet t’enuuf.”
7Ayíin a naalito, naayet t’enuuf. 8Ta kayoŋ ka kenfakat ka nkucuke ta eehuu, nkimeeŋ niŋ ewatate,#9:8 Niŋ ekina tom: ínnimii nkúmul Pútuun pa peewufane pa pakan kayine enkuu.
Kaayonkal ka kiti Máciya
9Yéesu náaful toko naakaay. Ti pikaayu pa piteyoo, naacuk áyiin aŋa nkasok Máciya, naayeniye ti ésayuma kúncoo ya. Yéesu naasokoo: “Nápaniyam.” Máciya naalito naanapanoo.
10Púful toko, Yéesu naakaay hili káciim pati ekumpaan ya eti Máciya. Hícump pisayoola kúncoo niŋ pumuuyena nkákey nkali niŋ Yéesu niŋ pinapana pa pakateyoo. 11Ta Pufalisaay pa nkacuke ta eehuu, nkasok pinapana pa pakati Yéesu: “Weyme uwune akalaŋana ataaluu nali niŋ pisayoola kúncoo ya niŋ pumuuyena pa?” 12Yéesu ápisi eehuu, naasokii: “Pakan paka tom keeyem ka kásuumaayii kasoolahe ákuuñana, pale kéekuuñe ka. 13Canikalaŋ hilim ha hiti Pútuun pa, hisok: 'Paket hikaw inci íllafiye pale neetaat uwaaseen.'#Hoseya 6:6 Kaatuko inci kéyyoot kaayonkal keecoonoole ka, pale pumuuyena pa.”
Kacakan ka kiti suŋ ya
14Púful toko, Saŋ-Patis pinapana pa pakateyoo nkákey ti Yéesu nkacakanoo: “Unii niŋ Pufalisaay pa nuuloomloom suŋ. Weyme uwune pinapana pa pakatii kasuŋantoo?” 15Yéesu naañahanii: “Fo pakan kéeyonkaliyee pahaaño piti esa éfikayini esampoolo loho asaya ya oopa neyii? Caanak unca ti ékey ta asaya ya áfaafulanee teyii, tempo efikasuŋ.
16“An apapantoo cifaal céeyeeni ti hísool heemaamane, kaatuko niŋ hísool ha hiñowee, cifaal ca céeyeeni ca eficitosi, incihaŋ toko incihaace hísool ha heemaamane ha.
17“Fo lompo incuke, an ánuŋantoo pucoma wiiñ ti upaŋ weemaamane. Niŋ áhinaa fo, upaŋ wa éfuufap, wiiñ ya neeniiso, upaŋ wa núupucaloolo. Pale pucoma wiiñ ti upaŋ wéeyeeni nénuŋee, ancuk wiiñ ya niŋ upaŋ wa étuupuco.”
Amáacul eekete niŋ aal éekuuñe
18Ta Yéesu naayeniye ta káakup eehuu, akee ti ñíhampaatiin Pusuwif pa náakey, náakilipo hátikinoo, naasokoo: “Ahámpaatiin, añiinam ámaacul akete féefiye. Pale kéy aapinaŋ epeesi teyoo, afaayeno kaloŋa.” 19Yéesu naalito naakaay neyoo niŋ pinapana pa pakateyoo.
20Tempo, akee aal eeyeniye hicuku etaam eefiitantoo fo sitiil ŋaasuwan niŋ súsupak, náakey puson Yéesu, náalik hileelu hísool ha henfakat ha hiteyoo. 21Kaatuko asokoolaa-sokoolo: “Niŋ inci líkaa hísool ha henfakat ha hiteyoo lamma, éfikuuñanee.”
22Yéesu naayeso, apucukoo naasokoo: “Añiinam, mukut! Káyinan ka kitii kúkuuñanuu.” Tokotoko aal a náakuuñanee.
23Fiye Yéesu naakaay, naanako lati ekumpaan ya eti áhampaatiin Asuwif a, naacuk kayoŋ ka ti esampoolo meemak niŋ keeyeniye ka hisapu úmpiis hak kápuco ka. 24Naasokii: “Níful le. Amáacul a aketut pale hiŋotu naayaake.” Pale nkayeniyoo caalenken. 25Ta kayoŋ ka nkúfulanee ta tíkitaaŋ, Yéesu naanako ti ékaap ya, náasik epees ámaacul a. Amáacul a náalitoonii. 26Eehuu níhisiyo ti mah ma púlooŋ.
Káakuuñan ka pákayiin pákasupak kéefuume
27Yéesu náaful toko, naayeno pikaayu, úfuumafuum úsupak nkayeniyoo kanapan, nkaceek kapusok: “Añii ya ati Dawid, taak paket hikaw toonii!”
28Ta Yéesu naanakiye ta páhantuwa, kéefuume ka nkákey teyoo. Naacakanii: “Fo níyinanaayinan nii inci yíniyini íhinu eehuu?” Nkañahanoo: “Ee, Ahámpaatiin.”
29Fiye náalik ñíkinii naasokii: “Hitaako samat nii fa ínniyinane fa.” 30Ñíkinii íññipankino. Yéesu náakupananii meemak ti hisoku: “Nitah kunuu, timpi nisok ho an.” 31Pale poko nkakaay, nkayeno káakup kiti Yéesu ti mah emmuu púlooŋ.
32Emma nkakaaye ma, pakakee nkácoopii ti Yéesu áyiin eeyinaat káakup kamma hísaalumant níhiwuuliyoo. 33Fiye Yéesu naayaan hísaalumant ha, áyiin a náayaañ káakup. Kayoŋ ka kenfakat ka ínnim ko, nkusok: “Waah weecuke fiye utaapala ucukee ti mah ma miti Israyel.” 34Pale Pufalisaay pa nkasok: “Ti caacaw ca citi áhampaatiin a ati kísaalumant ka innayaan kísaalumant ka.”
Kaamaañ keefome pale pumaaña keemeeŋut
35Púful toko, Yéesu naakaawool ti pisaatee pa niŋ misaatee ma púlooŋ, naayeno kakalaŋan ti púluumuma pa piti Pusuwif pa, náatuunan ekooŋan ya éesuume ya eti cáwii ca citi Pútuun pa, náakuuñan káakuuñu óo káakuuñu niŋ kéehute ka púlooŋ. 36Ti oom kaakaawool, Yéesu naacuk uyoŋ wa, naataak paket hikaw tewwo kamma nkaliiñooliye kayinaat kayankanan faŋii, samat nii písaacii peetaakut afaasa.
37Fiye, naasok pinapana pa pakateyoo: “Kaamaañ ka kufomaafom pale pumaaña pa kameeŋut. 38Ooto niluum Ateeteyo ati kaamaañ ka apupoñ pumaaña kapikaay kaamaañ ka kiteyoo.”
Kuloonaay © Wycliffe Bible Translators, Inc. 2026.