Máciya 8
8
Káakuuñanee ka kiti áyiin ati kanuk
1Púful toko, Yéesu náawanoonii ti tíntiŋ ya, kayoŋ kenfakat nkinapanoo. 2Tokotoko, áyiin ati kanuk naalohoo, náakilipo hátikinoo naasokoo: “Ahámpaatiin, áayiniyaamyini kaakuulan, niŋ áalafiyaa.” 3Yéesu náañaakanii epeesoo, náalikoo naasokoo: “Inci láfilafi, kuul!” Tokotoko, áyiin a naakuul ti kanuk ka kiteyoo. 4Fiye Yéesu naasokoo: “Timpi sok eehe an. Pale kaay cáayisanoolo awaaseena ya ati Pútuun pa, niŋ fúlaa toko uwwaaseen kaawaaseen ka enka Móyiis naasoke ka,#Lewitik 14:1-32 áapiyisan pakan paka nii aakuulanee-kuulan.”
Káyinan ka kiti áhampaatiin asoocaali ati Room
5Púful toko, Yéesu naanako ti saatee ya eti Kafaanawum, áhampaatiin asoocaali naalohoo naaŋiiniyoo, 6naasok: “Ahámpaatiin, amiikan a atoom oopa ahintiye t’enuuf áhutaahut, náayemi ti kúnuul kenfakat.” 7Yéesu naasokoo: “Inci fakaay ínkuuñanoo.” 8Pale áhampaatiin a asoocaali ya naasokoo: “Ahámpaatiin, inci túuniit aapinako ti ekumpaan ya etoom. Pale sok hilim hoonool lamma, amiikan a atoom áfaakuuñanee. 9Kaatuko inci himuumam ti sipees áhampaatiin iyyem, pusoocaali lompo nkáyemi ti sipeesam. Niŋ inci sokaa aŋe 'kaay', naakaay; insok aŋe 'kéy', náakey. Insok amiikan a atoom 'hín fiye', náahin fo.”
10Ta Yéesu náasiye ta eehe, ínnimoo, naasok keeyeniyoo ka kanapan: “Inci pusok aluu pánipani ya, inci taapala cuk káyinan ka kenfakat enke ti pakati Israyel. 11Inci pusok aluu, keemeeŋe éfikafulii ti púlunta pa púlooŋ, kápikey hili ha henfakat ha niŋ Abraham, Isaak niŋ Jakob ti cáwii ca citi Pútuun pa. 12Pale epuuk ya pakati cáwii ca efikawantee tíkitaaŋ ti énimaan. Toko efitaak pukooŋ niŋ kaafincool úŋiiŋ.”
13Fiye Yéesu naasok áhampaatiin asoocaali ya: “Kaay! Hitaako samat nii fa áyyinane fa.” Ti oom waati amiikan a ateyoo náakuuñanee.
Káakuuñanee ka kiti keemeeŋe ka
14Púful toko, Yéesu naakaay lati ekumpaan ya eti Piyeer. Naatook aasonoo aal naahintiye kaatuko pasowe-enii naataake. 15Yéesu náalikoo ti epees, pasowe-enii ya mpúful. Piyeer aasonoo náalitoonii, naawas Yéesu apili.
16Oom nkániim, nkácoopii ti Yéesu hícump pakan payenka kísaalumant nkinakiye. Yéesu naayaan kísaalumant ka niŋ hilim ha hiteyoo, náakuuñan kéekuuñe ka púlooŋ. 17Fiyuu intaakiye ancuk eeha ayaamakoola ya Esayi naasoke ha hitaakiyaa, asok:
“Naatiyo úkuuñu wa utuunaa,
náafulan ñíseeña ña ñutuunaa.” #
Esayi 53:4
Kéelafiye ka kanapan Yéesu
18Púful toko, Yéesu naacuk kayoŋ ka kéekiipooloo ka, naasok pinapana pa pakateyoo kakaay ti kikee kaapii ka kiti han ha. 19Akee akalaŋana hilim ha heesiiŋanee ha hiti Móyiis naalohoo naasokoo: “Ahámpaatiin, inci fanapani pan óo pan pa ankaakaay.” 20Yéesu naañahanoo: “Piyen elampa ya pitaakaataak uyeen, pusuwa pa mpitaak ñáawuunu, pale inci, Añii An, taakut la fanaŋ hikawam.” 21Akee ti pinapana pa naasokoo: “Ahámpaatiin, túulam pícaahokii fala paapaa atoom.” 22Pale Yéesu naasokoo: “Napanam, inkat keekete ka kapuhok pakateyii keekete ka.”
Kaasiiŋan ka kiti Yéesu hítaapanu eyam ya
23Púful toko, Yéesu náayuuko ti piteen pa, pinapana pa pakateyoo nkanapool neyoo. Nkayeno kaafiitan han ha. 24Tokotoko, hítaapanu eyam néesapii ti han ha, kúsuu ka nkiyeno kaameeŋan piteen pa man. Pale Yéesu naayeno hiŋotu. 25Pinapana pa nkalohoo nkáyiyaloo, nkasokoo: “Ahámpaatiin, fakan unii, efuuketaa!” 26Yéesu naañahanii: “Weyme uwune innife? Aluu pakati káyinan keefomut!” Fiye naalito, naafet ti hiyam ha niŋ han ha, nihipilan niit. 27Poko púlooŋ ínnimii, nkasok: “An puume uwwe? Háati hiyam ha niŋ han ha níhisiyoo!”
Káakuuñan pákayiin pákasupak pakati kísaalumant
28Púful toko, Yéesu naaciŋ ti kikee kaapii ka kiti han ha, ti mah ma miti Katala.#8:28 Náasiyaa Katala, ekina eyem pakan paka pakati saatee ya eti Katala. Pikee pakiical pa piti Kilek mpusok Katala, pale pikee pa lompo mpusok Kelasa. Kelasa niŋ Katala pisaatee peekufut ti mah emmuu. Pákayiin pákasupak nkáfulii pati kúhokuma ka, nkapaakoolanoo. Pákayiin paka payenkuu kísaalumant kúwuuliyii. Nkayeno pákayiin keehiñe meemak, háati an áhaañiyantoo himuusu oom pítin.
29Tokotoko, nkayeno hiceeku kapusok: “Weyme állafiye toonii, Añii ya ati Pútuun pa? Fo áakeyyookey aakati kallan unii le niŋ waati ya éfeetuuno?”
30Inhemool koolee enfakat eti pícalukun neeyeno kaahoon pílaaŋii. 31Kísaalumant ka nkiŋiino Yéesu, nkusokoo: “Niŋ aayaanaa unii, katan unii upunako ti koolee ya eti pícalukun pa.” 32Yéesu naañahan ko: “Nikaay!” Fiye nkúfulalii ti pákayiin paka pákasupak paka, nkinakalo ti pícalukun pa. Tokotoko, koolee ya púlooŋ néeliiŋoonii mpacas patiila cítintiŋ ca, neenow ti han ha, néeseem.
33Pákayiin paka keeyeniye ka efaas koolee pícalukun pa, nkatey, nkakaay ti saatee ya nkakaman eehuu púlooŋ niŋ heetaakiye ha lompo payenka kísaalumant ka nkúwuuliye ka. 34Fiye saatee ya púlooŋ néefulii epicaapaakoolan Yéesu. Ta nkacukoo ta, nkaŋiiniyoo apikatan mah ma miteyii.
Kuloonaay © Wycliffe Bible Translators, Inc. 2026.