Máciya 10
10
Kúmpoña ka kiti pupoñapoñ pa ŋaasuwan niŋ pákasupak paka
1Púful toko, Yéesu naayonkal pupoñapoñ pa pakateyoo ŋaasuwan niŋ pákasupak paka, naawufanii kayine kiti hiyaanu kísaalumant#10:1 Niŋ ekina tom: kísaalumant keekuulut niŋ kiti káakuuñan káakuuñu óo káakuuñu niŋ kéehute ka púlooŋ. 2Ehe ucaw wa uti pupoñapoñ pa ŋaasuwan niŋ pákasupak paka: Ayáañ a ayem Simon, aŋa nkasok a lompo Piyeer, niŋ atuwoo Andre; Saak añii ya ati Sepete niŋ atuwoo Saŋ; 3Filip niŋ Paatolomaay, Tomas niŋ Máciya, asayoola kúncoo ya; Saak ati Alifaay niŋ Tate. 4Simon aŋa nkasok a Selot#10:4 Niŋ ekina tom: ati Kanaan. Ti caanak ca citi Yéesu, Selot eyem kayoŋ ka keeyeniye ka esuum kiti mah ma miteyii. niŋ Judas Iskaliyot éefule ya ti Yéesu.
5Pupoñapoñ pa ŋaasuwan niŋ pákasupak paka payenke Yéesu naapoñe, naasokii káhin eehe: “Timpi nikaay ti pisaatee pa piti keeneetaat ka Pusuwif, timpi ninako lompo ti pisaatee pa piti Samali. 6Pale nikaay ti pakati Israyel keecuke ka nii písaacii péecime. 7Innikaayaa teyii, nítuunanii nii: Cáwii ca citi Pútuun pa cílohiyooloh. 8Níkuuñan kéekuuñe ka, innilitan keekete ka, innikuulan keetaake ka kanuk, inniyaan kísaalumant ka. Nisayaasa haahaw; niwufan lompo haahaw.
9“Timpi nicoop sanoo, kótifoloo tom, niŋ ekina tom mañ ti pícipa pa piti aluu. 10Timpi nicoop lompo epootak eti kaakaawool, hísool hísupiyenu tom, pisamata tom, hikasap tom, kaatuko áhina añaŋaa hitaaku paliyaloo.
11“Niŋ ninakiyaa ti saatee niŋ ekina tom cisaatee, niŋesatool aŋa afaawanan aluu, inniyeno lateyoo fo ta éfiniful ti oom saatee. 12Niŋ ninakiyaa oom ekumpaan, innisok: 'Kásuumaay kiyeno ti ekumpaan eyye.' 13Niŋ pakati ekumpaan ya kawananaa aluu, kaluum ka kiti aluu kiti kásuumaay ka efikisayanee; niŋ kawananut aluu, kásuumaay ka éfikuñohoonii ti aluu. 14Niŋ an awananut aluu niŋ fotom ásiitanut kilim ka kitaaluu, nihank haafol ha ti woot aluu nípiyisanii nii Pútuun pa efipisapii, ínniful ti ekumpaan ya niŋ fotom saatee ya. 15Inci pusok aluu pánipani ya, hinak eeha Pútuun pa mpikaakaay íhinu kíiti ya, kúnuul ka kiti pakati saatee eyyuu efikihaŋ kiti pakati saatee ya eti Sotom niŋ eti Komola.#10:15 Pakan paka pakati Sotom niŋ pakati Komola kakancaakanc hínum meemak, ekina ewune Pútuun pa mpúpucalool pisaatee pa piteyii (Púcook 18:17–19:27)
16“Nísiitan! Inci pupoñ aluu samat nii písaacii ti pututa piyen elampa. Ooto nicohato samat nii pupululoola, niyeno pakati kásuumaay samat nii kúcuucuuku. 17Níwasum! Kaatuko efikawufan aluu éhinuma kíiti ya, nkasap aluu niŋ kisawut ti púluumuma pa piteyii. 18Efikacoop aluu lompo hátikin pakati kikaw ka niŋ pumansa pa kamma inci, ancuk kati nitaak káasiiŋuma kiti kakaman inci yem ayme hátikinii niŋ hátikin keeneetaat ka Pusuwif. 19Niŋ kacokaa aluu, timpi niwasoolo kúnuul fa innikaakaay káakup niŋ fotom eeha innikaakaay hisoku, kaatuko ti oom caanak efiniwufanee eeha efinisok. 20Kaatuko aluu tom nikaakaay káakup pale Kunuu ka kiti Paapaa ati aluu éfikukupii pínapii ti aluu.
21“Púnu áfaaful ti atuwoo, niŋ fotom atu náaful ti púnuwoo kati amukee, paapaa náaful ti añiinoo; epuuk efikayeso ti pupukayii kati kamukee. 22Pakan paka púlooŋ efikanat aluu kamma inci, pale aŋa afaamukut a fo ti pikelan, afaafakanee. 23Niŋ kakallanaa aluu ti saatee, nitey ti ekee saatee. Inci pusok aluu pánipani ya, etinipa kaafiitanool pisaatee pa piti Israyel le niŋ inci, Añii An, fákey.
24“Akalaŋa ahaŋut akalaŋana ya ateyoo, amiikan ahaŋut áhampaatiin a ateyoo. 25Tempaatempo akalaŋa apucuk nii akalaŋana ya ateyoo, amiikan naacuk nii áhampaatiin a ateyoo. Niŋ kayonkalaa inci, ati hikaw ha ati ekumpaan ya Pelesepul,#10:25 Pelesepul énaati eti pukumpaan pa piti pakati Kanaan. Pale le ekina eyem Seetaani ya. puume nkakaakaay kaayonkal keekine ka ti ekumpaan ya!
26“Ooto timpi nifeyii, kaatuko waah óo waah wéewufaloolee éfuuwufinee, waah óo waah weeyolee éfuumeyyee. 27Eeha inci insok ha aluu ti énimaan, nisok ho ti hanakan palaw; weepuusanoolee ti kaanuu aluu, nítuunan ho ti kíliŋ ka. 28Timpi nife payenka nkamuk ka enii ya apan kayinaat himuku yaan ya. Pale, nife aŋa eeyina ya hípucu yaan ya niŋ enii ya ti seemak.
29“Fo kanoomanantoo múculuculu músupak kaahit koonool? Pale háati coonool cinowantoo ti etaam Paapaa taaluu peecoonut. 30Pale aluu, háati wan wa weeyem wa ti hikaw aluu púlooŋ ufineefin. 31Ooto timpi nife, nihaŋaahaŋ nafaa meemak múculuculu meemeeŋe.
32“An óo an eesayanaam hátikin pakan paka, inci lompo fasayanoo hátikin Paapaa atoom eeyem a alacana. 33Pale an óo an eepookaam hátikin pakan paka, inci lompo fapookoo hátikin Paapaa atoom eeyem a alacana.
34“Timpi nímiilool nii inci kéyyookey écoopii kásuumaay t’etaam ya. Inci kéyyoot écoopii kásuumaay pale káakuntu. 35Kaatuko inci kéyyookey káakatinool
áyiin niŋ faafoo,
aal niŋ íññaa ateyoo,
aal niŋ aasonoo aal.
36 An akamooloo afaakin ti ekumpaan ya eteyoo. #
Mika 7:6
37“An óo an éelafiye faafoo niŋ fotom íññaa ateyoo pihaŋ inci, oom an átuuniit piyeno anapanayam, an óo an éelafiye añiinoo akampaani niŋ fotom añiinoo ámaacul pihaŋ inci, oom an átuuniit piyeno anapanayam. 38Aŋa eecoonutam kanapan fo álafi eket ti kuluwaa,#10:38 Niŋ ekina tom: Aŋa eecooput kuluwaa ya eteyoo naanapanam oom an átuuniit piyeno anapanayam. 39An óo an eefakane eloŋ ya eteyoo áfaapuul teyyo, an óo an éepuule eloŋ ya eteyoo kamma inci, afaafakan yo.
40“An óo an eewanane aluu, inci naawanane, an óo an eewananaam, aŋa éepoñiyaam ya naawanane. 41An óo an eewanane ayaamakoola kamma naayem ayaamakoola, oom an afaapuuñanoolee samat nii ayaamakoola. An óo an eewanane an eecoonoole kamma naayem eecoonoole, oom an afaapuuñanoolee samat nii an eecoonoole. 42An óo an eewune háati elontoŋ eti man meemone akee ti kéetinee ka ti pinapana pa pakatoom kamma naayem anapanayam, inci pusok aluu pánipani ya, oom an afaataak kaapuuñanool ka kiteyoo.”
Kuloonaay © Wycliffe Bible Translators, Inc. 2026.