Máciya 7
7
Kakalaŋan ka kiti káahinaati an kíiti
1Yéesu nene asok: “Timpi níhin kíiti pakan, ancuk Pútuun pa étipihin aluu kíiti. 2Kaatuko Pútuun pa éfipihin aluu kíiti samat nii fa ínnihin fa kíiti pakan paka, efipiniik aluu niŋ eniiku eyya inniniike ya pakan paka. 3Weyme uwune annincuk cíheeni ca ceeyem ca ti níkin atii ya, awe péepannumut hifiin ha heeyem ha ti níkini? 4Puume ayyina hisoku atii ya, 'Atoomuu, túulam inci púfulani cíheeni ca ceeyem ca ti níkini' awe pataakal hifiin ti níkini? 5Awe nícuf! Yáañ fúlan hifiin ha ti níkini, tempo áafayini hicuku picaaŋ cataŋ aakati yíni káfulan cíheeni ca ceeyem ca ti níkin atii ya.
6“Timpi niwufan weesampanee wa piyen pa, niŋ ekina tom éfipiyesoonii mpitaatulool aluu; timpi niwant pínankiin pa péeciita pa hinoom pícalukun pa, niŋ ekina tom efipikakalool po.”
Kakalaŋan ka kiti piŋiino kaluum
7Yéesu nene asok: “Niluum, efipuwun aluu, niŋes efinilaŋan, niwenken éfipipankin aluu. 8Kaatuko, an óo an eeluume afaawunee, an óo an eeŋese afaalaŋan, an óo an eewenkene áfaapankinee.
9“Ayme ti aluu afaawufan añiinoo énankiin niŋ aluumoo hímpuul? 10Niŋ ekina tom, naawufan añiinoo epululoola niŋ aluumoo yoon? 11Niŋ aluu keenaput ka nimeya kawun waah weenape epuuk aluu, puume Paapaa ati aluu eeyem ya alacana atahaŋ naawufane waah weenape keeluumoo wo ka.
12“Ooto níhin pakan paka samat nii fa ínnilafiye fa púlooŋ kati nkáhin aluu: eehuu hiyem pakalaŋanal pa piti hilim ha heesiiŋanee ha hiti Móyiis niŋ piyaamakoola pa.”
Kakalaŋan ka kiti putum pa peekoke pa
13Yéesu nene asok: “Ninako ti putum pa peekoke pa, kaatuko putum pa peeweñe pa empa mpucoop pa ti púpuco, pítin etempo mpúsuum pikaayu, keemeeŋe nkanako tempo. 14Pale putum pa piti eloŋ ya eepayantoo ya pukokaakok apan pítin pa peehiiŋe pa po mpíciiti, pakan keemeeŋut nkalaŋan po.”
Kakalaŋan ka kiti enuun niŋ papukal eteyyo
15Yéesu nene asok: “Nitah kunuu ti keeneetaat ka piyaamakoola pánipani. Nkákeykey ti aluu pucuk nii písaacii, pale saanii samat nii siti piyen elampa. 16Ti pawenalii efinikiiwii. Fo an nacutcut papukal wiiñ ti halalanc niŋ fotom sootoo ti punuun piti pícankun? 17Fo lompo incuke, enuun óo enuun eenape nepukpuk papukal peenape, pale enuun eenaput nepuk papukal peenaput. 18Enuun eenape eyinaat hipuku papukal peenaput, enuun eenaput lompo eyinaat hipuku papukal peenape. 19Enuun óo enuun eepukut papukal peenape efeefiitee neewantee ti seemak sa. 20Fiyuu, efinikiiw ti pawenalii keeneetaat ka piyaamakoola pánipani.
21“Pakan paka tom púlooŋ payenka nkasokam ka 'Ateeteyo, Ateeteyo' efikanako cáwii ca citi Pútuun pa, pale aŋa náhin a eeha Paapaa atoom eeyem a alacana náalafiye ha. 22Ti hinoom ha hikelan ha, pakan keemeeŋe efikasokam: 'Ateeteyo, Ateeteyo, ti caacawi nuuyaamakoole, ti caacawi nuuyaane kísaalumant ka, ti caacawi lompo núuhine hícump weecukantee.' 23Fiye inci fasokii: 'Taapala méyi aluu, nihaasiyam aluu píhina pa heenaput ha!'”
Kakalaŋan ka kiti aluta eecohatiye niŋ eecohatiit
24Yéesu nene asok: “Ooto, an óo an éesiye pakalaŋanalam apan náahin po, afaanakool nii an eecohatiye eelute ekumpaan ya eteyoo ti énankiin. 25Etiil ya neenup, ésaacin ya néekey, hiyam ha nihisap meemak ti ekumpaan ya, pale enowut kaatuko esiiŋanee-siiŋan ti énankiin. 26Pale an óo an aŋa násiitan a pakalaŋanalam apan áhinut po, anakoolaa-nakool nii esoŋ eelute ekumpaan ya eteyoo ti esiya peewakut t’etaam. 27Etiil ya neenup, ésaacin ya néekey, hiyam ha nihisap meemak ti ekumpaan ya. Neenow neehancaloolo púlooŋ cew.”
28Ta Yéesu naapaye ta kakalaŋan enkuu púlooŋ, uyoŋ wa ínnimii ti pakalaŋanaloo, 29kamma naakalaŋanii niŋ sempe, cukut nii pikalaŋana pa pakateyii pakati hilim ha heesiiŋanee ha hiti Móyiis.
Kuloonaay © Wycliffe Bible Translators, Inc. 2026.