Máciya 6
6
Kakalaŋan ka kiti kawun keeleke ka
1Yéesu nene asok: “Nitah kunuu! Inniyeniyaa íhinu eeha Pútuun pa mpílafiye ha, timpi níhin ho hátikin pakan paka kati kacuk aluu. Niŋ hitaakiyaa, etinitaak kaapuuñanool ka kiti Paapaa ataaluu eeyem a alacana. 2Ooto niŋ aayeniyaa kawufan salaka an eeleke, timpi sap kámpiis. Fiyuu ñícuf ña nkáhin ti púluumuma pa niŋ ti ñítin ña, ancuk pakan paka kámulii. Inci pusok aluu pánipani ya, kapayaapa hisayu kaapuuñanool ka kiteyii. 3Pale awe, niŋ aayeniyaa kawufan salaka, epeesi yaamay timpi émeyi eeha epeesi yáali neeyem ha ti íhinu. 4Fiyuu salaka ya etii efeewufanee ti piyolo, Paapaa atii aŋa nacuk a wéehinee wa ti piyolo afaacooyi.”
Kakalaŋan ka kiti kaluum
5Yéesu nene asok: “Niŋ niyeniyaa kaluum timpi níhin samat nii ñícuf ña. Poko nkálafi pisiiŋo niŋ kayeniyaa kaluum ti púluumuma pa niŋ ti híliŋ ha pakan paka kati kacukii. Inci pusok aluu pánipani ya, payenkuu kapayaapa hisayu kaapuuñanool ka kiteyii. 6Pale awe, niŋ aayeniyaa kaluum, nako ti ékaap ya etii, impank hunkut ha, illuum ti Paapaa atii eeyem a la yoliye la.#6:6 Niŋ ekina tom: illuum ti Paapaa atii eecukantee ya; niŋ ekina tom, illuum ti Paapaa atii ti piyolo Paapaa atii aŋa nacuk ya wéehinee wa ti piyolo afaacooyi.
7“Niŋ niyeniyaa kaluum, timpi nitowo ti káakup kenseŋ samat nii keeneetaat ka Pusuwif. Cukiicuk nii Pútuun pa éfipisiitanii kamma nkayem ti káakup keemeeŋe. 8Ooto timpi nicuk nii poko, kaatuko Paapaa ataaluu ámeyimeyi eeha innisoolahe ha le niŋ efiniluumoo.
9“Fiye, niŋ niyeniyaa kaluum innisok:
'Paapaa atoonii eeyem a alacana,
álimaati caacawi cisampanee,
10álimaati cáwii ca citii cíkey,
álimaati eeha állafiye ha hitaako
t’etaam samat nii fa iyyem fa alacana.
11Alímaati aawufan unii fíyooy paliyal pa empa nuusoolahe pa.
12Alímaati aaponket unii umuuyen wa utoonii,
samat nii fa nuuponket fa lompo umuuyen wa uti keemuuyene ka toonii.
13Timpi katan unii upunow ti híluuŋu ha,
pale fakan unii ti Eekance ya.'#6:13 An ámiit man Máciya lompo akiice fiye: Kaatuko awe taake kayine ka, sempe sa niŋ hamake ha fo cancowiyaaw. Amiin.
14“Kaatuko niŋ niponketaa pakan paka keemuuyene ka taaluu, Paapaa ataaluu eeyem ya alacana afaaponket aluu lompo. 15Pale niŋ niponketut pakan paka keemuuyene ka ti aluu, Paapaa ataaluu lompo ataponket umuuyen wa utaaluu.”
Kakalaŋan ka kiti suŋ
16Yéesu nene asok: “Niŋ nisuŋaa timpi nímaahan samat nii fa ñícuf ña nkáhin fa, kaatuko ñuhooŋuyii iññikaasitoolo kápiyisan pakan paka nii kasuŋaasuŋ. Inci pusok aluu pánipani ya, payenkuu kapayaapa hisayu kaapuuñanool ka kiteyii. 17Pale awe, niŋ aasuŋaa, santaŋ hikawi#6:17 Yéesu asok: nuc wani iññow puhooŋuyi. 18Ancuk áatiyisan pakan paka nii aasuŋaasuŋ. Pale Paapaa atii eeyem a la yoliye la,#6:18 Niŋ ekina tom: Paapaa atii eecukantee ya; niŋ ekina tom, Paapaa atii afaacuki ti piyolo afaacuk. Paapaa atii aŋa nacuk a wéehinee wa ti piyolo afaacooyi.”
Kakalaŋan ka kiti hisaanumate hiti alacana
19Yéesu nene asok: “Timpi niconcenool hisaanumate ti etaam ya, la cemmek niŋ komoŋ nkápucalool la niŋ la pílipa nkahaat la kápilip. 20Pale niconcenool hisaanumate alacana la innimeya la nii cemmek niŋ komoŋ étikapucalool, la pílipa etikahaat kápilip. 21Kaatuko la hisaanumate ha hitii nihiyem, toko lompo yaani neeyem.”
Kakalaŋan ka kiti ñíkin ña, lampi ya eti enii ya
22Yéesu nene asok: “Ñíkini ñikina ñiyem lampi ya eti eniini. Niŋ ñíkini ñinapaa, eniini púlooŋ efeemeeŋ niŋ ecaaŋ. 23Pale niŋ ñíkini ñinaput, eniini púlooŋ néeniman. Ooto niŋ ecaaŋ ya eeyem ya ti awe énimaan, énimaan ya efeefom.”
Kakalaŋan ka kiti ewasoolo ya kúnuul
24Yéesu nene asok: “An ayinaat páhin ti ñíhampaatiin pákasupak. Afáalafi oonool a naanat akee ya, niŋ ekina tom naacok piliit oonool a naapook akee ya. Niyinaat ti coonool kaalehanool káyinan Pútuun pa niŋ pálafi mañ.
25“Eehe hiwune inci insok aluu, timpi niwasoolo kúnuul ti eloŋ ya etaaluu, ti waah ewwa efinili niŋ pálaani, niŋ fotom ti sinii aluu, waah ewwa éfinisoolo. Fo eloŋ ya ehaŋut paliyal, enii ya ehaŋut pásooliyal? 26Nisincan pusuwa pa, pusukantoo, pumaañantoo, piconcenoolantoo pamaañal pa ti pileefaan, pale Paapaa ataaluu eeyem a alacana nákuuman po. Fo nihaŋut po nafaa? 27Ayme ti aluu, ti ewasoolo kúnuul, ayina kapenan háati esuuŋut ti eloŋ ya eteyoo?
28“Weyme uwune kati niwasoolo kúnuul ti pásooliyal aluu? Nisincan fa híliilii ha nihiŋant fa. Ihínantoo piseeñ niŋ ekina tom hiliilantoo. 29Pale inci pusok aluu, háati amansa ya Solomon niŋ hisaanumate ha hiteyoo fiye púlooŋ ásankinantoo samat nii hikina. 30Niŋ Pútuun pa púsoolaa fiyuu káaheeni enkuu, keeyem ka le fíyooy, kacom nkuwantee ti seemak, faala aluu, puume conko étipusool aluu? Aluu pakati káyinan keefomut!
31“Ooto timpi niwasoolo kúnuul ti hisoku: Weyme nuukaakaayaa hili? Weyme nuukaakaayaa pálaani? Weyme nuukaakaayaa púsoolo? 32Kaatuko keeneetaat ka Pusuwif, poko nkaŋes waah ewwuu. Pale Paapaa ataaluu eeyem a alacana ámeyimeyi nii nisoolahaa-soolah aŋuu púlooŋ. 33Níyaañ niŋes fala cáwii ca citi Pútuun pa niŋ eeha mpílafiye ha, ínnihinaa fo, waah ewwe púlooŋ efuuwufanee aluu.
34“Ooto timpi niwasoolo kúnuul hiti kacom, kaatuko kacom efeetaak kúnuul eteeho. Hinoom óo hinoom hitaakaataak kúnuul eteeho hak.”
Kuloonaay © Wycliffe Bible Translators, Inc. 2026.