Máciya 5
5
Kakalaŋan ka ti tíntiŋ ya
1Ta Yéesu naacuke ta uyoŋ wa, naasilo tíntiŋ ya, naayeno, pinapana pa pakateyoo nkákey teyoo. 2Náayaañii kakalaŋan.
Hiyihu
Yéesu naasok:
3“Kayihaayih, poko keeleke ka ti kunuu,
kaatuko cáwii ca citi Pútuun pa citeyii.
4Kayihaayih, poko keeyem ka ti keeŋoot,
kaatuko efikapuuñanoolee.
5Kayihaayih, poko keewananooliye ka,
kaatuko efikasa etaam ya.
6Kayihaayih, poko kéelaakane ka ti waah óo waah ewwa Pútuun pa mpílafiye wa kápihin samat nii keeyem ti peep pálaani mpucokii,
kaatuko efikasiitanee.
7Kayihaayih, poko keetaake ka paket hikaw ti pakan paka,
kaatuko Pútuun pa efipitaak teyii paket hikaw.
8Kayihaayih, poko keeyem ka nii eloŋii púlooŋ eti Pútuun pa,
kaatuko efikacuk Pútuun pa.
9Kayihaayih, poko kéecoopii ka kásuumaay ka ti pakan paka,
kaatuko efikayonkalee epuuk Pútuun pa.
10Kayihaayih, poko keekallanee ka kamma nkáhine eeha Pútuun pa mpílafiye ha,
kaatuko cáwii ca citi Pútuun pa citeyii.
11“Niyihaayih niŋ kateñalaa aluu, nkakallan aluu, nkacaam kapusok heenaput kiti aluu kamma inci. 12Niŋaañaa inniyeno ti pásuuma, kamma kawun kenfakat nkiyem ti hítuulu aluu alacana. Kaatuko fiyuu nkakallane piyaamakoola pa kéekeyii ka le niŋ aluu éfinikey.”
Kakalaŋan ka kiti micempanu ma niŋ ecaaŋ ya
13Yéesu nene asok: “Aluu niyem micempanu ma miti púlunta pa. Pale niŋ micempanu ma míyitanaa, puume pasampe etemmo efipiñahanee? Mitaakut nene nafaa fo hiwantuyee tíkitaaŋ pakan paka nkakakal temmo.
14“Aluu niyem ecaaŋ ya eti púlunta pa. Saatee eelutee ti tíntiŋ eyinaatee hiyolu. 15Ti moonool muu, an acaaŋanantoo lampi náawuf teyyo eheem! Pale, nawaŋwaŋ yo ti esafu kati ecaaŋan púlooŋ keeyem ka ti ekumpaan ya. 16Fo lompo incuke, ecaaŋ ya etaaluu eñaŋaa hicaaŋu hátikin pakan paka ancuk kacukaa páhin pa pitaaluu peenape pa, nkámul Paapaa ataaluu eeyem ya alacana.”
Kakalaŋan ka kiti hilim ha heesiiŋanee ha
17Yéesu nene asok: “Timpi cuk aluu nii inci kéyyookey káfulan hilim ha heesiiŋanee ha hiti Móyiis niŋ kilim ka kiti piyaamakoola pa. Inci kéyyoot káfulan etenko pale eeha nkasoke ha kati hitaako fanfaŋ. 18Inci pusok aluu pánipani ya: Taamanta patiila niŋ t’etaam kácimut, háati cilim ca ceehaŋe ca káafomaati éticicim ti hilim ha heesiiŋanee ha fo ta waah óo waah efuupa pitaako. 19Ooto niŋ an átuulut cilim coonool ti hilim ha heesiiŋanee eehe naakalaŋan pakakee paka kápihin moonool muu, oom an afaacokee eehaŋe káataakaati nafaa ti cáwii ca citi Pútuun pa. Pale niŋ an átuulaa ho, naakalaŋan pakakee paka kápihin moonool muu, oom an afaacokee eetaake nafaa ti cáwii ca citi Pútuun pa. 20Kaatuko inci pusok aluu, niŋ níhinut eeha Pútuun pa mpílafiye ha pihaŋ pikalaŋana hilim ha heesiiŋanee ha hiti Móyiis niŋ Pufalisaay pa, etininako ti cáwii ca citi Pútuun pa.”
Kakalaŋan ka kiti káñiken ka
21Yéesu nene asok: “Nísiyaasi nii símaama unaa kasokeesok nii: 'Timpi muk an ti pásuumayi.#Efúlii 20:13; Kakaman 5:17 An óo an eemuke an ti pásuumayoo áfaahinee kíiti.' 22Pale inci insok aluu, niŋ an óo an áñikenaa ti áwiyoo an,#5:22 Niŋ ekina tom: niŋ an óo an áñikenaa ti áwiyoo an haahaw áfaahinee kíiti. Niŋ an asokaa áwiyoo an, 'awe likee tom!' afaacoopee ti éhinuma kíiti. Niŋ an asokaa áwiyoo an, 'awe wuyaawuyo', oom an afaawantee ti seemak sa seehokiyantoo sa.
23“Ekina ewune, niŋ áacoopiyoo waah uti kaawaaseen Pútuun pa pati kaaciin ka, toko ínnawuno nii áwiyi an oopa ataake heeseeñoo ti awe, 24tah toko oom waah hátikin kaaciin ka, íncaasuumoolii niŋ áwiyi an, niŋ fúlaa toko íññohoonii uwwaaseen kaawaaseen ka kitii Pútuun pa.
25“Niŋ akamooli ayeniyuu hicoopu ti áhina kíiti, ti pítin pa síyool neyoo mpacas. Niŋ ekina tom afaawufani áhina kíiti ya, áhina kíiti ya naawufani ati éwuulu ya, ankulee. 26Inci pusoki pánipani ya, áatifulii ti núkuluma ennuu awe peecooyut kaahit ka kikelan ka!”
Kakalaŋan ka kiti pihinto niŋ aal eenimiye
27Yéesu nene asok: “Nísiyaasi nii kasokeesok nii: 'Timpi hinto niŋ aal eenimiye.'#Efúlii 20:14; Kakaman 5:18 28Pale inci insok aluu, aŋa asincane aal naataak paleña teyoo, oom an ince ahintiyaa neyoo ti kunuuwoo. 29Ooto niŋ níkini náali ninakanuu ti kaamuuyen, lókit no uwwant no. Fisaka áapupuul kaapii koonool ti eniini áawantumee púmpuluŋi ti seemak. 30Niŋ epeesi yáali enakanuu ti kaamuuyen, fiit yo uwwant yo. Fisaka áapupuul kaapii koonool ti eniini áakaayum púmpuluŋi ti seemak.”
Kakalaŋan ka kiti káfulan aal
31Yéesu nene asok: “Kasokeesok lompo nii: 'Aŋa áfulane aaloo añaŋoo lompo kawufan kaahit kéeyisane nii áfulanoofulan.'#Kakaman 24:1 32Pale inci insok aluu, áyiin óo áyiin éefulane aaloo, aal a peehaañiit,#5:32 Fo niŋ pinimo pa picenkutee ti pítin. oom áyiin kanakan aaloo ti pahaaño naayaake niŋ aal a animiyaa ti akee. Ayíin eesaye aal éefulanee, ti eloŋ eti pahaaño naayem.”
Kakalaŋan ka kiti esintoolo
33Yéesu nene asok: “Nísiyaasi lompo símaama aluu kasokeesok nii: 'Timpi fúl ti eeha ansintooliye ha.#5:33 Niŋ ekina tom: Timpi sintoolo ti kincaam Pale hín eeha ansintooliye ha hátikin Ateeteyo.'#Lewitik 19:12; Pafinal 30:2 34Pale inci insok aluu, timpi sintoolo múk. Timpi sintoolo ti alacana kaatuko po elemeyu ya la Pútuun pa mpiyeno la neeyem. 35Timpi sintoolo ti etaam ya kaatuko élempuma woot etempo. Timpi sintoolo ti caacaw Jerusalem#5:35 Niŋ ekina tom: púcoonool Jerusalem kaatuko saatee ya eti Pútuun pa, Amansa ya enfakat a. 36Timpi sintoolo ti hikawi kaatuko aayinaat káhiiniyan niŋ ekina tom kápaaniyan kaahan koonool ti hikawi. 37Nisok lamma 'ee' iyyema ee niŋ ekina tom 'haani' iyyema haani. Waah óo waah ewwa ampenane toko ti Eekance ya núufulii.”
Kakalaŋan ka kiti kánukan ka
38Yéesu nene asok: “Nísiyaasi kasokeesok nii: 'Níkin, níkin nacooyoo; káaŋiiŋ, káaŋiiŋ nacooyoo.'#Efúlii 21:24; Lewitik 24:20; Kakaman 19:21 39Pale inci insok aluu, niŋ an ayeniyuu íhinu heenaput, timpi kitoo.#5:39 Niŋ ekina tom: timpi núkan Niŋ an ahankuu ti kaawiilu káali, ufanoo kikee ka lompo. 40Niŋ an álafiyuu hicoopu kíiti kati acoop hísool ha hitii, ufanoo lompo hísool ha hitii henfakat ha. 41Niŋ an óo an atiyanuu ti sempe waah weenapa náahini aapisapal kilomeetal yoonool, sapal neyoo súsupak. 42An óo an eeluumuu, uwwunoo. Niŋ an álafiyaa kanahan waah ti awe, timpi pook.”
Kakalaŋan ka kiti pálafi akamooli
43Yéesu nene asok: “Nísiyaasi kasokeesok nii: 'Láfi akinooli,#Lewitik 19:18 innat akamooli.' 44Pale inci insok aluu, nílafi pikamool aluu, niluum Pútuun pa heenape payenka nkakallan ka aluu. 45Fiyuu, efiniyeno epuuk Paapaa ataaluu eeyem ya alacana. Kaatuko, akina náfulanii caanak ca ti keenape ka niŋ ti keenaput ka; náanupanii etiil ya ti kéehine ka eeha Pútuun pa mpílafiye ha niŋ kéehinut ho ka. 46Niŋ nílafiyaa kéelafiye ka aluu, enkeyme kaapuuñanool innikaakaay hitaaku? Háati pisayoola kúncoo nkáhinhin fo! 47Niŋ nikicanaa pákawii aluu pakan lamma, weyme ínnihine weetaapala úhinee? Háati keeneetaat ka Pusuwif nkáhinhin fo! 48Niyeno kéetuuniye samat nii fa Paapaa ati aluu eeyem ya alacana naayem fa éetuuniye.”
Kuloonaay © Wycliffe Bible Translators, Inc. 2026.