Máciya 4
4
Híluuŋuyee ha hiti Yéesu
1Púful toko, Kunuu ka keenape ka nkucoop Yéesu ti káahaaŋ ka tes, Seetaani ya kati eŋes híluuŋuyoo. 2Naasuŋ hánant hanakan fo kunoom áwii ésupak, ti pikelan peep mpucokoo. 3Fiye, Seetaani ya, áluuŋa ya, náakey teyoo, naasokoo: “Páawoo awe yem Añii ya ati Pútuun pa, sok pínankiin empe piyeso kúmpuul!” 4Yéesu naañahan yo: “Kiiceekiic ti hilim ha hiti Pútuun pa nii: 'an ataloŋ niŋ hímpuul lamma, pale niŋ hilim óo hilim héefulii ti putum Pútuun pa.'#Kakaman 8:3”
5Fiye Seetaani ya neecoopoo Jerusalem, saatee ya eesampanee ya. Neesiiŋanoo la haŋe la pahaan ti ekumpaan ya enfakat ya eti Pútuun pa. 6Nene esokoo: “Páawoo awe yem Añii ya ati Pútuun pa, fúl le cípo t’etaam! Kamma inkiicee nii:
'Efipusok pumaleekoo etempo pimankooli; #
Kícimu 91:11
pumaleekoo pa éfipiseepini niŋ sipees etempo,
eeha efihiwun ha kooti etikulooŋoolo ti énankiin.' #
Kícimu 91:12
”
7Yéesu naañahan yo: “Kiiceekiic lompo nii: 'Aañaŋut puwinko Ateeteyo Pútuun pa pitii.'#Kakaman 6:16”
8Fiye, Seetaani ya neecoopoo ti pisempuc tíntiŋ eehaane meemak. Néeyisanoo cáwii ca citi púlunta pa púlooŋ niŋ hamake etenco, 9neesokoo: “Aŋe púlooŋ inci fawufani náakilipiyaa hátikinam ímmulam.” 10Yéesu naañahan yo: “Fúl le Seetaani! Kamma inkiicee nii:
'Ateeteyo Pútuun pa pitii aññaŋe ékilipo hátikin etempo, apan pikina lamma aññaŋe kaawaaseen.' #
Kakaman 6:13
”
11Fiye Seetaani ya neekatan Yéesu. Ta neekatanoo ta, pumaleekoo mpíkey teyoo mpiyankananoo.
Híyaañu ha hiti Yéesu páhin pa piteyoo
12Ti oom caanak, Saŋ naakulee. Ta Yéesu náasiye ho ta, náaful Judaay apikaay ti mah ma miti Galilee. 13Afiyiit Naasalet pale naacaakin Kafaanawum, pukol han ha hiti Galilee ti mah ma miti Sepulun niŋ Nafatali. 14Fiyuu intaakiye ancuk eeha ayaamakoola ya Esayi naasoke ha hitaakiyaa, asok:
15 “Mah ma miti Sepulun niŋ Nafatali, ti pítin pa pukol han ha, ti kikee kaapii ka kiti musuu ma miti Jordan meeyem ma ti mah ma miti Galilee,
pa keeneetaat ka Pusuwif nkakine pa,
16 pakan paka keekine ka ti énimaan kacukaacuk ecaaŋ enfakat;
ti keekine ka ti etaam ya eti hísaalumant ha hiti eket ya, ecaaŋ éfuliyoo. #
Esayi 9:1-2
”
17Ti oom caanak, Yéesu náayaañ káatuunan apusok: “Níwunko umuuyen wa utaaluu, kaatuko cáwii ca citi Pútuun pa cílohiyooloh.”
Kaayonkal ka kiti Yéesu pinapanayoo pákayaañ
18Púful toko, Yéesu naayeno kasapal ti kantant ka kiti han ha hiti Galilee, naacuk picalafayya pákasupak nkayeno hiwantu cala ya eteyii ti han ha. Payenkuu an niŋ atuwoo, ucawii Simon, aŋa nkasok a Piyeer, niŋ Andre. 19Yéesu naasokii: “Nínapaniyam, inci fáhin aluu picalafayya pakan.” 20Ti poonool, nkatah toko picala pa piteyii nkanapan Yéesu.
21Yéesu ápuful toko, nene acuk akee áyiin niŋ atuwoo nkayeno ti piteen niŋ paapaa ateyii Sepete, ti kaamemanool picala pa piteyii. Ucawii Saak niŋ Saŋ. Yéesu naayonkalii kapinapanoo. 22Tokotoko, nkatah toko piteen pa niŋ paapaa ateyii, nkanapan Yéesu.
Kanapan ka kiti uyoŋ wa Yéesu
23Púful toko, Yéesu naakaawool mah ma miti Galilee púlooŋ, naayeno kakalaŋan ti púluumuma pa piti Pusuwif pa, náatuunan ekooŋan ya éesuume ya eti cáwii ca citi Pútuun pa, náakuuñan kéekuuñe ka ti káakuuñu óo káakuuñu niŋ kéehute ka púlooŋ. 24Eehuu hiwune kiteyoo nkísiyo ti mah ma miti Siriya púlooŋ, nkácoopii teyoo pakan paka púlooŋ keetaake ka káakuuñu óo káakuuñu: keeyem ka íññiseeña, payenka kísaalumant nkúwuuliye ka, payenka nkanow ka niŋ kéehute ka, Yéesu náakuuñanii. 25Fiye uyoŋ weemeeŋe nuunapan Yéesu, kéefulii ti mah ma miti Galilee, Tekapol,#4:25 Ekina eyem: sisaatee ŋaasuwan seeyem pukol mah ma miti Galilee. Pisaatee piti keeneetaat Pusuwif pale intaako po lompo pakakee Pusuwif. Jerusalem, Judaay niŋ ti kikee kaapii ka kiti musuu ma miti Jordan.
Kuloonaay © Wycliffe Bible Translators, Inc. 2026.