Máciya 3
3
Saŋ-Patis kawañal ka kiteyoo pítin pa
1Sitiil sipimuus, áyiin aŋa nkasok Saŋ-Patis náafulii apiyeno káatuunan ekooŋan eyye ti káahaaŋ ka tes kiti Judaay, 2naasok: “Níwunko umuuyen wa utaaluu, kaatuko cáwii ca citi Pútuun pa cílohiyooloh!” 3Saŋ ayem aŋa ayaamakoola ya Esayi naasoke ya kiteyoo, asok:
“An oopa ti hiceeku ti káahaaŋ ka tes,
'niwañal pítin pa piti Ateeteyo,
nicoonanool ñítin ña ñiteyoo.'” #
Esayi 40:3
4Fiye Saŋ hísool ha hiteyoo henfakat ha eeha nawaso ha, heememanoolee niŋ pahan peeseñate piti puñonkomoo, nacenk ti hiñowuyoo peletoo eti kapaŋ. Nali pukoskos niŋ múkum. 5Tempo pakan keemeeŋe nkákeyii teyoo, poko kayem: pakati Jerusalem, pakati mah ma miti Judaay púlooŋ niŋ pisaatee pa púlooŋ péekinkoole pa musuu ma miti Jordan. 6Nkayeno ewatanoolo umuuyen wa uteyii hátikin pakan paka, Saŋ náahinii pátise ti musuu ma miti Jordan.
7Hícump Pufalisaay niŋ Pusatusaay nkákey pa naayeniye pa íhinu pátise. Pale ta Saŋ naacukii ta, naasokii: “Aluu mifepa emmuu! Ayme ákupanane aluu kati nitey paseeña pa piti Pútuun pa peeyem pa ti ékey? 8Níhin waah weenape samat nii enuun eyya nepuk papukal peenape. Fiyuu éfiyisan nii níwunkaawunko umuuyen wa utaaluu. 9Timpi nímiilool esokoolo nii: 'Unaa ufakaafak kamma Abraham naayem maamaa ati unaa.' Kaatuko inci pusok aluu, háati ti pínankiin empe Pútuun pa píyiniyini éfulanii epuuk pakati Abraham. 10Ehe hinahaane ha nihihintanee ti ñínkonk punuun pa. Enuun óo enuun eepukut papukal peenape, efeefiitee neewantee ti seemak.
11“Inci niŋ man inci ínhin aluu pátise píyisan nii níwunkaawunko umuuyen wa utaaluu. Pale, aŋa eeyem ya ti ékey pusonam ahaŋaam sempe, túuniit fala hiwaatu#3:11 Niŋ ekina tom: kaayekan pisamata pa piteyoo. Akina áfaahin aluu pátise niŋ Kunuu ka keenape ka niŋ seemak. 12Kaahelu ka kiteyoo unka ti epeesoo kati ákatinool pakak pa niŋ éheeni ya. Naamank pakak pa la ti pileefaan pa piteyoo, pale afaasowan éheeni ya ti seemak seehokiyantoo.”
Ihínuyee pátise ya eti Yéesu
13Ti oom caanak, Yéesu náaful ti mah ma miti Galilee, naakaay ti musuu ma miti Jordan, naaloh Saŋ ancuk Saŋ áhinoo pátise. 14Pale Saŋ náalafi hipooku, naasokoo: “Inci soolahe áapihinam pátise! Fiye weyme uwune awe ínkey ti inci?” 15Yéesu naañahanoo: “Kat hipitaako fo, kaatuko fiyuu éfuuhinaa púlooŋ eeha Pútuun pa mpílafiye ha.” Fiye Saŋ naacoon. 16Emma Yéesu náahinee ma pátise, náafulii ti man ma. Tokotoko, patiila ímpankino naacuk Kunuu ka kiti Pútuun pa nkúwanoonii samat nii hícuucuuku, nihileeho teyoo. 17Tokotoko, hilim níhifulii alacana, nihisok: “Aŋe ayem Añiinam aŋa inci íllafiye ya, teyoo inci intaake pásuumayam.”
Kuloonaay © Wycliffe Bible Translators, Inc. 2026.