Máciya 2
2
Hiyoopuyee ha Yéesu hiti keemeya ka picaaŋaŋ pa
1Yéesu naapukee ti saatee ya eti Betelehem ti mah ma miti Judaay ti caanak ca citi amansa ya Helot. Ta naapukee ta intaako pákayiin keemeya picaaŋaŋ pa, kéefulii pa caanak ca íncifulii pa, nkacol Jerusalem. 2Nkayeno kacakan: “Amansa ya ati Pusuwif pa eepukee ya, peyme naayem? Kaatuko ucukaacuk ecaaŋaŋ ya eteyoo néefulii,#2:2 Niŋ ekina tom: ucukaacuk ecaaŋaŋ ya eteyoo pa caanak ca íncifulii pa núukey hímuluyoo.”
3Ta amansa ya Helot náasiye ta hilim eehuu, naaliim niŋ lompo pakati Jerusalem púlooŋ. 4Naaconcenool ñíhampaatiin puwaaseena pa pakati Pútuun pa púlooŋ niŋ pikalaŋana hilim ha heesiiŋanee ha hiti Móyiis, naacakanii: “Peyme Eenucee ya ati Pútuun pa naañaŋee hipuku?” 5Nkañahanoo: “Ti saatee ya eti Betelehem ti mah ma miti Judaay. Kaatuko fiye ayaamakoola ya naakiice:
6 'Awe Betelehem, saatee ti mah ma miti Juda,
ti kikaw ka pakati Juda aahaŋut káataakaati nafaa;
kaatuko ti awe hikaw ha naakaakaay éfulii,
aŋa áfaatintiŋan ya pakanam pakati Israyel samat nii afaasa.' #
2 Samiyel 5:2; Mika 5:2 ”
7Fiye, amansa ya Helot náayonkalii ti piyolo keemeya ka picaaŋaŋ pa, náasi teyii teyme fanfaŋ ecaaŋaŋ ya néefulii. 8Púful toko, naapoñii kapikaay Betelehem, naasokii: “Nikaay, caniŋesatool pinap añii ya. Emma innicukoo ma, innisokam, inci lompo kati kaayoo hímulu.”
9-10Ta nkásiye ta pákupal amansa ya, nkakaay. Púful toko, nekacuk ecaaŋaŋ eyya nkacuke ya ta nkayeniye ta éfulii pa caanak ca íncifulii pa. Ta nkacuke ta ecaaŋaŋ ya, nkameeŋ niŋ pásuuma penfakat. Neenowii hátikin fo ta neecole ta la añii ya naayeniye la, neesiiŋo. 11Nkanako ti ekumpaan ya, nkacuk añii ya niŋ íññaa ateyoo Mari. Nkákilipo hátikin añii ya kápumuloo. Fiye, nkápankin pínnake pa piteyii nkawufanoo uwun: sanoo, caminkoloŋ éeciita hinoom niŋ munucu méesuume haaw emma nkasok miir.
12Púful toko, Pútuun pa mpúkupananii ti éyawut nii timpi kañoho pati amansa ya Helot. Fiye, nkacoop pikee pítin kapuñoho pati mah ma miteyii.
Katey ka Esipt
13Ta keemeya ka picaaŋaŋ pa nkayete ta, maleekoo eti Ateeteyo néefulii ti Josef ti éyawut, neesokoo: “Lito, coop añii ya niŋ íññaa ateyoo intey ti mah ma miti Esipt, kaatuko Helot afaaŋes añii ya kati amukoo. Yeno po fo ta inci fasoki ta ñóhoonii.” 14Fiye, Josef naalito naacoop añii ya niŋ íññaa ateyoo naakaay Esipt impisit. 15Naayeno po fo ta amansa ya Helot afaaket. Fiyuu intaakiye ancuk eeha Ateeteyo naasoke ha pínapii ti ayaamakoola ya hitaakiyaa, asok: “Yonkalaayonkal añiinam ápufulii Esipt.”#Hoseya 11:1
Helot himuku ha hiteyoo mikampaani ma
16Púful toko, amansa ya Helot ápipannum nii keemeya ka picaaŋaŋ pa kacaakooloo-caakool, inseeñoo meemak. Tempo naapoñe kapumuk mikampaani ma meetaake ma sitiil súsupak puwano t’etaam, meeyem ma Betelehem niŋ misaatee ma méekinkoole mo ma. Kaatuko afinaafin ti caanak enca keemeya ka picaaŋaŋ pa nkasokoo ta éfulii ya eti ecaaŋaŋ ya. 17Fiyuu eeha ayaamakoola ya Jeremiya naasoke ha nihitaakiye, asok:
18 “Nkási kaalalapanool ti saatee ya eti Lama,
pukooŋ niŋ káacoolan kenfakat.
Rasel ayem ti pukooŋ epuukoo,
álafiit apupuuñanoolee,
kaatuko kaneetaat.” #
Jeremiya 31:15
Eñóhoonii ya Naasalet
19Pamuusal eket ya eti amansa ya Helot, maleekoo eti Ateeteyo néefulii ti Josef ti éyawut ti mah ma miti Esipt. 20Neesokoo: “Lito, coop añii ya niŋ íññaa ateyoo, iññoho ti mah ma miti Israyel, kaatuko kéelafiye ka himuku añii ya kaketaaket.” 21Josef naalito, naacoop añii ya niŋ íññaa ateyoo, naañoho ti mah ma miti Israyel. 22Pale, ta náasiye ta nii Aakelayos atoone cáwii ca citi paapaa ateyoo Helot ti mah ma miti Judaay, naafe po pikaayu. Fa náakupananee fa ti éyawut, náaful apikaay ti mah ma miti Galilee. 23Naakaay apicaakin ti saatee ya eti Naasalet. Fiyuu intaakiye ancuk eeha piyaamakoola pa nkasoke ha hitaakiyaa, nii afaasokee ati Naasalet.
Kuloonaay © Wycliffe Bible Translators, Inc. 2026.