Máciya 27
27
Hicoopuyee ha hiti Yéesu pati Pilaat
1Eti kacom eteyyo mpucom mic, ñíhampaatiin puwaaseena pa pakati Pútuun pa púlooŋ niŋ ñíhampaatiin ña pakati pakan paka, nkateŋenool kati kamuk Yéesu. 2Fiye nkacenkoo, nkacoopoo nkawufanoo Pilaat, ati hikaw ha ati Judaay, aŋa amansa ya enfakat a ati Room naasiiŋane ya toko.
Ewaŋoolo ya eti Judas
3Púful toko, Judas, éefule ya ti Yéesu, náapannum nii Yéesu áhineehin kíiti, fiye towiit waah fo himukuyoo, naawatanoolo. Naañoho kati añahan ñíhampaatiin puwaaseena pa pakati Pútuun pa niŋ ñíhampaatiin ña pakati pakan paka síkotifoloo áwii niŋ ŋaasuwan ya (30) ensa nkacooyoo sa ápuful ti Yéesu. 4Naasok: “Inci muuyenaamuuyen, kaatuko fúlaaful ti áyiin éehinut waah kati amukee!” Pale nkasokoo: “Putum unii pineetaat toko. Eehuu hitii.” 5Fiye Judas naawant mañ ma ti hank ha hiti ekumpaan ya enfakat ya eti Pútuun pa, naakaay naacaawaŋ faŋoo.
6Fiye, ñíhampaatiin puwaaseena pa nkayes mañ ma nkasok: “Hilim ha heesiiŋanee ha hicoonut hicoopu mañ emmuu mipimankee ti émankuma ya eti ekumpaan ya enfakat ya kaatuko mañ miti hísim.” 7Fiye nkateŋenool, nkásiyool nkacoop mañ ma kapunoom kaakit ka kiti ateefa pipala pa, ancuk kati káhin ko íhokuma ekaawoola. 8Ekina ewune kaakit enkuu nkusokee fo fíyooy “Kaakit kiti hísim.” 9Fiyuu eeha ayaamakoola ya Jeremiya naasoke ha nihitaakiye, asok: “Nkacoop síkotifoloo áwii niŋ ŋaasuwan ya (30), cooy eyya pakati Israyel nkacoone ya kati kacooy hak akina. 10Nkacoop so kapunoom kaakit ka kiti ateefa pipala pa, samat nii fa Ateeteyo Pútuun pa mpusokaam fa.”#Jeremiya 32:6-9; Sakaliya 11:12-13
Yéesu hátikin Pilaat
11Fiye, Yéesu naasiiŋo hátikin Pilaat, ati hikaw ha ati Judaay. Pilaat naacakanoo: “Fo awe yem amansa ya ati Pusuwif pa?” Yéesu naañahanoo: “Awe soke ho.” 12Ñíhampaatiin puwaaseena pa pakati Pútuun pa niŋ ñíhampaatiin ña pakati pakan paka nkanook Yéesu pale asokut waah. 13Fiye, Pilaat naasokoo: “Fo áasiit eeha púlooŋ nkayemuu ha ti hinooku?” 14Pale Yéesu añahanutoo háati poonool ti eeha nkanookoo ha, Pilaat ínnimoo meemak.
15Etiil óo etiil ti pahaaño pa piti Himuusu ha, Pilaat asalaasal kakatan oonool ti keekulee ka aŋa pakan paka nkálafiye. 16Ti oom waati intaako eekulee aŋa éesiyye, aŋa nkasok Palapas.#27:16 Niŋ ekina tom: Yéesu Palapas 17Fiye ta kayoŋ ka nkuconcooliye ta, Pilaat naacakanii: “Fo ayme ínnilafiye pikatan aluu? Palapas, fo Yéesu aŋa nkasok a Eenucee ya ati Pútuun pa?” 18Pilaat ámeyimeyi nii ñíhampaatiin puwaaseena pa niŋ ñíhampaatiin ña pakati pakan paka kawufanoowufan Yéesu kamma paheeka.
19Ta Pilaat naayeniye ta ti híkon ha hiti éhinuma kíiti ya, aaloo naapoñ teyoo an niŋ hilim eehe: “Ayíin aŋuu eecoonoole, timpi hínoo waah, kaatuko fíyooy inci kallaakallo meemak ti éyawut kamma akina.”
20Pale ñíhampaatiin puwaaseena pa niŋ ñíhampaatiin ña pakati pakan paka nkáluuŋ kayoŋ ka kupusok Pilaat akatan Palapas, Yéesu naamukee. 21Pilaat naacakan kayoŋ ka: “Ti payenke t’ésupakii, ayme ínnilafiye pikatan aluu?” Nkiñahanoo: “Palapas!” 22Pilaat naasokii: “Ooto puume inci fáhin Yéesu aŋa nkasok a Eenucee ya?” Poko púlooŋ nkasok: “Apempeŋee ti kuluwaa!” 23Pilaat naañahanii: “Weyme uwune? Eeheyme heenaput náahine?” Pale nkahaŋ nkaceeke kapusok: “Apempeŋee ti kuluwaa!”
24Ta Pilaat naacuke ta nii átayini íhinu waah, kayoŋ ka nkutowotowo ti pahampanane, naacoop man, naañow sipeesoo hátikin kayoŋ ka naasok: “Inci kuulanoolaa-kuulanoolo ti hísim áyiin a aŋe. Eehuu hitaaluu!” 25Pakan paka púlooŋ nkañahanoo: “Hísimoo hínowii toonii niŋ ti epuuk unii!” 26Fiye Pilaat naakatanii Palapas. Pale náahin kapisap Yéesu niŋ kisawut, naawufanoo pusoocaali pa kati apempeŋee ti kuluwaa.
Káapalahool kiti pusoocaali pa Yéesu
27Fiye, pusoocaali pa pakati Pilaat, ati hikaw ha ati Judaay, nkacoop Yéesu pati ékinuma ya eti Pilaat, nkaconcenool pusoocaali pa púlooŋ keeyem ka ti kayoŋ ka kiteyii kápikiipooloo. 28Nkawaat wañ wa uteyoo, nkásooloo hísool henfakat héecunke samat nii amansa. 29Nkacoop mífiitiin miti pícankun nkaliil mo samat nii éwuulu eti amansa, nkasoof yo ti hikaw Yéesu. Nkanaŋ hikasap ti epeesoo yáali. Nkákilipo hátikinoo nkayeniyoo káapalahool kapusok: “Ukicanuu, awe amansa ya ati Pusuwif pa!” 30Nkafaac teyoo, nkacoop hikasap ha nkayeniyoo hisapu ti hikaw. 31Ta nkapayoo ta káapalahool, nkawaat hísool ha henfakat ha, nkásooloo wañ wa uteyoo. Fiye nkacoopoo kati kapempeŋoo ti kuluwaa.
Kaapempeŋee ka kiti Yéesu ti kuluwaa
32Fiye, ta pusoocaali pa nkayeniye ta hicoopu Yéesu tíkitaaŋ saatee ya, nkapaakool niŋ áyiin aŋa nkasok Simon, eeyem ya cosaanoo Silen. Nkáhinoo ti sempe apikanto kuluwaa ya eti Yéesu. 33Nkacol la nkasok la Golgota, ekina eyem “Esent.” 34Nkawufanoo wiiñ eenakanoolee niŋ waah weesampa apilaan, pale ta naasiikane yo ta, naapook yo pálaani. 35Fiye, nkapempeŋoo ti kuluwaa ya. Pusoocaali pa nkañak kaakaaw kápipaacinool wañ wa uteyoo. 36Fiye nkayeno toko look kapifaasoo. 37Patiila hikawoo nkawas pakiical pa péeyisane pa heewune ha naamukee, pusok: Aŋe Yéesu, Amansa Ya Ati Pusuwif Pa.
38Toko lompo pikanca pákasupak nkapempeŋee neyoo, akee ti epeesoo yáali akee ti epeesoo yaamay. 39Pumuusa pa nkamukoo niŋ pisaan, nkasap kikawii. 40Nkasok: “Awe eesoke ya nii aafahancalool ekumpaan ya enfakat ya eti Pútuun pa illut yo ti kunoom kíhaaciil, fiye fakanoolo! Wánoonii ti kuluwaa ya, niŋ awe yem Añii ya ati Pútuun pa!” 41Moonool-moonool muu, ñíhampaatiin puwaaseena pa pakati Pútuun pa, pikalaŋana hilim ha heesiiŋanee ha hiti Móyiis niŋ ñíhampaatiin ña pakati pakan paka nkápalahooloo, nkasok: 42“Pakakee pakan naafakane, pale ayinaat kafakan faŋoo! Niŋ pánipani akina ayem amansa ya ati Israyel, áwanoonii féefiye ti kuluwaa ya, fiye núuyinanaa teyoo. 43Pútuun pa naahintiye. Fiye Pútuun pa pifakanoo niŋ pílafiyoolafi, kaatuko asok, 'Inci yem Añii ya ati Pútuun pa.'” 44Moonool-moonool muu, pikanca pa pákasupak paka keepempeŋee ka neyoo, nkamukoo lompo niŋ pisaan.
Eket ya eti Yéesu
45Kápiliŋ máamun caanak ca ti hikaw, énimaan neeyeno ti mah ma púlooŋ fo sitalaŋ síhaaciil. 46Máamun sitalaŋ síhaaciil, Yéesu náaceekii niŋ kaawiiluyoo apusok: “Eli, eli, lema sapaktani?” ekina eyem “Pútuun pa putoom, Pútuun pa putoom, weyme uwune ankatanam?”#Kícimu 22:1
47Ta pakakee keesiiŋiye ka toko nkásiye ta eehuu nkasok: “Oopa ti kaayonkal ayaamakoola ya Elí!” 48Tokotoko, akee teyii naatey ápucoopii cífiitiin epons. Náapuuc co ti wiiñ eesipe, naacenk co ti hikasap apuwufan Yéesu kati alaan. 49Pakakee paka nkasok: “Túul! Usincanaa man ayaamakoola ya Elí áfaakey apifakanoo.” 50Yéesu nene áceekii niŋ kaawiiluyoo, naasuuŋut pikelan.
51Ti oom káasiiŋuma, kahuuy ka kenfakat ka keeyem ka páhantuwa ekumpaan ya enfakat ya eti Pútuun pa nkihaaco ti upii úsupak kápiliŋ patiila fo t’etaam. Etaam ya néeyiyiŋan, pínankiin pa mpífecuto, 52kiyaak ka nkípankino. Hícump puhunuŋ piti keesampanee ka pakati Pútuun pa mpílitaniyee ti eket. 53Pamuusal élitaniyee ya eti Yéesu ti eket ya, nkáfulii ti kiyaak ka nkanako Jerusalem, saatee ya eesampanee ya, nkáyisanoolo ti hícump pakan.
54Ahámpaatiin asoocaali ya niŋ keeyem ka neyoo ti efaas Yéesu kapucuk páyiyiŋanal etaam ya niŋ heetaakiye ha púlooŋ, nkafe meemak nkasok: “Pánipani, aŋe Añii Pútuun!”
55Intaako toko hícump pakaal kéenapoolii niŋ Yéesu kápiliŋ Galilee kati kamankooloo. Fiye, nkayeno ésincanii pállaaŋe. 56Teyii intaak Mari ati saatee ya eti Makatala, Mari íññaa ya ati Saak niŋ Josef, niŋ íññaa ya ati Sepete epuukoo pákayiin pákasupak paka.
Ehok ya eti Yéesu
57Púful toko, máamun nkániim, intaak usaanum ati saatee ya eti Alimataay, caacawoo Josef, éeyenoonii lompo anapana ati Yéesu. 58Naakaay pati Pilaat naacakanoo ehunuŋ ya eti Yéesu. Fiye Pilaat naasok kawufanoo yo. 59Josef naacoop ehunuŋ ya, naakuup yo niŋ kahuuy keekuule kiti ehok. 60Naahok yo ti hiyaak héeyeeni eeha naawake ha hak akina ti kawuŋ énankiin. Náapalinkan énankiin enfakat ti putum hiyaak ha, naakaay. 61Mari ati saatee ya eti Makatala niŋ akee Mari ya nkayeno toko look púcoonool hiyaak ha.
Hifaasuyee ha hiti hiyaak ha
62Eti kacom eteyyo, hinoom ha hiti kayeno ka, ñíhampaatiin puwaaseena pa pakati Pútuun pa niŋ Pufalisaay pa nkakaay ti coonool pati Pilaat. 63Nkasokoo: “Ahámpaatiin, únawunaanawuno nii ta naayeniye ta kaloŋa, acaakoola ya aŋuu asok, 'Pamuusal kunoom kíhaaciil inci fálitaniyee ti eket ya.' 64Káluma, ufan hilim nii, hiyaak ha hifaasee fo kunoom kíhaaciil. Ancuk pinapana pa pakateyoo timpi kakaay kápilip ehunuŋ ya eteyoo nkasok pakan paka nii alitaalito ti eket ya. Kincaam ka kikelan enke efikumuus kíyaañ ka.”
65Pilaat naañahanii: “Nicoop pufaasa, nikaay innifaas hiyaak ha meemak fa inniyina fa.” 66Fiye nkakaay, nkamincan hiyaak ha, nkacotal énankiin ya eepanke ya putum hiyaak ha, nkasiiŋan pufaasa kapifaas ho.
Kuloonaay © Wycliffe Bible Translators, Inc. 2026.