Máciya 28
28
Pilito pa piti Yéesu ti eket ya
1Pamuusal hinoom ha hiti kayeno ka, Timaas ya nuulap, Mari ati saatee ya eti Makatala niŋ akee Mari ya nkakaay kaasincan hiyaak ha hiti Yéesu. 2Tokotoko, etaam ya néeyiyiŋan meemak, kaatuko maleekoo eti Ateeteyo éwanoonii épufulii alacana, neekaay néepalinkan énankiin ya eepantane ya hiyaak ha, neeyeno teyyo. 3Pacuk eteyyo mpucuk nii pamaliñoolal, wañ eteyyo núuhiini nii pelekaanoo. 4Pufaasa pa nkaket niŋ ewatate ta nkacuke yo ta, nkakikilan nkalamo pucuk fiye nii keekete.
5Fiye, maleekoo ya neesok pakaal paka: “Timpi nife, kaatuko inci méyimeyi nii Yéesu eepempeŋee ya ti kuluwaa ya inniyem ti hiŋes. 6Aneetaat le, alitaneelitan ti keekete ka samat nii fa naasoke fa. Níkey nisincan la ehunuŋoo neehintanee la. 7Fiye nihiliikan canisok pinapana pa pakateyoo: 'Alitaneelitan ti keekete ka, nísiitan oopa ti pikaay ti mah ma miti Galilee hátikin aluu. Po efinicukoo.' Eehe inci ínkeyii aluu hisoku.”
8Fiye pakaal paka nkahiliikan kápuful ti hiyaak ha, ti ewatate pale nkameeŋ pásuuma, nkatey kapica kakaman eehuu pinapana pa pakateyoo. 9Tokotoko, Yéesu naapaakoolanii naasokii: “Kásuumaay!” Nkákey teyoo nkacok wootoo nkámuloo. 10Fiye, Yéesu naasokii: “Timpi nife, nikaay canisok pakanam ti káyinan kakaay Galilee, po efikacukam.”
Kakaman ka kiti pufaasa pa
11Púful toko, pakaal paka ti pikaayu pa pati pinapana pa, pakakee ti pufaasa pa keeyeniye ka efaas hiyaak ha nkakaay ti saatee ya. Nkakaman ñíhampaatiin puwaaseena pa pakati Pútuun pa heetaakiye ha púlooŋ. 12Ñíhampaatiin puwaaseena pa nkaconcoolo niŋ ñíhampaatiin ña pakati pakan paka nkateŋenool eeha éfikahin. Nkawufan pusoocaali pa hícump mañ. 13Nkasokii: “Niñaŋaa hisoku eehe nii, pinapana pa pakateyoo kákeyii níhanant, nkálip ehunuŋ ya eteyoo aluu ti hiŋotu. 14Niŋ Pilaat, ati hikaw ha ati Judaay, ásiyaa eehuu, unii éfuukup neyoo, etinitaak kúnuul.” 15Fiye pusoocaali pa nkacoop mañ ma, nkáhin eeha nkasokee ha. Hilim eehuu nihihancaloolo meemak ti Pusuwif pa háati fo fíyooy.
Kúmpoña ka keemaka ka
16Púful toko, pinapana pa ŋaasuwan niŋ oonool a nkakaay Galilee, ti tíntiŋ ya eyya Yéesu naasokii ya kakaay. 17Po nkacuke Yéesu, nkámuloo, pale pakakee nkataak kunuu kúsupak. 18Yéesu naalohii naasokii: “Inci ufaneewufan sempe sa púlooŋ siti alacana niŋ t’etaam. 19Ooto nikaay ti púlunta pa púlooŋ, innitaak pinapana ti pakan paka púlooŋ; ínnihinii pátise ti caacaw ca citi Paapaa ya, citi Añii ya niŋ citi Kunuu ka keenape ka, 20ínnikalaŋanii káputuul waah óo waah ewwa inci insoke wa aluu. Pánipani, inci oopa niŋ aluu tan óo tan fo ti pikelan caanak ence.”
Kuloonaay © Wycliffe Bible Translators, Inc. 2026.