Máciya 26
26
Piteŋenool himuku Yéesu
1Ta Yéesu naapaye ta hisoku kilim enke púlooŋ, naasok pinapana pa pakateyoo: 2“Nímeyimeyi nii kunoom kúsupak kutowiye le niŋ pahaaño pa piti Himuusu ha. Tempo, inci, Añii An, fawufanee kati pempeŋee ti kuluwaa.”
3Ti oom waati lompo, ñíhampaatiin puwaaseena pa pakati Pútuun pa niŋ ñíhampaatiin ña pakati pakan paka nkaconcoolo lati hank ha hiti awaaseena ya enfakat a aŋa nkasok a Kayif. 4Nkásiyool kati kacok Yéesu ti piyolo#26:4 Niŋ ekina tom: ti kincaakool nkamukoo. 5Pale nkasok: “Uñaŋutoo hicoku ti pahaaño pa piti Himuusu ha, ancuk pakan paka timpi kawen ti káñiken.”
Hinucuyee ha hiti Yéesu Betani
6Fiye, Yéesu naakaay ti cisaatee ca citi Betani. Naayeno ti ekumpaan ya eti Simon aŋa mpaataak ya kanuk ka. 7Yéesu naayeno hili ti taapul ya niŋ pinapana pa pakateyoo. Ta nkayeniye ta toko, akee aal náakey teyoo niŋ cílumpa ceewalla kaameeŋ munucu méesuume haaw méeciita hinoom, naaniis mo ti hikaw Yéesu. 8Ta pinapana pa nkacuke ta eehuu, inseeñii nkasok: “Káapucalool puume unke? 9Munucu emme anti munoomanee hícump mañ, oom mañ ummuwufanee keeleke ka.”
10Yéesu náameyi eeha nkayeniye ha hisoku, naasokii: “Weyme inniyem ti kayokan aal a aŋe? Heenape náahinaam. 11Keeleke ka efikayeno niŋ aluu tan óo tan, pale inci etinitaakam tan óo tan. 12Aniisaaniis munucu emme ti eniinam kati amemanool ehok ya etoom. 13Inci pusok aluu pánipani ya, pan óo pan pa ekooŋan ya éesuume ya eyye néetuunanee ti púlunta pa púlooŋ, eeha náahine ha efihisokee ancuk náanawuniyee.”
Judas hicoonu ha hiteyoo hífulu ti Yéesu
14Púful toko, akee ti pupoñapoñ pa ŋaasuwan niŋ pákasupak paka, aŋa nkasok a Judas Iskaliyot, naakaay pati ñíhampaatiin puwaaseena pa pakati Pútuun pa. 15Naacakanii: “Niŋ inci ufanaa aluu Yéesu, weyme efiniwufanam?” Fiye, nkafin síkotifoloo siyema áwii niŋ ŋaasuwan (30), nkacooyoo. 16Písik ti oom waati, Judas naayeno hiŋes káasiiŋuma keenape kati awufanii Yéesu.
Káciim ka kiti Himuusu ha
17Hinoom ha híyaañ ha hiti pahaaño pa piti Kúmpuul ka keetaakut ka leweñoo, pinapana pa nkákey ti Yéesu, nkacakanoo: “Peyme állafiye upumemanool aakati li káciim ka kiti pahaaño pa piti Himuusu ha?” 18Naañahanii: “Nikaay ti saatee ya ti akee áyiin innisokoo, 'Ahámpaatiin a asok nii: caanak ca citoom cílohaniyoo. Inci fali káciim ka kiti Himuusu ha niŋ pinapana pa pakatoom ti ekumpaan ya etii.'” 19Fiye pinapana pa nkakaay, nkáhin eeha Yéesu naasokii ha, nkamemanool káciim ka kiti Himuusu ha.
20Ta ínciniimiye ta, Yéesu naayeno ti taapul ya niŋ pupoñapoñ pa ŋaasuwan niŋ pákasupak paka. 21Poko ti hili naasokii: “Inci pusok aluu pánipani ya, akee ti aluu áfaaful ti inci.”
22Pinapana pa ínciitiyii meemak, nkáyaañoo kacakan oonool oonool: “Ahámpaatiin, pale malla inci?” 23Yéesu naañahanii: “Akee ti aluu eeliye ya niŋ inci ti púus pa áfaaful ti inci. 24Inci, Añii An, faket samat nii fa inkiicee fa kutoom ti hilim ha hiti Pútuun pa. Pale kúnuul efikiyeno ti aŋa éefule ya ti inci, Añii An! Efifisak fala ti áyiin a aŋuu niŋ apukutee.”
25Fiye Judas, eekaakaay ya hífulu teyoo naasok: “Rabi, pale malla inci?” Yéesu naañahanoo: “Awe soke ho.”
26Poko ti hili, Yéesu naacoop hímpuul, naasampan ho, naafiit ho, naawufan ho pinapana pa pakateyoo, naasok: “Nicoop nili, aŋe eyem eniinam.” 27Fiye, naacoop elontoŋ eti elaan wiiñ, naasok Pútuun pa apalaka kiteyyo, naawufanii yo naasok: “Nilaan teyyo, aluu púlooŋ. 28Kaatuko aŋe hísimam héeyisane ha písiyool pa piti Pútuun pa niŋ pakan etempo, heeniisee ha hak hícump pakan umuuyen wa uteyii kati uponketee. 29Inci pusok aluu, etinene laan elaan wiiñ eyye fo ti hinoom ha ta inci inkaakaay ta pálaani éeyeeni niŋ aluu ti cáwii ca citi Paapaa atoom.” 30Fiye nkacook hícimu, nkáful kapikaay pati cítintiŋ ca enca nkasok ca Olif.
Kakaman ka kiti Yéesu pilaaco pa piti Piyeer
31Púful toko, Yéesu naasok pinapana pa pakateyoo: “Heekaakaayam ha pitaako hánant eehe efihiwun, aluu púlooŋ efinikatanam. Kaatuko kiiceekiic ti hilim ha hiti Pútuun pa nii:
'Inci famuk Afaasa ya,
písaacii pa piti koolee ya mpihancaloolo.' #
Sakaliya 13:7
32“Pale niŋ inci lítaniyee ti eket ya, fátikin aluu Galilee.”
33 Piyeer naasokoo: “Háati an óo an naakatani, inci etikatani múk.” 34Yéesu naañahanoo: “Inci pusoki pánipani ya, hánant eehe, káayiin ekutoon kúlookum, áafalaacin fo ñáhaaciil nii áameyiyam-méyi.” 35Pale Piyeer naañahanoo: “Háati inci faket niŋ awe, inci étilaacini.” Pakakee pinapana pa púlooŋ nkasok moonool-moonool muu.
Kaluum ka kiti Yéesu Ketsemane
36Púful toko, Yéesu naakaay niŋ pinapana pa pakateyoo la nkasok la Ketsemane, naasokii: “Niyeno le, inci inkaay paayee kaluum.” 37Naacoopool Piyeer niŋ Saak niŋ Saŋ, Sepete epuukoo pákasupak paka. Náayaañ hitaaku kúnuul niŋ páciite penfakat. 38Fiye naasokii: “Yaanam yoopiya emeeŋe niŋ kúnuul fo ti putum eket. Niyeno le ti kaasincan niŋ inci.”
39Naateeŋo caahinkiŋ ápilaaŋii, náakilipo puhooŋuyoo t’etaam naaluum: “Paapaa atoom, niŋ eficoon, fúlan elontoŋ ya eti kúnuul enke ti inci, apan timpi yeno ti pálafi pa putoom, pale ti pitii pa.” 40Fiye náañohoonii peti pinapana pa pakateyoo, náatookiyii ti hiŋotu. Naasok Piyeer: “Fo niyinaat putowo ti kaasincan niŋ inci fo waati yoonool? 41Nisincan inniluum ancuk timpi ninow ti híluuŋu. Kunuu ka kílafilafi, pale enii ya néelakum.”
42Naakaay púsupiyenu naaluum: “Paapaa atoom, niŋ coonut elontoŋ eyye kati éfulanee ti inci, fo taamanta inci laanut yo, álimaati eeha állafiye ha hitaako.” 43Fiye, nene áñohoonii, naatookii ti hiŋotu, kamma ñíkinii iññinapa.
44Yéesu naakatanii, naakaay nene, naaluum píhaaciyenu, nene asok moonool muu. 45Fiye, naañoho pati pinapana pa, naasokii: “Nitowo luu ti hiŋotu niŋ éyekunoolo.#26:45 Niŋ ekina tom: fo niloŋaa ti hiŋotu niŋ éyekunoolo? Nisincan, waati ya écoliyoo, inci, Añii An, ufanee ti sipees pumuuyena pa. 46Nilito! Ukaayaa! Ehe aŋa éefule ya ti inci, ácoliyoo!”
Hicokuyee ha hiti Yéesu
47Yéesu ti káakup, Judas, akee ti pupoñapoñ pa ŋaasuwan niŋ pákasupak paka, náacolii niŋ kayoŋ kenfakat kéeyekanii úkuntu niŋ kifiin. Payenkuu, ñíhampaatiin puwaaseena pa pakati Pútuun pa niŋ ñíhampaatiin ña pakati pakan paka kápoñiyii. 48Judas, eekaakaay ya hífulu ti Yéesu, asokiisok nii: “Aŋa inci inkaakaay ya kaasumpool akina, nicokoo.” 49Judas naacoonool ciit pati Yéesu, naasokoo: “Rabi, kásuumaay!” Naasumpooloo. 50Yéesu naañahanoo: “Awíyam, hín eeha ánkeyii ha íhinu.” Fiye pakan paka nkákey ti Yéesu, nkacokoo. 51Tokotoko, akee ti keeyeniye ka niŋ Yéesu náañakii káakuntu ka kiteyoo, naafiit cat kaanuu amiikan a ati awaaseena ya enfakat a.
52Fiye, Yéesu naasokoo: “Ñahan káakuntu ka kitii la nkúfulii la, kaatuko an óo an aŋa nátaakool niŋ káakuntu, káakuntu lompo efikumukoo. 53Fo cukuucuk nii inci yinaat kaluum Paapaa atoom ápupoñiyam mpacas pumaleekoo púwuli? 54Pale niŋ eehuu hitaakiyaa, puume heekiicee ha ti hilim ha hiti Pútuun pa efihitaako? Hisok nii: fo hitaako samat nii fiye.”
55Fiye, Yéesu naasok kayoŋ ka: “Fo inci akanca? Weyme ínnikeyii hicokuyam niŋ úkuntu niŋ kifiin? Hinak óo hinak inci iyyeno kakalaŋan ti hank ha hiti ekumpaan ya enfakat ya eti Pútuun pa, nicokutam. 56Pale eehe púlooŋ hitaakaataako ancuk eeha piyaamakoola pa nkakiice ha hitaakiyaa.” Fiye pinapana pa púlooŋ nkakatanoo nkatey.
Yéesu hátikin awaaseena ya enfakat a
57Púful toko, keecoke ka Yéesu nkacoopoo pati Kayif, awaaseena ya enfakat a ati Pútuun pa, la pikalaŋana hilim ha heesiiŋanee ha hiti Móyiis niŋ ñíhampaatiin ña pakati pakan paka nkaconcooliye la. 58Piyeer ti pílaaŋ naayeniye kanapan Yéesu, fo lati hank ha hiti awaaseena ya enfakat a. Naanako naayeno niŋ pufaasa pa kati acuk heekaakaay ha pitaako.
59Ñíhampaatiin puwaaseena pa niŋ ñíhampaatiin píhina kíiti ya púlooŋ nkálafi himuku Yéesu. Fiye, nkaŋes keetantake payenka efikacaam kapunookoo. 60Pale kayinaat hitaaku la éfikatii, háati fa hícump nkákeyii fa kapicaam. Ti pikelan, pákasupak nkákey, 61nkasok: “Ayíin a aŋe asok: 'Inci yíniyini kaahancalool ekumpaan ya enfakat ya eti Pútuun pa, illut yo ti kunoom kíhaaciil.'”
62Fiye awaaseena ya enfakat ya naalito naasok Yéesu: “Fo aataakut eeha aafañahan? Weyme ankaakaay hisoku ti eeha nkanookuu ha?” 63Pale Yéesu naafatan. Awaaseena ya enfakat a naasokoo: “Sintoolo ti Pútuun pa peeyem pa kaloŋa, sok unii man awe yem Eenucee ya ati Pútuun pa, Añii ya ati Pútuun pa.” 64Yéesu naañahanoo: “Awe soke ho. Pale inci pusok aluu, písik fíyooy efinicuk inci, Añii An, iyyeniye ti epees yáali eti Pútuun pa piti sempe sa, iyyeno éfulii ti útiŋu wa uti patiila.#26:64 Niŋ ekina tom: iyyeno pikaayu patiila niŋ útiŋu wa”
65Fiye, awaaseena ya enfakat a naahaac hísool ha hiteyoo ápiyisan nii seeñooseeñ. Naasok pákawiyoo ñíhampaatiin: “Ateñalaa Pútuun pa! Usoolahutaa hísiyu hiti akee eetantake! Nisincan, fiye nísiyaasi kateñal ka. 66Eeheyme innicoke?” Nkañahanoo: “Añaŋee himuku!” 67Fiye, nkafaac ti puhooŋuyoo nkapaaŋaloo púcunki, pakakee paka nkahankaloo upaatuk. 68Nkasokoo: “Eenucee ya, yaamakool! Sok unii ayme ayemuu ti hisapu?”
Káalaacin ka kiti Piyeer kameye Yéesu
69Tempo, Piyeer naayeno ti hank ha, amiikan aal náakey teyoo naasokoo: “Awe lompo oonool ti keeyeniye ka niŋ Yéesu ati Galilee.” 70Pale Piyeer naalaaco hátikinii púlooŋ, naasok: “Inci míit eeha ayyem ti hisoku.”
71Fiye, naakaay pati putum pa, akee amiikan aal naacukoo, naasok pakan paka keeyem ka toko: “Ayíin a aŋe ayenaayeno niŋ Yéesu ati Naasalet.” 72Piyeer nene alaaco niŋ esintoolo: “Inci míit áyiin a aŋuu!”
73Fiyiit, keesiiŋiye ka toko nkaloh Piyeer, nkasokoo: “Pánipani awe oonool teyii, kaatuko pákupali pinakoolaa-nakool niŋ piteyii pa.” 74Fiye Piyeer naasintoolo apusok: “Ñanee, niŋ kincaam inci iyyaake, míit áyiin a aŋuu!” Tokotoko káayiin ekutoon nkúlookii. 75Fiye Piyeer náanawuno hilim eeha Yéesu naasokoo ha: “Káayiin ekutoon kúlookum, áafalaacin fo ñáhaaciil nii áameyiyaam-méyi.” Náaful tíkitaaŋ, naakooŋ meemak niŋ kúnuul.
Kuloonaay © Wycliffe Bible Translators, Inc. 2026.