Máciya 25
25
Hícantiitu hiti púmaacul ŋaasuwan pítiŋana amaañoo
1Yéesu nene asok: “Tempo, cáwii ca citi Pútuun pa eficinakool nii púmaacul ŋaasuwan keeyem ti kátiŋan amaañoo, keecoope pilampi pa piteyii nkáful kapuwant kapaakoolan asaya ya. 2Teyii intaako isak keesoŋatiye niŋ isak keecohatiye. 3Isak ya keesoŋatiye ka nkacoop pilampi pa piteyii pale kacoopoolut kálasiina.#25:3 Yéesu asok: lúuliin olif. Ti caanak ca citi Yéesu, lúuliin olif immicaaŋan pilampi pa piteyii. 4Isak ya keecohatiye ka nkacoopool kálasiina niŋ pilampi pa piteyii. 5Asaya ya náafiyoonii, fiye poko púlooŋ nkaŋoyal nkalam hiŋotu.
6“Mpisit pa akee náaceekii: 'Ehe asaya ya! Nífulii kapaakoolanoo!' 7Fiye púmaacul pa ŋaasuwan ya nkáyiyo nkamemanool pilampi pa piteyii. 8Isak ya keesoŋatiye ka nkasok isak ya keecohatiye ka: 'Niwun unii ti kálasiina ya etaaluu; pilampi pa putoonii umpa ti puhoko.' 9Pale keecohatiye ka nkañahanii: 'Haani! Etifom unaa púlooŋ. Nikaay pati punoomana pa ínninoomii faŋ aluu.' 10Isak ya keesoŋatiye ka nkakaay hinoom kálasiina ya, asaya ya náacolii pusonii. Isak ya keepaye ka ememanoolo nkanako neyoo lati pahaaño pa piti pinimo pa, hunkut ha nihipankee. 11Po hátikin, isak ya keesoŋatiye ka nkácolii, nkasok: 'Ahámpaatiin, Ahámpaatiin, pánkin unii!' 12Pale naañahanii: 'Inci pusok aluu pánipani ya, inci míit aluu.'”
13Yéesu nene asokii: “Fiye, aluu lompo nitowo ti kaasincan, kamma ínnimiit hinoom ha niŋ fotom waati ya eyya inci, Añii An, inkaakaay ya ékey.”
Hícantiitu hiti pimiikan pákahaaciil
14Yéesu nene asok: “Cáwii ca citi Pútuun pa eficinakool nii áyiin eeyem ti pítinoo piti kaakaawool, naayonkal pimiikan pa pakateyoo naañomanii hisaanumate ha hiteyoo. 15Naawufan an óo an teyii ti waah ewwa naayina newwo páhin: áyaañ a sipootak sanoo isak, ásupiyenu ya sipootak sanoo súsupak, áhaaciyenu ya epootak sanoo yoonool. Fiye naakaay kaakaawool ka kiteyoo. 16Ayíin a eewufanee ya sipootak sanoo isak, naakaay mpacas apiyesanool pisanoo pa, naataak sikee sipootak isak. 17Eewufanee ya lompo sipootak sanoo súsupak, naayesanool so naataak sikee súsupak. 18Pale áyiin a eewufanee ya epootak sanoo yoonool, naakaay naacaawak kaayeen ti etaam ya naayol epootak sanoo ya eti áhampaatiin a ateyoo.
19“Ta infiyye po hátikin, áhampaatiin a ati pimiikan pa payenkuu náañohoonii naacakanii puume nkáhine pisanoo pa piteyoo. 20Ayíin a eewufanee ya sipootak sanoo isak náakey, náacoopii sikee sipootak sanoo isak. Naasokoo: 'Ahámpaatiin, sipootak sanoo isak aññomanaam. Sincan, inci taakaataak sikee isak.' 21Ahámpaatiin a ateyoo naañahanoo: 'Aáhinaa kata, awe amiikan eenape eehintiyee! Aacoonoolaa-coonool niŋ waah wenkilis; inci fañomani hícump waah. Kéy páacinool ti pásuuma pa putoom.'
22“Ayíin a eewufanee ya sipootak sanoo súsupak lompo náakey, naasokoo: 'Ahámpaatiin, sipootak sanoo súsupak aññomanaam. Sincan, inci taakaataak sikee súsupak.' 23Ahámpaatiin a ateyoo naañahanoo: 'Aáhinaa kata, awe amiikan eenape eehintiyee! Aacoonoolaa-coonool niŋ waah wenkilis; inci fañomani hícump waah. Kéy páacinool ti pásuuma pa putoom.'
24“Fiye, áyiin a eewufanee ya epootak sanoo yoonool náakey, naasok: 'Ahámpaatiin, inci méyimeyi nii awe áyiin eefete, ammaañmaañ la ansukut, apan inconcenool pamaañal empa awwiisut. 25Inci feyaafe inkaay picaayol epootak sanoo ya etii ti etaam ya. Sincan, ehe sanoo ya etii.' 26Ahámpaatiin a ateyoo naañahanoo: 'Awe amiikan eenaput inkuuñ! Iyyoo! Aámeyimeyi nii inci immaañmaañ la inci insukut, inconcenool pamaañal empa uwwiisut? 27Ooto aañaŋaañaŋ himanku sanoo ya etoom ti émankuma mañ, ancuk niŋ inci ñóhooniyoo, insa yo niŋ waah weenanfe teyyo.'
28“Fiye naasok: 'Nicoop epootak sanoo ya eteyoo inniwufan yo aŋa eetaake ya sipootak ŋaasuwan. 29Kaatuko an óo an eetaake, afaapenanee, naataak fo muus. Pale, an óo an eetaakut, háati caahinkilis ya eyya naataake ya efeesayee teyoo. 30Fiye, niwant amiikan a aŋuu eetaakut a nafaa tíkitaaŋ ti énimaan ya, la efiyeno pukooŋ niŋ kaafincool úŋiiŋ.'”
Kíiti ya ekelan ya.
31Yéesu nene asok: “Niŋ inci, Añii An, kéyyoo ti hamakeyam, pumaleekoo pa púlooŋ niŋ inci, fayeno look ti elemeyu ya etoom eemaka ya. 32Pakan paka púlooŋ pakati púlunta pa efikaconcoolanee hátikinam, ínkatinool pakan paka samat nii fa afaasa nákatinool fa písaacii pa niŋ pifil pa. 33Fasiiŋan písaacii pa ti epeesam yáali, insiiŋan pifil pa ti epeesam yaamay.
34“Fiye inci Amansa ya fasok keeyem ka ti epeesam yáali: 'Aluu payenka Paapaa atoom naasampane ka, níkey innisa cáwii ca ceememanoolee ca hak aluu kápiliŋ ta púlunta pa mpiliilee ta. 35Kaatuko peep pucokaamcok inniwunam pili, pálaani mpucokam inniwunam pilaan. Inci yenaayeno akaawoola, inniwananam ti punuuf aluu. 36Iyyeno ñáfalfali ínnisoolam, ínkuuñ innimankoolam, iyyeno ti ékuluma ínnikeyyam hiyoop.'
37“Fiye, keecoonoole ka efikañahanam kapusok: 'Ateeteyo, teyme nuucukuu ti peep núukuumani, niŋ fotom pálaani mpucoki nuuwuni aapilaan? 38Teyme nuucukuu ayyeniye akaawoola nuuwanani ti punuuf unii, niŋ fotom ñáfalfali núusooli? 39Teyme nuucukuu ánkuuñe niŋ fotom ti ékuluma nuukaayi hiyoop?'
40“Inci Amansa ya fañahanii insokii: 'Inci pusok aluu pánipani ya, waah óo waah ewwa ínnihine ti eehaŋe ya káataakaati nafaa ti pakanam, inci ínnihine wo.'
41“Fiye, fasok keeyem ka ti epeesam yaamay: 'Níful hátikinam, aluu keeñanee ka, nikaay ti seemak sa siti cancowiyaaw, seememanoolee sa hak Seetaani ya niŋ pumaleekoo eteyyo. 42Kaatuko peep pucokaamcok niwunutam pili, pálaani mpucokam niwunutam pilaan. 43Inci yenaayeno akaawoola niwananutam ti punuuf aluu, iyyeno ñáfalfali nísoolutam, ínkuuñ iyyeno ti ékuluma niyankananutam.'
44“Fiye, efikañahanam nkasok: 'Ateeteyo, teyme nuucukuu ti peep niŋ fotom pálaani mpucoki niŋ fotom akaawoola niŋ fotom ñáfalfali niŋ fotom ti káakuuñu niŋ fotom ti ékuluma, uyankananuti?'
45“Inci Amansa ya fañahanii: 'Inci pusok aluu pánipani ya, waah óo waah ewwa innipooke íhinu ti eehaŋe ya káataakaati nafaa, inci innipook wo íhinu.'
46“Fiye, efikakaay pa efikasiiŋanee ti pisiya fo cancowiyaaw, pale keecoonoole ka nkakaay ti eloŋ ya eepayantoo ya.”
Kuloonaay © Wycliffe Bible Translators, Inc. 2026.