Máciya 24
24
Yéesu kakaman ka kiteyoo kiti heekaakaay ékey
1Púful toko, Yéesu náaful ti hank ha hiti ekumpaan ya enfakat ya eti Pútuun pa apiyeno pikaayu, pinapana pa pakateyoo nkalohoo nkáyisanoo palutal pa piti ekumpaan ya enfakat ya. 2Pale naasokii: “Nicukaacuk kiniŋ enkuu púlooŋ? Inci pusok aluu pánipani ya, an atacuk énankiin eenaŋiye ti ekee, efipitahalee púlooŋ.”
3Púful toko, Yéesu naayeno ti cítintiŋ ca enca nkasok ca Olif, pinapana pa pakateyoo nkakaay teyoo lamayii nkasokoo: “Sok unii, eehuu, teyme nihikaakaay pitaako? Weyme efuuyeno píyisan pa piti ékey ya etii niŋ piti pikelan caanak ence?”
4Yéesu naañahanii: “Nisiiŋo púsooni, an timpi acaakool aluu. 5Kaatuko hícump pakan éfikakey ti caacawam kapusok: 'Inci yem Eenucee ya ati Pútuun pa!' Efikacaakool hícump pakan. 6Efínisi kiti kikam niŋ káacamutool kikam, pale timpi niliim kaatuko eehuu hiñaŋaa pitaako, pale pikelan caanak ence puloot púcolii. 7Mah éfimitaakoolan mah, cáwii íncitaakoolan cáwii. Efitaako púpankul niŋ páyiyiŋanal etaam pan óo pan. 8Pale eehuu púlooŋ hicukaacuk nii púcook ñíseeña ñiti hipuku.
9“Ti oom caanak, pakan paka púlooŋ efikanat aluu kamma inci. Efikacok aluu, nkakallan aluu, nkamuk aluu. 10Fiye, hícump pakan éfikaful ti káyinan ka kiteyii, nkáful ti pakakee paka, nkanatool. 11Hícump keeneetaat ka piyaamakoola pánipani éfikafulii nkacaakool hícump pakan. 12Heenaput ha efihihaŋ toko, ekina ewune pálafi pa piti pakan keemeeŋe mpikaakaay ékaasino. 13Pale, an óo an eemukute fo ti pikelan afaafakanee. 14Ekooŋan ya éesuume ya eyye eti cáwii ca citi Pútuun pa éfeetuunanee ti púlunta pa púlooŋ, ancuk pakan paka púlooŋ kásiyaa yo. Tempo, pikelan caanak ence éfipikey.
15“Ta infiyye, ayaamakoola ya Dañel naasoke nii waah weenaput efuusiiŋanee la sampanee la, ewwa efuuwun ekumpaan ya enfakat ya eti Pútuun pa néeful ti pakuul eteyyo.” (Eekalaŋe eehe añaŋaa hísiyu!) “Niŋ nicukaa eehuu, 16keeyem ka ti mah ma miti Judaay kañaŋaa katey pati pítintiŋ pa. 17Aŋa eeyem patiila piteefu ekumpaan timpi áwanoonii apinako páhantuwa hicoopu waah. 18Aŋa eekaaye piya, añaŋut puñoho t’enuuf hicoopu hísool ha hiteyoo henfakat ha. 19Kunoom enkuu efikiyeno keeseeñe ti pakaal paka keeyem ka niŋ munow niŋ keeyem ka ti káacuuwan! 20Niluum Pútuun pa katey ka kitaaluu timpi hitaako ti caanak citi pamon niŋ fotom hinoom ha hiti kayeno ka. 21Kaatuko ti oom caanak efitaak kúnuul kenfakat keetaapala kitaako kápiliŋ púcook púlunta pa fo fíyooy. Apan etinene hitaako. 22Niŋ Pútuun pa pucoonut hínum káakaasin kunoom enkuu, an atafak, pale kunoom enkuu éfikikaasinee kamma payenka mpimamale ka. 23Ti oom caanak, timpi níyinan an eesoke aluu 'Nisincan, ehe Eenucee ya ati Pútuun pa!' niŋ fotom, 'Ahaayoo pa!' 24Kaatuko pakakee éfikakey kapucokoolo nii Eenucee ya niŋ fotom piyaamakoola, éfikahin píyisan niŋ weecukantee kati kacaakool háati keemamalee ka, niŋ éfihiyini pitaako. 25Nisincan, sokaasok ho aluu le niŋ efihitaako.
26“Fiye, niŋ an asokaa aluu: 'Aha Eenucee ya pati káahaaŋ ka tes,' timpi nikaay po, niŋ fotom 'Eheeyoo le ti ékaap ye,' timpi níyinan ho. 27Kaatuko inci, Añii An, éfikey samat nii fa pamaliñoolal etiil námaliñoolii fa pa caanak ca íncifulii pa fo pa incinow pa. 28Lan óo lan la ehunuŋ neeyem, toko píketul pa mpuconcool.
29“Emma kúnuul ka kiti kunoom enkuu efikipa ma,
caanak ca éficiniman,
hiim ha etihicaaŋ;
picaaŋaŋ pa éfipunowii púpufulii patiila,
sempe óo sempe siti patiila ínsiyiyiŋan. #
Esayi 13:10; 34:4; Sowel 2:10
30“Tempo, píyisan pa piti inci, Añii An, éfipufulii patiila. Fiye písii pa púlooŋ piti púlunta pa efipiyeno esampoolo. Efipucuk inci, Añii An, ti éfulii ti útiŋu wa uti patiila niŋ sempe niŋ hamake henfakat. 31Kámpiis kenfakat efikusok, inci ímpoñii pumaleekoo pa putoom ti púlunta pa púlooŋ, mpuconcoolan payenka inci immamale ka písik ti kaapii koonool kiti púlunta pa fo ti kikee kaapii.
32“Fiye, nikalaŋ ti enuun sootoo ya: innicukaa unaay wa núucepenii, ínnimeyi nii etiil ya élohaniyoo.#24:32 Niŋ ekina tom: pasowe pa púlohaniyoo 33Fo lompo incuke, innicukaa eehe púlooŋ ti pitaako, ínnimeyi nii ékey ya eti inci, Añii An, élohanii#24:33 Niŋ ekina tom: caanak ca cílohiyooloh tokofiye. 34Inci pusok aluu pánipani ya, ekaay eyye etepa eket ekina peecukut enke fiye púlooŋ nkitaakiye. 35Patiila niŋ t’etaam éfikacim, pale kilim ka kutoom étikicim.
36“Pale kiti hinoom eehuu niŋ waati ya an ámiit ho, háati pumaleekoo pa peeyem pa alacana, focaa inci Añii ya, pale Paapaa ya lamma ameya.
37“Samat nii fa intaakiye fa ti caanak ca citi Nowe,#Púcook 6–9 fo lompo inkaakaay pitaako ti ékey ya eti inci, Añii An. 38Kaatuko ti kunoom enkuu le niŋ kaahootan ka, pakan paka nkayeno hili, pálaani, esa niŋ pinimo fo ti hinoom eeha Nowe náayuukiye ha ti piteen pa penfakat pa; 39kámiit heekaakaay ha pitaako fo ta kaahootan ka nkíkeyii ta nkucoopii púlooŋ. Fo lompo facuk ti ékey ya eti inci, Añii An.
40“Tempo pákayiin pákasupak efikayeno ti kaakit; oonool áfaaseepinee, akee ya naakatee toko. 41Pakaal pákasupak efikayeno pútuum ti ésiken yoonool; oonool áfaaseepinee, akee ya naakatee toko.
42“Ooto nitowo ti kaasincan, kamma ínnimiit hinoom eeha Ateeteyo ataaluu áfaakey. 43Pale nímeyi eehe: niŋ ati ekumpaan ya ameya teyme álipa ya naakaakaay ékey hánant, anti atowo ti kaasincan atakat ekumpaan ya eteyoo epihaatee. 44Ekina ewune aluu lompo nisiiŋo púsooni kaatuko inci, Añii An, éfikey ti waati eyya étinininkoolam.
45“Ooto, ayme ayem amiikan a eehintiyee ya, naacohato, aŋa áhampaatiin a naañomane páhin pa piti ekumpaan ya kati ápaacinool paliyal pa pakakee pimiikan pa niŋ caanak ca cítuuniyaa? 46Amiikan a aŋuu, niŋ áhampaatiin a áñohooniyoo, náatookiyoo ti oom páhin, áfaanapiyanee. 47Inci pusok aluu pánipani ya, afaañomanoo hitaaku ha hiteyoo púlooŋ. 48Pale niŋ amiikan a eenaput a aŋuu asokooliyaa, 'Ahámpaatiin a atoom áfiyooniyoo,' 49fiye náayaañ hisapu pákawiyoo pimiikan, naayeno hili niŋ pálaani niŋ ñúkumana. 50Ahámpaatiin a ati amiikan a aŋuu áfaañohoonii ti hinoom eeha náaninkoolutee ha niŋ ti waati eyya náamiit. 51Afaakallan meemak amiikan a aŋuu, naayenanoo pati ñícuf ña, la efiyeno pukooŋ niŋ kaafincool úŋiiŋ.”
Kuloonaay © Wycliffe Bible Translators, Inc. 2026.