Máciya 23
23
Káwasum pikalaŋana hilim ha heesiiŋanee ha niŋ Pufalisaay pa
1Fiye Yéesu naasok kayoŋ ka niŋ pinapana pa pakateyoo: 2“pikalaŋana hilim ha heesiiŋanee ha hiti Móyiis niŋ Pufalisaay pa, páhinii piyem káacenkin hilim ha heesiiŋanee ha hiti Móyiis. 3Ooto niñaŋaa hítuulu ínnihin eeha púlooŋ nkasok ha aluu, pale timpi níyipenan pawenalii. Kaatuko káhinantoo eeha nkátuunan ha. 4Nkacenkcenk pitiyo peenapa líŋ nkanaŋ po ti úpantu pakan paka, pale kálafiyantoo káaseepin háati cisiik coonool kapiyankananii ti pitiyo pa.
5“Waah óo waah ewwa nkáhin uti éyisanoolo nii kacokaacok ti Pútuun pa. Mikeesoo ma miteyii miti pakiical pa piti Pútuun pa, emma nkacenk ma ti píyitii niŋ ti sipeesii, nkáhinhin miteyii ma mipihaŋ pafom miti pakakee paka. Ñípin ña ñeelenteŋale ña ñiti kúsool ka kenfakat ka kiteyii nkáhinhin ño ñipihaŋ pahaan ñiti pakakee paka. 6Poko nkálafi piyeno ti kúkon ka keenape ka ti hili ha henfakat ha niŋ ti púluumuma pa. 7Nkálafi lompo kapinkakicanee pinapnap ti kíliŋ ka, nkálafi pakan paka kati nkayonkalii 'Rabi'.#23:7 Ekina eyem: Akalaŋana eemaka ati hilim ha heesiiŋanee ha hiti Móyiis
8“Pale aluu, timpi nikat kapinkayonkal aluu 'Rabi', kaatuko aluu Akalaŋana oonool lamma innitaake, apan aluu púlooŋ pakoonool ti káyinan. 9Timpi niyonkal an ti etaam eyye 'Paapaa', kaatuko Paapaa oonool lamma innitaake, aŋa eeyem a alacana. 10Timpi nikat kapinkayonkal aluu lompo 'Ñíhampaatiin', kaatuko aluu Ahámpaatiin oonool lamma innitaake, akina ayem Eenucee ya ati Pútuun pa. 11Eemaka ya ti aluu añaŋaa piyeno áhina ya ataaluu. 12An óo an eesilanooliye áfaawananiyee, an óo an eewananooliye afaasilanee.”
Kúnuul isak niŋ kúsupak
13Fiye Yéesu nene asok: “Kúnuul efikiyeno ti aluu pikalaŋana hilim ha heesiiŋanee ha hiti Móyiis niŋ Pufalisaay pa. Aluu ñícuf! Kaatuko innipankpank hunkut ha hiti cáwii ca citi Pútuun pa. Aluu faŋ aluu ninakiit lupo, nikatanut kéelafiye ka pinako.” 14[#23:14 An ámiit man Máciya lompo akiice fiye: Kúnuul efikiyeno ti aluu pikalaŋana hilim ha heesiiŋanee ha niŋ Pufalisaay pa. Aluu ñícuf! Kamma aluu innicaakool piyaaŋat pa payenka pákayiinii keekete ka, kati nicoop waah wa uteyii púlooŋ. Apan niŋ niyeniyaa kaluum innifiyo kati kacok aluu nii pakan keenape. Pútuun pa efipisap aluu pihaŋ pakakee paka.]
15“Kúnuul efikiyeno ti aluu pikalaŋana hilim ha heesiiŋanee ha niŋ Pufalisaay pa. Aluu ñícuf! Kaatuko innikaawool-kaawool etaam ya niŋ kaatii ka kati nitaak an oonool eenanfe ti pítin pa piti Pusuwif pa. Niŋ nitaakoo, ínnihinoo an eeñaŋe pikaayu ti seemak pihaŋ aluu fo ñésupak.
16“Kúnuul efikiyeno ti aluu kéefuume ka keeyem ka ti kátintiŋan pakakee paka! Kaatuko innisoksok: 'Niŋ an asintooliyaa ti ekumpaan ya enfakat ya eti Pútuun pa, cokantoo, pale niŋ an asintooliyaa ti sanoo ya eti ekumpaan ya enfakat ya, cokaacok.' 17Aluu pusoŋ kéefuume! Weyme uhaŋe nafaa, fo sanoo ya, niŋ fotom ekumpaan ya enfakat ya éehine ya sanoo ya episampanee? 18Innisoksok lompo: 'Niŋ an asintooliyaa ti kaaciin ka, cokantoo, pale niŋ an asintooliyaa ti kaawaaseen ka keeyem ka ti kaaciin ka, cokaacok.' 19Aluu ñúfuumafuum! Weyme uhaŋe nafaa, fo kaawaaseen ka, niŋ fotom kaaciin ka kéehine ka kaawaaseen ka kipisampanee? 20An óo an eesintooliye ti kaaciin ka, asintoolaa-sintoolo ti kaaciin ka niŋ ti waah óo waah weeyem tenko. 21An óo an eesintooliye ti ekumpaan ya enfakat ya, asintoolaa-sintoolo ti ekumpaan ya enfakat ya niŋ ti Pútuun pa peekine pa toko. 22An óo an eesintooliye ti alacana, asintoolaa-sintoolo ti elemeyu ya eti Pútuun pa niŋ ti Pútuun pa peeyeniye pa teyyo.
23“Kúnuul efikiyeno ti aluu pikalaŋana hilim ha heesiiŋanee ha niŋ Pufalisaay pa. Aluu ñícuf! Kaatuko inniwufanufan Pútuun pa himpaac ha heewase ha ŋaasuwan ti waah wa wenkilis wa, samat nii naanaa, micempanu niŋ típaapikeen. Pale innikat weehaŋe wa hitaaku nafaa ti hilim ha heesiiŋanee ha: niñaŋaa íhinu kíiti pucoonool, innitaak paket hikaw apan innicok piliit#23:23 Niŋ ekina tom: innitaak káyinan ti Pútuun pa. Eehuu inniñaŋe íhinu peekatut ukee wa. 24Aluu kéefuume ka keeyem ka ti kátintiŋan pakakee paka, innisinteel man ma nípifulanii epuk pale innimelan ñonkomoo!
25“Kúnuul efikiyeno ti aluu pikalaŋana hilim ha heesiiŋanee ha niŋ Pufalisaay pa. Aluu ñícuf! Kaatuko innikuulan-kuulan tíkitaaŋ elontoŋ ya niŋ epulaatu ya, pale páhantuwa etempo immeeŋ niŋ waah ewwa innilame wa ti kincaakool pakan niŋ ti káacocokanooliyaati aluu. 26Awe Afalisaay éefuume! Tíkin kuulan weeyem wa páhantuwa elontoŋ ya niŋ epulaatu ya ancuk tíkitaaŋ lompo kuulaa.
27“Kúnuul efikiyeno ti aluu pikalaŋana hilim ha heesiiŋanee ha niŋ Pufalisaay pa. Aluu ñícuf! Kaatuko inninakool-nakool nii kiyaak kéehiiniyanee niŋ pentuloo. Nkúwalli tíkitaaŋ pale páhantuwa immeeŋ niŋ picec puhunuŋ niŋ waah óo waah weekuulut. 28Fiyuu lompo innicuke, tíkitaaŋ inninakool-nakool nii pakan keecoonoole apan páhantuwa aluu innimeeŋ niŋ écufato niŋ pakanc.
29“Kúnuul efikiyeno ti aluu pikalaŋana hilim ha heesiiŋanee ha niŋ Pufalisaay pa. Aluu ñícuf! Kaatuko innilutlut kiyaak ka kiti piyaamakoola pa, ínniwalliyanool kiyaak ka kiti keecoonoole ka, 30innisok: 'Niŋ unii utantake caanak ca citi ñífaaf unii, utuunaŋo teyii upuniis hísim piyaamakoola pa.' 31Fiyuu aluu faŋ aluu inniyem ti káyisan nii aluu niyem epuuk keemuke ka piyaamakoola pa. 32Aca! Nihankan eeha ñífaaf aluu nkáyaañe ha!
33“Aluu pupululoola! Aluu mifepa emmuu! Puume inniyina hifaku kúnuul ka kiti seemak sa? 34Ooto nísiitan! Eehuu ewune inci inkaakaay époñii aluu piyaamakoola, keecohatiye niŋ pikalaŋana. Aluu efinimuk pakakee paka, innipempeŋ pakakee paka ti kuluwaa, pakakee paka innisapii niŋ kisawut ti púluumuma pa pitaaluu, inniwawantanii ti saatee óo saatee. 35Fiyuu hísim ha hiti keecoonoole ka heeniisiye ha ti etaam ya efihinaŋee ti aluu. Písikii ti hísim ha hiti Abel#Púcook 4:8 eecoonoole ya fo ti hísim ha hiti Sakaliya,#2 Heetaakiye 24:20-22; Sakaliya 1:1 Palaki añiinoo, aŋa innimuke ya ti ekumpaan ya enfakat ya, ti pututa la haŋee la kaasampan niŋ kaaciin ka. 36Inci pusok aluu pánipani ya, eehuu fiye púlooŋ efihinaŋee ti hikaw ekaay eyye.
37“Oo Jerusalem, Jerusalem, aluu payenka innimukal ka piyaamakoola pa inninunkal payenka Pútuun pa mpúpoñii ka ti aluu, ñiyema puume íllafiye kati concenool epuuk aluu nantoonool samat nii fa ekutoon neconcenool fa mufuun eteyyo ti úpitu eteyyo. Pale nicoonut. 38Nísiitan, ekumpaan ya etaaluu efeekatanee ñaanii. 39Kaatuko inci pusok aluu, etinene nicukam fo hinak ta efinisok ta: 'Alímaati Ateeteyo Pútuun pa pisampan éekeyii ya ti caacaw etempo.'”
Kuloonaay © Wycliffe Bible Translators, Inc. 2026.