Máciya 22
22
Hícantiitu hiti keeyonkalee pahaaño piti esa
1Púful toko, Yéesu nene ákup niŋ kícantiitu, naasok: 2“Cáwii ca citi Pútuun pa cinakoolaa-nakool nii amansa eesiiŋane pahaaño esa ya eti akampaani ya ateyoo, naamemanool waah óo waah. 3Naapoñ pimiikan pa pakateyoo kapica kásokii keeyonkalee ka pahaaño pa kati kákey, pale nkapook ékey.
4“Nene apoñ pakakee ti pimiikan pa pakateyoo kapusok keeyonkalee ka nii: 'Nisincan, pahaaño pa pucolaa, káciim ka nkimemanoolee. Kíciin ka kutoom kitaaŋeetaaŋ, niŋ lompo síis sa seenonke sa. Waah óo waah nuumemanoolee. Níkey pahaaño pa.'
5“Pale kapaaliitii nkakaay haaciyii: pakakee ti ukit, pakakee paka kaanooman. 6Pakakee paka nkacok pimiikan pa pakateyoo nkakallanii nkamukii. 7Amansa ya náañiken. Naapoñ pusoocaali pa pakateyoo kapumukal pumukala pa payenkuu, nkasowan saatee ya eteyii.
8“Fiye naasok pimiikan pa pakateyoo: 'Pahaaño pa pucolaa, pale payenka inci iyyonkale ka kaneetaat keeñaŋee kaayonkal. 9Fiye nikaay ti ñítin ña ínniyonkalii an óo an aŋa innicuke ápikey pahaaño pa.' 10Pimiikan pa nkakaay ti ñítin ña nkaconcenool pakan paka payenka nkacuke ka púlooŋ, keenape ka niŋ keenaput ka. Ekáap ya eti pahaaño pa neemeeŋ pakan.
11“Pale ta amansa ya naanakiye ta kati asincan kéeyonkaliyee ka, naacuk toko akee áyiin eewasiit wañ weeñaŋee puwaso ti esa. 12Naacakanoo: 'Awíyam, puume ayyina énakoonii le aapeewasiit wañ uti esa?' Pale áyiin a naafatan. 13Fiye amansa ya naasok píhina pa: 'Nicenk sipeesoo niŋ wootoo, inniwantoo tíkitaaŋ pati énimaan ya, toko efitaak pukooŋ niŋ kaafincool úŋiiŋ.'”
14Yéesu nene asok: “Kaatuko keeyonkalee ka kameeŋaameeŋ, pale keemamalee ka kameeŋut.”
Kacakan ka kiti cooy kúncoo
15Púful toko, pakakee Pufalisaay pa nkáful nkaconcoolo kapiteŋenool fa efikakuuc Yéesu ti pákupaloo. 16Nkapoñ teyoo pinapana pa pakateyii niŋ pakakee ti kayoŋ ka kiti ati hikaw ha Helot, nkasokoo: “Ahámpaatiin, unii úmeyimeyi nii awe asoka tooñaa, apan ti pánipani ya ankalaŋan pítin pa piti Pútuun pa. Aapaaliyantoo eeha an afaasok kaatuko aasincanantoo ti sicaw. 17Fiye, sok unii, eeheyme ámmiiloole ti eehe: Fo cooneecoon fo coonutee upucooy kúncoo ya amansa ya enfakat a ati Room?” 18Pale Yéesu náameyi heenaput eeha nkáninkoole ha, naasokii: “Aluu ñícuf! Weyme inniyem ti hiŋes hikuucuyam? 19Níyisanam mañ emma innicooy ma nemmo kúncoo ya.” Nkácoopiyoo mañ. 20Naacakanii: “Puhooŋu niŋ caacaw ayme kayem toko?”
21Nkañahanoo: “Piti amansa ya enfakat a.” Fiye naasokii: “Ooto, niwufan amansa ya waah wa uteyoo, inniwufan Pútuun pa waah etempo.”
22Ta nkásiye ta eehuu, nkaŋaŋo, nkakatanoo nkakaay.
Pusatusaay pa niŋ pilito pa ti eket ya
23Ti oom hinoom, pakakee Pusatusaay nkákey ti Yéesu. Pusatusaay pa káyinanut ti élitoonii ya eti keekete ka. Nkacakanoo: 24“Ahámpaatiin, Móyiis akiicaakiic ti hilim ha heesiiŋanee ha nii: niŋ áyiin asayaa aal naaket peetaakut añii, atuwoo añaŋaa hitoonu aal a, naataak neyoo epuuk pakati púnuwoo eekete ya kati ataak cánkut.#Kakaman 25:5-6 25Fiye, intaako hínum le toonii ti miin moonool pákayiin isak niŋ pákasupak. Ayáañ a naasa naaket peetaakut añii, atuwoo naatoon aal a. 26Hoonool huu nihitaako ásupiyenu ya niŋ áhaaciyenu ya, pikaay fo ti eewase ya isak niŋ pákasupak. 27Ti pikelan, aal a naaket. 28Fiye, hinak ti pilito pa ti eket ya, aal a aŋuu ati ayme, páawoo isak ya niŋ pákasupak paka púlooŋ kasayoo?”
29Yéesu naañahanii: “Aluu nicaakoolaa-caakool faŋ aluu kamma ínnimiit hilim ha hiti Pútuun pa niŋ fotom sempe etempo. 30Ti hinoom ha ta keekete ka nkakaakaayee ta élitaniyee ti eket ya, etikasa, etikanimo, pale efikaloŋ samat nii pumaleekoo pa peeyem pa alacana. 31Pale kiti élitoonii ya ti eket ya: fo nikalaŋut eeha Pútuun pa mpusoke ha aluu, pusok: 32'Inci yem Pútuun pa piti Abraham, Pútuun pa piti Isaak niŋ Pútuun pa piti Jakob.'#Efúlii 3:6 Pútuun pa pineetaat piti keekete ka pale piti keeloŋe ka.”
33Ta kayoŋ ka nkísiye ta eehuu, ínnimii ti kakalaŋan ka kiteyoo.
Kacakan ka kiti hilim ha heesiiŋanee ha heehaŋe ha hitaaku nafaa
34Fiye, ta Pufalisaay pa nkásiye ta nii Yéesu acotaacot ñutum Pusatusaay pa, nkaconcoolo nkakaay teyoo. 35Akee teyii, áhampaatiin ati hilim ha heesiiŋanee ha hiti Móyiis, naaŋes hikuucuyoo niŋ kacakan enke: 36“Ahámpaatiin, ti hilim ha heesiiŋanee ha, eeheyme hilim hihaŋe hitaaku nafaa?”
37-38Yéesu naañahanoo: “Hilim ha híyaañ ha nihihaŋ hitaaku nafaa hiyem: Láfi Ateeteyo Pútuun pa pitii ti himuumi púlooŋ, ti kunuuwi púlooŋ, ti yaani púlooŋ#Kakaman 6:5 niŋ ti ecohatoyi púlooŋ. 39Hísupiyenu ha heetaake ha nafaa nihicuk nii híyaañ ha, hiyem: Láfi akinooli samat nii fa állafiye fa faŋi.#Lewitik 19:18 40Hilim ha heesiiŋanee ha púlooŋ niŋ kilim ka kiti piyaamakoola pa ti kilim kúsupak enke nkínintooliye.”
Eenucee ya ati Pútuun pa, añii ati ayme?
41Fiye, páawoo Pufalisaay pa kaconcoolaa-concoolo toko, Yéesu naacakanii: 42“Weyme ínnimiiloole kiti Eenucee ya ati Pútuun pa? Añii ati miin ma miti ayme?” Nkañahanoo: “Añii ya ati Dawid.” 43Yéesu naasokii: “Ooto weyme uwune ta infiyye Kunuu ka keenape ka nkútunk Dawid apiyonkaloo 'Ateeteyo'? Kaatuko asok:
44 'Ateeteyo Pútuun pa púkupaakup niŋ Ateeteyo atoom ti hisoku:
Kéy yeniyam epees yáali,
fo ta inci fatah ta pikamooli ti wooti ayyeno amansa ya ateyii.' #
Kícimu 110:1
45“Dawid himuumoo nayonkal Eenucee ya 'Ateeteyo', puume akina áfaayini piyeno añii ati Dawid.” 46An ayinaatoo kañahan háati hilim hoonool. Písik ti hinoom eehuu, an áhaañiyantoo nene kacakanoo.
Kuloonaay © Wycliffe Bible Translators, Inc. 2026.