Máciya 19
19
Kakalaŋan kiti káfulan aal
1Fiye, ta Yéesu naapaye ta hisoku kilim enke púlooŋ, náaful ti mah ma miti Galilee naakaay ti mah ma miti Judaay meeyem ma ti kikee kaapii ka kiti musuu ma miti Jordan. 2Kayoŋ kenfakat nkinapanoo, toko náakuuñan kéekuuñe ka teyii.
3Pakakee Pufalisaay nkalohoo kati kakuucoo, nkacakanoo: “Fo cooneecoon áyiin kati áfulan aaloo ti fan óo fan?”
4Yéesu naañahanii: “Fo nikalaŋut ti hilim ha hiti Pútuun pa nii, ti púcook pa Pútuun pa piliilaaliil pakan áyiin niŋ aal.#Púcook 1:27; 5:2 5Nihisok lompo: 'Ekina ewune áyiin nakatan faafoo niŋ íññaayoo naananf aaloo, poko t’ésupakii nkáyenoonii oonool.'#Púcook 2:24 6Insok aluu, eehuu hiwune kaneetaat nene pakan pákasupak pale oonool. Ooto eeha Pútuun pa mpinanfoole, an timpi ákatinool.”
7Pufalisaay pa nkacakanoo: “Ooto weyme uwune hilim ha heesiiŋanee ha hiti Móyiis nihisok nii, niŋ áyiin áfulanaa aaloo awufanoo kaahit kéeyisane nii áfulanoofulan?”#Kakaman 24:1 8Yéesu naañahanii: “Móyiis akataakat aluu kati nífulan pakaal aluu kamma ekun aluu neeyanke, pale eehuu hitaakiit púcook pa. 9Inci pusok aluu eehe: áyiin óo áyiin éefulane aaloo, aal a peehaañiit,#19:9 fo niŋ pinimo pa picenkutee ti pítin naasa akee aal, oom áyiin ti eloŋ eti pahaaño naayem.”
10Pinapana pa pakati Yéesu nkasokoo: “Iyyema eehuu hiyem ti pututa áyiin niŋ aal, ooto fisaka timpi sa.” 11Yéesu naañahanii: “An óo an tom ayina kasayan hilim eehe, pale payenka Pútuun pa mpuwufane ho ka lamma. 12Kaatuko taakaataak payenka ammeya nii kasayut kamma nkapukee fo, pakakee paka pakan káhinii fo, pakakee paka poko kapooke esa kamma cáwii ca citi Pútuun pa. Eeyina kasayan eehe añaŋaa ho kasayan.”
Yéesu niŋ epuuk ya
13Púful toko, pakan nkácoopii epuuk kenkilis ti Yéesu kati anaŋ sipeesoo teyii naaluumii. Pale pinapana pa nkafet ti kéecoopii ka epuuk ya. 14Yéesu naasokii: “Nikatan epuuk ya kápikey ti inci, timpi nikitii. Kaatuko cáwii ca citi Pútuun pa citi keecuke ka nii poko.” 15Naanaŋ sipeesoo ti epuuk ya, fiye naakaay.
Usaanum niŋ cáwii ca citi Pútuun pa
16Púful toko, akee áyiin náakey ti Yéesu, naacakanoo: “Ahámpaatiin, eeheyme heenape inci iññaŋe íhinu pitaak eloŋ ya eepayantoo ya?” 17Yéesu naañahanoo: “Weyme uwune ancakanam kiti heenape? Pútuun pa kóŋ pinape. Náalafiyaa pinako ti eloŋ ya eepayantoo ya, túul kilim ka keesiiŋanee ka.” 18Ayíin a naacakanoo: “Enkeyme kilim?” Yéesu naañahanoo: “Timpi muk an ti pásuumayi, timpi hinto niŋ aal eenimiye, timpi líp, timpi caam aapunook akinooli. 19Nápiyan paapaa atii niŋ íññaa atii,#Efúlii 20:12-16; Kakaman 5:16-20 íllafi akinooli samat nii fa állafiye fa faŋi.”#Lewitik 19:18
20Kahiineen ka nkusokoo: “Eehuu púlooŋ inci íntuule. Weyme nene inci iññaŋe íhinu?” 21Yéesu naasokoo: “Niŋ áalafiyaa an éetuuniye, kaay caanooman hitaaku ha hitii púlooŋ uwwufan mañ ma keeleke ka, aafataak hisaanumate alacana, náafulaa toko ínkey, innapanam.” 22Ta kahiineen ka nkísiye ta eehuu, nkikaay ínciiti ko meemak kaatuko hitaaku ha hiteyoo henfakat.
23Fiye Yéesu naasok pinapana pa pakateyoo: “Inci pusok aluu pánipani ya, cíiticiiti usaanum apinako ti cáwii ca citi Pútuun pa! 24Pinene sok aluu, fo ñonkomoo éfeeyini pinako ti káfuun saakilaŋ? Haani! Pale pinako pa piti usaanum ti cáwii ca citi Pútuun pa efipihaŋ páciite.”
25Ta pinapana pa nkásiye ta eehuu, ínnimii meemak nkasok: “Ooto ayme conko áfaayiniyee kafakan?” 26Yéesu naasincanii naasokii: “Eehuu an nihiheeke, pale waah uheekut Pútuun pa.”
27Fiye, Piyeer naacoop hilim ha, naasokoo: “Sincan, unii ukatanaakatan waah óo waah nuunapani. Weyme conko efuutaak?” 28Yéesu naañahanii: “Inci pusok aluu pánipani ya, niŋ Pútuun pa píhinaa waah óo waah úpuyenoonii wéeyeeni, inci, Añii An, iyyeno ti elemeyu ya etoom eemaka ya, aluu keenapanaam ka efiniyeno lompo ti silemeyu ŋaasuwan niŋ súsupak, kati ínnihin kíiti miin ma ŋaasuwan niŋ músupak ma miti Israyel. 29An óo an eekatane enuuf, ñúnu niŋ pakatu, pakahoop, paapaa, íññaa,#19:29 Niŋ ekina tom: íññaa, aal epuuk niŋ fotom ukit kamma inci, afaahaŋ naasaye ñiyema keme, afaawufanee eloŋ ya eepayantoo ya. 30Pale hícump keeyem ka hátikin éfikakelanii, hícump kéekelanii ka efikayeno hátikin.”
Kuloonaay © Wycliffe Bible Translators, Inc. 2026.