Máciya 20
20
Hícantiitu hiti píhina ti kaakit
1Yéesu nene asok: “Cáwii ca citi Pútuun pa cinakoolaa-nakool nii áyiin ati kaakit éefule nuulap apikaay hiŋes píhina kati káhin ti kaakit ka kiteyoo. 2Náasiyool niŋ píhina pa ti cooy eyya nkacooy ya áhina hinoom ha, naapoñii kapikaay ti kaakit ka kiteyoo.
3“Mpucom pa, náaful tíkitaaŋ naacuk pakakee keesiiŋiye ti híliŋ ha keeyeniit íhinu waah. 4Naasokii: 'Aluu lompo nikaay páhin ti kaakit ka kutoom, inci facooy aluu fa iññaŋee fa.' 5Fiye nkakaay.
“Caanak ca ti hikaw niŋ sitalaŋ síhaaciil hátikin, nene áful náahin moonool muu. 6Nkániim ka náaful, nene acuk pakakee keesiiŋiye. Naacakanii: 'Weyme uwune ínniyemi le ti pisiiŋo hinoom ha púlooŋ péehinut waah?'
7“Nkañahanoo: 'Kaatuko an acooput unii páhin.' Naasokii, 'Aluu lompo nikaay páhin pati kaakit ka kutoom.'
8“Cípiniimo, ati kaakit ka naasok áhampaatiin a ati píhina pa pakateyoo: 'Yónkalii píhina pa incooyii cooy ya eteyii, yáañ ti keekelane ka ékey puwant ti kéetikine ka ékey.'
9“Píhina pa keecoopee ka páhin nkániim ka nkákey, an óo an teyii naasa cooy eyya nkacooy ya áhina hinoom ha. 10Ta kéeyaañe ka kacoopee páhin nkákeyii ta esa cooy ya eteyii, nkámiilool nii efikasa pihaŋ toko. Pale, an óo an teyii lompo naasa cooy eyya nkacooy ya áhina hinoom ha. 11Ta nkasaye ta cooy ya eteyii, nkáyaañ káakumutool ti ati kaakit ka. 12Nkasokoo: 'Píhina pa keekelanee ka ti hicoopu páhin, waati yoonool lamma nkáhine, háati fo ancooyii samat nii fa ancooye fa unii keekete ka páhin ti hinoom ha púlooŋ ti pisiya cay.'
13“Pale ati kaakit ka naañahan akee teyii, naasokoo: 'Awíyam, inci hínuti heeñaŋut. Fo úsiyoolutaa nii inci facooyi ti cooy eyya nkacooy ya áhina hinoom? 14Coop cooy ya etii inkaay. Inci láfiye cooy eekelanee ya ti hicoopu páhin samat nii fa inci uwwufanuu fa. 15Fo inci yinaat íhinu héesuumaam niŋ mañ ma mutoom? Niŋ fotom, fo aataakaataak paheeka kamma inci ínsuumanana?'”
16Yéesu naakelan káakup ka kiteyoo, naasok: “Fiyuu keekelane ka efikayeno hátikin, keeyem ka hátikin éfikakelanii.”
Píhaaciyenu káakup Yéesu kiti eketoo
17Púful toko, Yéesu naayeno pisilo Jerusalem, naacoop ti kaapii pinapana pa ŋaasuwan niŋ pákasupak paka lamayii, ti pítin pa naasokii: 18“Nísiitan, unaa unka ti pisilo Jerusalem. Inci, Añii An, fawufanee ti sipees ñíhampaatiin puwaaseena pa pakati Pútuun pa niŋ pikalaŋana hilim ha heesiiŋanee ha hiti Móyiis. Efíkahinam kíiti kati mukee. 19Nkawufanam keeneetaat ka Pusuwif kápipalahoolam nkalenkenam, nkasapam niŋ kisawut, nkapempeŋam ti kuluwaa. Ti hinoom ha híhaaciyenu ha fálitaniyee ti eket ya.”
Kaluum kiti íññaa
20Fiye, Sepete aaloo naakaay ti Yéesu niŋ epuukoo pákayiin, náakilipo hátikinoo, naaluumoo kayankanan.
21Yéesu naacakanoo: “Iññáayuu, weyme állafiye?” Iññáa ya naañahanoo: “Niŋ aayeniyaa amansa, káluma kat epuukam pákasupak paka kapiyeno look, akee ti epeesi yáali, akee ti epeesi yaamay.”
22Yéesu naasok epuukoo: “Nímiit eeha inniyem ha ti kacakan. Fo níyiniyini pálaani elontoŋ ya eti kúnuul ka eyya inci inkaakaay ya pálaani?” Nkañahanoo: “Ee, úyiniyini.”
23Yéesu naasokii: “Pánipani efinilaan ti elontoŋ ya etoom, pale iyyema piyeno look ti epeesam yáali niŋ fotom epeesam yaamay, eehuu inci tom fawufan ho. Paapaa atoom amemanoole úyenuma ewwuu payenka naamamale ka.”
24Ta pakakee pinapana pa ŋaasuwan ya nkásiye ta eehuu, inseeñii ti pákasupak paka. 25Fiye Yéesu náayonkalii poko púlooŋ nantoonool, naasokii: “Nímeyimeyi nii pakati kikaw ka niŋ ñíhampaatiin ña pakati keeneetaat ka Pusuwif nkálafi káyisan nii kataakaataak sempe niŋ kayine ti pakan paka pakateyii. 26Hikina tom hiñaŋe ti aluu. Pale an óo an ti aluu éelafiye piyeno eemaka ya, añaŋaa piyeno áhina ya ataaluu. 27An óo an ti aluu lompo éelafiye piyeno áyaañ a, añaŋaa piyeno amiikan a ataaluu. 28Fo lompo inci Añii An, kéyyoot kati taak pimiikan, pale kati yeno amiikan, uwwufan eloŋam kati yihan hícump.”
Káakuuñan ka kiti púfuumafuum pákasupak
29Púful toko, Yéesu niŋ pinapana pa pakateyoo nkayeno hífulu saatee ya eti Jeriko, kayoŋ kenfakat nkinapanoo. 30Fiye, púfuumafuum pákasupak nkayeno ti kanaac pítin pa. Ta nkásiye ta nii Yéesu ayem ti himuusu, nkayeno hiceeku kapusok: “Ateeteyo, Añii ya ati Dawid, taak paket hikaw toonii!” 31Kayoŋ ka nkifet teyii nkusokii kafatan, pale nkahaŋ toko nkáceekii: “Ateeteyo, Añii ya ati Dawid, taak paket hikaw toonii!”
32Yéesu naasiiŋo naayonkalii, naasokii: “Weyme ínnilafiye inci píhin aluu?”
33Nkasokoo: “Ahámpaatiin, káluma, pánkin ñíkin unii.” 34Yéesu naataak paket hikaw teyii, náalik ñíkinii. Tokotoko ñíkinii íññipankino, nkanapan Yéesu.
Kuloonaay © Wycliffe Bible Translators, Inc. 2026.