Máciya 18
18
Eemaka ya ti cáwii ca citi Pútuun pa
1Ti oom káasiiŋuma, Yéesu pinapana pa pakateyoo nkákey teyoo, nkacakanoo: “Ayme ahaŋe pamake ti cáwii ca citi Pútuun pa?” 2Yéesu náayonkalii teyoo ciñii, naasiiŋan co ti pututayii. 3Naasokii: “Inci pusok aluu pánipani ya, etininako ti cáwii ca citi Pútuun pa taamanta niyesanut ínniyenoonii nii epuuk kenkilis. 4Ooto an óo an eewananooliye samat nii ciñii ence, oom an ayem eehaŋe ya pamake ti cáwii ca citi Pútuun pa. 5An óo an eewanane ciñii samat nii ence ti caacawam, inci naawanane.”
Kanakanee ti kaamuuyen
6Yéesu nene asok: “Niŋ an anakanaa akee ti kéetinee ka kéeyinane ka ti inci apunow ti kaamuuyen,#18:6 Niŋ ekina tom: ápuful ti káyinan ka ti inci fisaka apicenkee ti ekun énankiin enfakat, náaseemanee ti pututa kaatii ka. 7Kúnuul efikiyeno ti pakan paka pakati púlunta pa, kamma waah wa ewwa nuunakanii wa ti kaamuuyen! Waah ewwuu fo utaako, pale kúnuul efikiyeno ti aŋa éfuunapii ya teyoo! 8Niŋ epeesi niŋ fotom kooti kinakanuu ti kaamuuyen, fiit ko uwwant ko. Fisaka aapinako ti eloŋ ya eepayantoo ya niŋ epees yoonool niŋ fotom koot koonool le niŋ aafawantee ti seemak seehokiyantoo niŋ sipees súsupak niŋ fotom woot úsupak. 9Niŋ níkini ninakanuu ti kaamuuyen, lókit no uwwant no. Fisaka aapinako ti eloŋ ya eepayantoo ya niŋ níkin noonool le niŋ aafawantee ti seemak seehokiyantoo niŋ ñíkin ñúsupak.”
Hícantiitu hiti sáacii eelinciye
10Yéesu nene asok: “Nitah kunuu timpi nítinan ti akee ti kéetinee ka kéeyinane ka ti inci. Inci pusok aluu, pumaleekoo pa piteyii peeyem pa alacana umpa tan óo tan hátikin Paapaa atoom eeyem a alacana. 11[#18:11 An ámiit man Máciya lompo akiice fiye: Kaatuko inci, Añii An, kéyyookey kafakan keelinciye ka.]
12“Eeheyme ínnimiiloole ti eehe? Niŋ áyiin ataakaa sísaacii keme (100), yoonool neelinco, fo atakat áwii epaakiil niŋ kaat niŋ sipaakiil sa (99) ti mítintiŋ ma, apikaay hiŋes yoonool ya eelinciye ya? 13Inci pusok aluu pánipani ya, niŋ álaŋaniyoo yo, afaataak pásuuma teyyo pihaŋ áwii epaakiil niŋ kaat niŋ sipaakiil sa (99) seelinciit sa. 14Fo lompo incuke, Paapaa ataaluu eeyem a alacana álafiit háati akee ti kéetinee ka kéeyinane ka ti inci ápicim.”
Hilaahu hiti ani ti káyinan
15Yéesu nene asok: “Niŋ ani ti káyinan amuuyenaa ti awe,#18:15 Niŋ ekina tom: Niŋ ani ti káyinan amuuyenaa kaay teyoo aluu t’ésupak aluu nípicoonool, uwwatanoo. Niŋ ásiitanuu, ooto áañahaniyoo-ñahan. 16Pale niŋ ásiitanuti, coop akee niŋ fotom pakakee pákasupak iññoho teyoo neyii ancuk kati taako samat nii fa hilim ha hiti Pútuun pa nihisoke fa, nii: waah óo waah éfuuhinee kíiti pínapii ti eeha keetantake pákasupak niŋ fotom pákahaaciil nkasoke ha.#Kakaman 19:15 17Niŋ oom an aloŋaa naapooke káasiitan, coop hilim ha pati éyeniin ya eti kéeyinane ka. Niŋ apookaa lompo káasiitan kéeyinane ka, incokoo samat nii éeyinanut niŋ fotom asayoola kúncoo.
18“Inci pusok aluu pánipani ya, waah óo waah ewwa innipooke t’etaam ya, Pútuun pa pipayaapa mpupooke wo alacana; niŋ lompo waah óo waah ewwa innicoone t’etaam ya, Pútuun pa pipayaapa mpucoone wo alacana.
19“Inci pinene sok aluu pánipani ya, niŋ pákasupak ti aluu t’etaam ya kásiyoolaa ti waah, nkaluum wo Paapaa atoom eeyem a alacana, afaawufanii wo. 20Kaatuko la pákasupak niŋ fotom pákahaaciil nkaconcooliye ti caacawam, inci oopa ti pututayii.”
Hícantiitu hiti amiikan eeponketantoo
21Fiye Piyeer naaloh Yéesu, naasokoo: “Ahámpaatiin, niŋ anam ti káyinan atowiyaa ti kaamuuyen ti inci, ñiyema puume inci iññaŋoo kaaponket? Fo ñiyema isak niŋ ñésupak?” 22Yéesu naañahanoo: “Haani! Neetaat ñiyema isak niŋ ñésupak, pale fo ñiyema áwii éhaaciil niŋ kaat niŋ ñésupak (77).#18:22 Niŋ ekina tom: sikeme sipaakiil niŋ áwii epaakiil niŋ ŋaasuwan (70 x 7 = 490)
23“Ooto cáwii ca citi Pútuun pa cinakoolaa-nakool nii amansa éelafiye pimiikan pa pakateyoo kapucooyoo aŋa nkayekanoo ti nikopu. 24Ti cooy ñikopu eññuu, nkácoopiyoo akee áyiin teyii eeyekanoo nikopu sipootak sanoo síwuli ŋaasuwan (10,000). 25Páawoo ayinaat cooy oom nikopu, amansa ya naasok anoomanee niŋ aaloo niŋ epuukoo niŋ waah óo waah ewwa naataake kati acooy nikopu na. 26Fiye, amiikan a náakilipo hátikinoo, naaluumoo: 'Káluma ponket, mukut niŋ inci, facooyi waah óo waah.' 27Amansa ya naataak paket hikaw ti amiikan a aŋuu, naaponketoo nikopu na, naakatoo apikaay.
28“Pale, ta amiikan a náafule ta hátikin amansa ya, naacuk akee ti pákawiyoo pimiikan eeyekanoo nikopu niti mañ hak keme. Naaŋoonoo naakulucoo, naasokoo: 'Cooyam aŋa ayyekanaam a!' 29Awíyoo amiikan náakilipo hátikinoo, naaluumoo: 'Mukut niŋ inci, inci facooyi.' 30Pale naapook, naacaawantoo ti ékuluma fo ta afaacooy ta nikopu na niteyoo.
31“Ta pákawiyoo pimiikan pa nkacuke ta heetaakiye ha, ínciitiyii meemak, nkakaay kapikaman amansa ya heetaakiye ha. 32Fiye Amansa ya náayonkalii amiikan a, naasokoo: 'Awe amiikan eenaput! Inci ponketuuponket nikopu na nitii púlooŋ kamma alluumaam. 33Fo aañaŋut lompo hitaaku paket hikaw ti áwiyi amiikan samat nii fa inci intaake fa paket hikaw ti awe?' 34Amansa ya náañiken, naacoopoo ti ékuluma apikallanee, fo ta afaacooy nikopu na niteyoo púlooŋ.
35“Fiyuu lompo Paapaa atoom eeyem a alacana áfaahin an óo an ti aluu taamanta aaponketut ani ti káyinan púfulii ti yaani.”
Kuloonaay © Wycliffe Bible Translators, Inc. 2026.