Máciya 17
17
Hamake ha hiti Yéesu
1Kunoom isak niŋ hoonool kupumuus, Yéesu naacoopool Piyeer, Saak niŋ atuwoo Saŋ. Naasilo neyii patiila tíntiŋ kati kayeno po lamayii. 2Hátikinii pacuk Yéesu mpiyeso, puhooŋuyoo mpimiñal tas samat nii caanak ca, wañ wa uteyoo núuhiini samat nii ecaaŋ. 3Tokotoko, Móyiis niŋ Elí ayaamakoola ya nkáfulii teyii, nkayeno kákupat niŋ Yéesu.
4Piyeer naasok Yéesu: “Ahámpaatiin, napaanap unii úpuyemi le. Niŋ áalafiyaa, inci insiiŋan múkuut míhaaciil, coonool citii, coonool citi Móyiis, coonool citi Elí.” 5Akina ti káakup, tokotoko káatiŋu kiti ecaaŋ nkúfulii nkíkimpitoolii. Fiye, hilim níhifulii ti káatiŋu ka nihisok: “Aŋe ayem Añiinam, aŋa inci íllafiye ya; teyoo inci intaake pásuumayam. Nísiitanoo!”
6Ta pinapana pa nkásiye ta eehuu, nkafe meemak fo nkanowale ñuhooŋuyii t’etaam. 7Pale Yéesu naalohii, náalikii, naasokii: “Nilito! Timpi nife!” 8Ta nkáhaafine ta, kacukut an, fo Yéesu lamma. 9Ta nkayeniye ta éwanoonii ti tíntiŋ ya, Yéesu náakupananii, naasokii: “Timpi nisok an eeha innicuke ha, fo ta inci, Añii An, fálitaniyee ti eket ya.”
10Fiye, pinapana pa pakateyoo nkacakanoo: “Weyme uwune pikalaŋana hilim ha heesiiŋanee ha hiti Móyiis nkasok nii, fo Elí átikin áñohoonii le niŋ Eenucee ya ati Pútuun pa áfaakey?” 11Yéesu naañahanii: “Pánipani, fo Elí ákey apimemanool waah óo waah.#Malaki 4:5-6 12Pale inci pusok aluu nii, Elí ákeyyookey, pakan paka kakiiwutoo, pale nkáhinoo waah óo waah ewwa nkálafiye. Fo lompo nkakaakaay kaakallan inci, Añii an.” 13Fiye pinapana pa nkápannum nii Yéesu kiti Saŋ-Patis naayemii ti káakup ta náakupii ta kiti Elí.
Káakuuñan akampaani ati hísaalumant
14Púful toko, Yéesu niŋ pinapana pa pakateyoo pákahaaciil paka nkáwanoonii t’etaam tíntiŋ ya, kayoŋ kenfakat nkiyeniyii hítuulu. Akee áyiin naaloh Yéesu, náakilipo hátikinoo, 15naasokoo: “Ahámpaatiin, taak paket hikaw ti akampaani ya atoom, nanownow náayemi ti ñíyoka ñenfakat. Naloomloom enow ti seemak niŋ fotom ti musuu. 16Cóopiyoocoop ti pinapana pa pakatii, pale kayinaatoo káakuuñan.”
17Yéesu naasok: “Oo! Aluu ekaay ya eenaput ya apan nitaakut káyinan. Fo teyme inci fayeno niŋ aluu? Fo teyme famukutool niŋ aluu? Nícoopii akampaani ya le ti inci.” 18Yéesu naafet ti hísaalumant ha, níhiful ti akampaani ya. Ti oom káasiiŋuma, akampaani ya náakuuñanee.
19Eehuu hipimuus, pinapana pa nkákey ti Yéesu lamayii, nkacakanoo: “Weyme uwune uyinaat hiyaanu hísaalumant ha?” 20Naañahanii: “Kamma káyinan ka kitaaluu nkufomut. Inci pusok aluu pánipani ya, niŋ nitaakaa káyinan keefomut nii ekoon sootoo, níyiniyini hisoku tíntiŋ eyye, 'Fúl le, inkaay pa,' apan éfeeful. Waah etuuheek aluu.” 21[#17:21 An ámiit man Máciya lompo akiice fiye: Pale, hísaalumant eehuu ti kaluum niŋ suŋ lamma níhiful.]
Púsupiyenu káakup Yéesu kiti eketoo
22Púful toko, pinapana pa nkaconcoolo nantoonool ti mah ma miti Galilee, Yéesu naasokii: “Inci, Añii An, fawufanee ti sipees pakan. 23Apan efikamukam, ti hinoom ha híhaaciyenu ha fálitaniyee ti eket ya.” Kamma eehuu, pinapana pa pakateyoo nkayeno ti páciite penfakat.
Kúncoo ya eti ekumpaan ya enfakat ya eti Pútuun pa
24Púful toko, Yéesu niŋ pinapana pa pakateyoo nkacol ti saatee ya eti Kafaanawum. Pisayoola kúncoo ya eti ekumpaan ya enfakat ya eti Pútuun pa nkákey ti Piyeer, nkacakan: “Fo áhampaatiin a ataaluu nacooycooy kúncoo ya eti ekumpaan ya enfakat ya?”#17:24 Ayíin óo áyiin Asuwif añaŋaa cooy kúncoo eyye poonool ti etiil ya. Ekina eyem cooy eti kunoom kúsupak kiti áhina. Mañ emmuu nkacoop kapimankool ekumpaan ya enfakat ya eti Pútuun pa eeyem ya Jerusalem. 25Piyeer naañahanii: “Ee, nacooycooy.”
Ta Piyeer naañohiye ta ti enuuf, Yéesu náatikin ákup neyoo, naasokoo: “Simon, eeheyme ámmiiloole ti eehe? Ayme akaakaay cooy kúncoo óo kúncoo pumansa pa pakati púlunta pa? Fo epuukii niŋ fotom pakakee paka?”#17:25 Niŋ ekina tom: Fo pakanii niŋ fotom ekaawoola? 26Piyeer naañahanoo: “Pakakee paka.” Yéesu naasokoo: “Ooto epuukii etikacooy kúncoo. 27Pale kati máalaahaatiyaa pisayoola kúncoo ya, kaay pati han ha uwwant ésallii ya etii. Coop yoon eyya áafatikin ya cókii, ŋáapin putum eteyyo, aafatook toko mañ. Cóopii mo incooy kúncoo ya etaanii.”
Kuloonaay © Wycliffe Bible Translators, Inc. 2026.