Máciya 16
16
Kacakan píyisan
1Púful toko, pakakee Pufalisaay niŋ Pusatusaay nkákey ti Yéesu kápilafiyoo puwinko. Nkasokoo áyisanii píyisan péeyisane nii Pútuun pa púpoñiyoo. 2Naañahanii: “Niŋ cicokaa innicuk picaaŋaŋ pa ti útiŋu wa innisok nii etenup.#16:2 Niŋ ekina tom: Niŋ cíniimiyaa, innisok, kacom étikuuteen kamma útiŋu wa núucunke 3Pale niŋ cicokaa nicukut picaaŋaŋ pa, innisok nii efeenup fíyooy.#16:3 Niŋ ekina tom: Mpucom mic, innisok: Fíyooy hiyam ha efihisap, kaatuko útiŋu wa úcunkaacunk núufeyanani Níyiniyini káacenkin nípimeyi heekaakaay pitaako niŋ nisincanaa patiila. Weyme uwune niyinaat káacenkin píyisan pa piti caanak ence, kati nímeyi heekaakaay ha pitaako? 4Aluu ekaay eenaput apan innipook hicoku ti Pútuun pa. Fo hiŋes píyisan péeyisane nii Pútuun pa púpoñiyaam inniyaake? Háati poonool étiniyisanee, fo píyisan pa piti Jonas.”#16:4 Ta infiyye yoon enfakat neemelan Jonas ayaamakoola ya ati Pútuun pa. Pumuus kunoom káhaaciil yoon ya néenuusiyoo ti kantant ka kaloŋayoo (Jonas 1:17)#Máciya 12:39; Luk 11:29
Fiye, Yéesu naatahii toko naakaay.
Leweñoo ya eti Pufalisaay pa niŋ eti Pusatusaay pa
5Púful toko, Yéesu niŋ pinapana pa nkafiitan ti kikee kaapii ka kiti han ha, nkafiil hicoopu kúmpuul. 6Yéesu naasokii: “Nitah kunuu! Níwasum leweñoo ya eti Pufalisaay pa niŋ eti Pusatusaay pa.” 7Pinapana pa nkayeno piteŋenool, nkasok: “Akúpaakup fiyuu kamma núucoopooliyootaa kúmpuul.”
8Yéesu náapannum eeha nkayem ha ti káakup, naasokii: “Aluu pakati káyinan keefomut! Weyme inniyem ti piteŋenool kamma innitaakut kúmpuul? 9Niloot nímeyi fala! Fo nínawuniit ta inci ínkuumane ta pákayiin síwuli isak ya (5,000) niŋ kúmpuul isak, niŋ síyya siyema puume inniyesale ti pútowontiin pa? 10Fo nínawuniit ta inci ínkuumane ta pákayiin síwuli sipaakiil sa (4,000) niŋ kúmpuul isak niŋ kúsupak, niŋ usekeyu puume inniyesale ti pútowontiin pa? 11Puume ínnimiit nii inci neetaat ti káakup naaluu kiti kúmpuul? Pale níwasum leweñoo ya eti Pufalisaay pa niŋ eti Pusatusaay pa.” 12Fiye pinapana pa nkápannum nii ákuputii kiti káwasum leweñoo eti kúmpuul pale kiti káwasum pakalaŋanal pa piti Pufalisaay pa niŋ Pusatusaay pa.
Káyisan ka kiti Piyeer ayme ayem Yéesu
13Púful toko, Yéesu naakaay ti mah ma miti Sesaale Filipoy. Ta naacole ta po, naacakan pinapana pa pakateyoo: “Ti pakan paka, inci Añii An yem ayme?” 14Nkañahanoo: “Pakakee paka kasok awe yem Saŋ-Patis, pakakee nkasok awe yem Elí ayaamakoola ya, pakakee lompo nkasok awe yem ayaamakoola ya Jeremiya niŋ fotom akee ti piyaamakoola pa keefiyye ka.” 15Naacakanii: “Pale ti aluu, ayme innisoke inci iyyem?” 16Simon Piyeer naacoop hilim ha, naasokoo: “Awe yem Eenucee ya ati Pútuun pa, Añii ya ati Pútuun pa peeyem pa kaloŋa.”
17Fiye Yéesu naasokoo: “Simon añii ya ati Saŋ,#16:17 Niŋ ekina tom: Jonas aayihaayih kaatuko Paapaa atoom eeyem a alacana áyisanuu ho. Aakalaŋut eehuu ti an.#16:17 Niŋ ekina tom: aakalaŋut eehuu ti faŋi. 18Inci pusoki eehe; awe yem Piyeer.” (Ekina eyem énankiin). “Apan ti énankiin eyyuu inci fasiiŋan éyeniin ya eti kéeyinane ka, apan sempe sa siti eket ya etisiheekii. 19Inci fawufani púkululuma pa piti cáwii ca citi Pútuun pa, waah óo waah ewwa ampooke pe t’etaam ya, Pútuun pa pipayaapa mpupooke wo alacana; niŋ lompo waah óo waah ewwa ancoone pe t’etaam ya, Pútuun pa pipayaapa mpucoone wo alacana.” 20Fiye Yéesu náakupanan pinapana pa pakateyoo timpi kasok an nii akina ayem Eenucee ya.
Káakup Yéesu kiti eketoo
21Písik ti oom caanak, Yéesu náacook káyisan pinapana pa pakateyoo heekaakaayoo ha pitaako. Naasokii: “Fo inci kaay Jerusalem, incuk kúnuul kenfakat ti sipees ñíhampaatiin ña pakati pakan paka, pikalaŋana hilim ha heesiiŋanee ha niŋ ñíhampaatiin puwaaseena pa pakati Pútuun pa. Apan famukee, ti hinoom ha íhaaciyenu ha inci fálitaniyee ti eket ya.” 22Piyeer naacoopoo ti kaapii náayaañ pafet teyoo, naasokoo: “Ahámpaatiin, etihitaako! Eehuu hiyinaati pitaako!” 23Pale Yéesu náayesoonii naasok Piyeer: “Seetaani, fúl le ti inci! Awe hifitu pítin pa putoom ayyaake; pámiiloolali piti pakan kenseŋ pale pineetaat pámiiloolal piti Pútuun pa.”
Páciite pa piti kanapan ka kiti Yéesu
24Fiye Yéesu naasok pinapana pa pakateyoo: “Niŋ an álafiyaam kanapan afaapook himuumoo, naanapanam fo álafi eket ti kuluwaa.#16:24 Niŋ ekina tom: naakanto kuluwaa ya eteyoo 25Kaatuko aŋa éelafiye kafakan eloŋ ya eteyoo áfaapuul yo, pale aŋa éepuule eloŋ ya eteyoo kamma inci, afaafakan yo. 26Empeyme panap piyem toko an kati ataak hisaanumate ha hiti púlunta pa púlooŋ náapuul eloŋ ya eteyoo? Niŋ fotom niŋ weyme an naayina hititu eloŋ ya eteyoo? 27Kaatuko inci, Añii An, fákey niŋ pumaleekoo pa putoom ti hamake ha hiti Paapaa atoom,#16:27 Niŋ ekina tom: inci Añii An fákey ti hamake ha hiti Paapaa atoom niŋ pumaleekoo pa piteyoo incooy an óo an ti páhinaloo. 28Inci pusok aluu pánipani ya, pakakee ti keesiiŋiye ka le etikaket peecukut inci, Añii An, ti ékey samat nii amansa.”
Kuloonaay © Wycliffe Bible Translators, Inc. 2026.