Máciya 15
15
Waah ewwa nuuwas an káakuulaati
1Púful toko pakakee Pufalisaay niŋ pikalaŋana hilim ha heesiiŋanee ha hiti Móyiis nkáfulii Jerusalem kápikey ti Yéesu. Nkacakanoo: 2“Weyme uwune pinapana pa pakatii kátuulantoo cosaan ya eti símaama unaa? Kaatuko kañowantoo sipeesii pinap#15:2 Pusuwif pa kataakaataak káyinan enke nii: niŋ an álikaa waah weekuulut, sipeesoo etisikuul; niŋ álikaa paliyal, etipukuul; niŋ aliyaa paliyal peekuulut, eniinoo púlooŋ etekuul. Ekina ewune, Pusuwif pa nkataak cosaan eti puñowu sipeesii káliyum kati éfulan káakuulaati ka. káliyum.”
3Yéesu naañahanii: “Weyme uwune cosaan ya etaaluu neewun nítuulantoo hilim ha heesiiŋanee ha hiti Pútuun pa? 4Kaatuko Pútuun pa pusok: 'Nápiyan paapaa atii niŋ íññaa atii.'#Efúlii 20:12 Mpusok lompo: 'an óo an éekupe heenaput ti paapaa ateyoo niŋ fotom íññaa ateyoo añaŋee himuku.'#Efúlii 21:17 5Pale aluu nisok nii, an áyiniyini hisoku paapaa ateyoo niŋ fotom íññaa ateyoo: 'Pelut! Inci yinaati kayankanan. Kaatuko waah ewwa inci iññaŋuu wa kawufan, ukina inci uwwufane Pútuun pa.' 6Ti eehuu innisoke nii añaŋut kánapiyan paapaa ateyoo niŋ fotom íññaa ateyoo. Fiyuu ínnituulut hilim ha hiti Pútuun pa kamma cosaan ya etaaluu. 7Aluu ñícuf! Ayaamakoola ya Esayi tooñaa naasoke ta naayaamakoole ta kiti aluu, apusok:
8 Payenke niŋ kipinii nkánapiyanam,
pale saanii sílaaŋaamlaaŋ.
9 Nkátuulamtuul kenseŋ,
kaatuko eeha nkakalaŋan ha, kilim keesiiŋanee kiti pakan.” #
Esayi 29:13
10Fiye Yéesu náayonkalii kayoŋ ka, naasokii: “Nísiitan eehe kati nísi. 11Neetaat waah ewwa nuunako wa ti putum an nuuwasoo káakuulaati, pale waah ewwa núufulii wa ti putumoo, ukina nuuwasoo káakuulaati.”
12Fiye pinapana pa pakateyoo nkalohoo, nkasokoo: “Fo áameyimeyi nii Pufalisaay pa seeñiiseeñ ti eeha ansoke ha?” 13Naañahanii: “Enuun óo enuun eyya Paapaa atoom eeyem a alacana naasukut éfeelupinee. 14Nikatii po; úfuumiin uyem ti kátintiŋan úfuumiin. Niŋ káafuumiin átintiŋanaa áwiyoo káafuumiin, efikanow poko t’ésupakii ti kaayeen.”
15Fiye Piyeer naasok Yéesu: “Cénkin unii eeha ansoke ha kayoŋ ka.” 16Yéesu naasok: “Fo niloot nímeyi ho lompo? 17Fo nímiit nii waah óo waah weenakiye ti putum an ti munow nuukaay, púful toko núufulii ti enii ya? 18Pale eeha níhifulii ha ti putum an, ti yaanoo níhifulii, aŋe newasoo káakuulaati. 19Kaatuko ti yaan pámiiloolal peenaput mpúfulii: himuku, pihinto niŋ aal ati an niŋ fotom aal eenimiye naahinto niŋ akee áyiin, casupoolat, káalipu, hinooku, niŋ kateñal. 20Eehuu nihiwas an káakuulaati, pale hili peeñowut sipees etewas an káakuulaati.”
Káyinan kiti aal ati Kanaan
21Yéesu náaful toko, naakaay ti mah ma miti Til niŋ Siton. 22Intaako akee aal ati Kanaan eekine ti mah emmuu, náakey teyoo ti hiceeku, naasokoo: “Ateeteyo, Añii ya ati Dawid, taak paket hikaw ti inci! Añiinam ámaacul hísaalumant híwuuliyoo níhiyemiyoo ti kayokan meemak.”
23Pale Yéesu añahanutoo háati poonool. Fiye pinapana pa pakateyoo nkalohoo, nkasokoo: “Yaan aal a aŋuu, kaatuko áyekuniit kanapan unaa ti hiceeku.”
24Yéesu naañahan aal a: “Inci ti pakati Israyel lamma ímpoñiyee, ti keecuke ka teyii nii písaacii péecime.” 25Pale aal a náakey náakilipo hátikinoo, naasokoo: “Ahámpaatiin, káluma yankananam!” 26Yéesu naasokoo: “Naput aapucoop paliyal pa piti epuuk ya uwwant po piyen pa.” 27Aal a naañahanoo: “Ahámpaatiin, eehuu páni. Pale, háati piyen pa mpilili mífiitiin paliyal pa emma ummunowal ma t’etaam taapul ya eti áhampaatiin a atempo.” 28Yéesu naasokoo: “Aaluu, káyinan ka kitii kenfakat! Hitaako samat nii fa állafiye fa.” Ti oom káasiiŋuma, añiinoo náakuuñanee.
Káakuuñan ka kiti keemeeŋe ka
29Púful toko, Yéesu náaful toko, naayeno kasapal ti kantant ka kiti han ha hiti Galilee. Fiye, naasilo ti tíntiŋ, naayeno. 30Kayoŋ kenfakat nkíkey teyoo, nkícoopoolii kéehute ka, kéefuume ka, payenka nkanow ka niŋ efank, púmumune pa niŋ hícump pakakee kéekuuñe. Nkayenanii hátikin wootoo, náakuuñanii. 31Kayoŋ ka ínnimii ta nkacuke ta púmumune pa ti káakup, kéehute ka nkákuuñanee, payenka nkanow ka niŋ efank ti pikaayu niŋ kéefuume ka nkacuk. Fiye, nkámul Pútuun pa piti Israyel.
Káakuumanee ka kiti pákayiin síwuli sipaakiil (4,000)
32Púful toko, Yéesu naayonkal pinapana pa pakateyoo, naasokii: “Inci taakaataak paket hikaw ti kayoŋ enke, kaatuko unka le niŋ inci fo kunoom kíhaaciil, apan kataakut waah ewwa efikali. Láfiitii hiyaanu niŋ peep, timpi kanowal ti pítin pa.”
33Pinapana pa pakateyoo nkañahanoo: “Le láaŋaalaaŋ, peyme éfuutaakiyaa hícump paliyal úpukuumanaa kayoŋ ka kenfakat enke?” 34Yéesu naacakanii: “Kúmpuul kiyema puume innitaake?” Nkañahanoo: “Kiyema isak niŋ kúsupak niŋ moon menkilis caahinkiŋ.”
35Fiye, Yéesu naasok kayoŋ ka kiyeno t’etaam. 36Naacoop kúmpuul ka isak niŋ kúsupak ka niŋ moon ma. Naasok Pútuun pa apalaka, naafiit ko, naawufan ko pinapana pa, poko nkawufan ko kayoŋ ka kenfakat ka. 37Pakan paka púlooŋ nkali fo kasiit tuk. Fiye, nkayesal mífiitiin paliyal pa peetowiye pa fo kameeŋan usekeyu isak niŋ úsupak. 38Keeliye ka kayema pákayiin síwuli sipaakiil (4,000), pakaal paka niŋ epuuk ya kafinutee.
39Púful toko, Yéesu náakatinool niŋ kayoŋ ka, náayuuko ti piteen pa apikaay ti mah ma miti Makatan.
Kuloonaay © Wycliffe Bible Translators, Inc. 2026.