Máciya 14
14
Eket ya eti Saŋ-Patis
1Ti oom caanak Helot Antipas, ati hikaw ha ati Galilee, náasi kiti Yéesu. 2Naasok pimiikan pa pakateyoo: “Aŋe Saŋ-Patis, álitaniyee ti keekete ka! Ekina ewune naataak sempe siti íhinu weecukantee.”
3Helot asokaasok eehuu kaatuko akina apoñe kapucok Saŋ, nkacenkoo nkawantoo ti núkuluma. Ahínaahin eehuu kamma Helotiya, atuwoo Filip aaloo, aŋa naalame ya apisayoo. 4Kaatuko Saŋ nasoksok Helot nii hilim ha heesiiŋanee ha hiti Móyiis hicoonutoo apisayoo. 5Helot náalafi himuku Saŋ, pale naafe kayoŋ ka kamma nkacoke nii Saŋ ayaamakoola.
6Fiye, Helot, ti hinoom ha hiti pahaaño pa piti hipukuyee ha hiteyoo, ámaacul a ati Helotiya naayeno ekii hátikin kéeyonkaliyee ka hili. Helot ínsuumoo meemak. 7Eehuu hiwune, náayinananoo ti esintoolo nii afaawufanoo waah óo waah ewwa naacakane. 8Amáacul a íññaa ateyoo, Helotiya, náatunkoo apusok: “Hikaw Saŋ-Patis inci íllafiye aapuwufanam le ti epulaatu.”
9Amansa ya naameeŋ niŋ páciite, pale kamma eeha náayinananoo ha ti esintoolo hátikin payenka náayonkalii ka hili, fiye naawufan hilim kápihin eeha ámaacul a naacakane ha. 10Naapoñ kapifiit hikaw Saŋ ti núkuluma na. 11Hikawoo níhicoopiyee ti epulaatu, nkawufan ho ámaacul a, akina lompo naacoop ho pati íññaa ateyoo.
12Pinapana pa pakati Saŋ nkákey kapucoop ehunuŋ ya eteyoo, nkahokoo. Púful toko nkakaay kapusok Yéesu heetaakiye ha.
Káakuumanee ka kiti pákayiin síwuli isak (5,000)
13Ta Yéesu náasiye ta eket ya eti Saŋ, náayuuko ti piteen apikaay pa kemane lamayoo. Pale kayoŋ ka kenfakat ka ta nkísiye ta eehuu, nkinapanoo niŋ woot kúpufulii ti pisaatee.
14Ta Yéesu naaciŋe ta, naacuk kayoŋ kenfakat; naataak paket hikaw teyii, náakuuñan kéekuuñe ka pakateyii.
15Cípiniimo, pinapana pa pakateyoo nkákey teyoo, nkasokoo: “Le láaŋaalaaŋ, apan unca ti hicoku. Katan kayoŋ ka kipikaay ti misaatee ma hinoom faŋii paliyal.” 16Pale Yéesu naañahanii: “Túuniit kapikaay, aluu faŋ aluu niwufanii kapili.” 17Nkañahanoo: “Kúmpuul isak niŋ soon súsupak lamma nuutaakaa le.” 18Naasokii: “Nícoopii ko le.”
19Fiye, Yéesu naasok kayoŋ ka kiyeno ti píheeni pa. Naacoop kúmpuul ka isak ya niŋ soon sa súsupak sa, náahaafin patiila, naanimpan Pútuun pa. Naafiit kúmpuul ka, naawufan ko pinapana pa, poko nkápaacinool ko kayoŋ ka kenfakat ka. 20Pakan paka púlooŋ nkali fo kasiit tuk. Fiye, pinapana pa nkayesal mífiitiin paliyal pa peetowiye pa fo kameeŋan síyya ŋaasuwan niŋ súsupak. 21Keeliye ka kayema máamun pákayiin síwuli isak (5,000), pakaal paka niŋ epuuk ya kafinutee.
Kasapal ka ñoota kiti Yéesu ti han ha péeseemut
22Emma nkapaye ma, Yéesu naasok pinapana pa pakateyoo káyuuko ti piteen pa kapunowoo hátikin ti kikee kaapii ka kiti han ha. Akina naatowo puson ápikatinool niŋ kayoŋ ka. 23Ta naapaye ta píkatinool niŋ kayoŋ ka, naasilo lamayoo tíntiŋ ya kaluum. Incicok, naaloŋ po lamayoo kóŋ. 24Tempo, piteen pa umpa pílaaŋe kantant ka. Mpiyeno ti kaalic, kúsuu ka nkiyeno po kayokan.
25Cílapum, Yéesu naawawantan pinapana pa pakateyoo apiyeno kasapal ti man ma. 26Ta nkacukoo ta ti kasapal ti man ma, nkafe meemak nkasok: “Aŋuu áfulaful!” Nkayeno kaaceeceekool kamma ewatate. 27Pale tokotoko Yéesu naasokii: “Timpi niliim! Aŋe inci, timpi nife!”
28Fiye Piyeer naasokoo: “Ahámpaatiin, niŋ pánipani awe, sokam píkey ti awe ti man ma.” 29Yéesu naasokoo: “Kéy!” Fiye Piyeer náayuukino ti piteen pa, naasapal ti man ma apuwant pati Yéesu. 30Pale ta naacuke ta hiyam ha henfakat ha, naafe, náayaañ híseemu náaceekii apusok: “Ahámpaatiin, fakanam!” 31Tokotoko Yéesu naañaakan epeesoo naacokoo, naasokoo: “Awe ati káyinan keefomut! Weyme uwune antaak kunuu kúsupak?”
32Ta nkáyuukiye ta ti piteen pa, hiyam ha nihipilan niit. 33Keeyeniye ka púlooŋ ti piteen pa nkákilipo hátikinoo, nkasok: “Pánipani awe yem Añii ya ati Pútuun pa.”
Káakuuñan ka kiti Yéesu kéekuuñe Kennesalet
34Ta nkafiitan ta han ha, nkaciŋ ti mah ma miti Kennesalet. 35Pakan paka pakati luu nkakiiw Yéesu, nkapoñ hilim ti misaatee ma púlooŋ méekinkoolii ma. Pakan paka, nkácoopii teyoo kéekuuñe ka púlooŋ. 36Nkaŋiiniyoo apikatan kéekuuñe ka kápilik hileelu hísool ha henfakat ha hiteyoo lamma, kéelike ho ka púlooŋ nkákuuñanee.
Kuloonaay © Wycliffe Bible Translators, Inc. 2026.