Máciya 13
13
Hícantiitu hiti kiti ataha piyooseen
1Ti oom hinoom, Yéesu náaful ti ekumpaan ya naakaay ti kantant ka kiti han ha hiti Galilee, naayeno. 2Kayoŋ kenfakat nkuconcoolo teyoo neewun náayuuko ti piteen naayeno, pakan paka púlooŋ nkasiiŋo ti kantant ka. 3Fiye Yéesu naasokii hícump waah niŋ kícantiitu, naasok: “Nísiitan! Taakaataak akee áyiin aŋa eekaaye etah piyooseen. 4Akina ti kaawiisan etukal ya, ekee etukal ya neenowal ti pítin pa; pusuwa pa mpíkey mpili yo. 5Ekee ya neenowal ti etaam eti pínankiin la taakut hícump esiya. Néeŋantii mpacas kamma esiya ya neetosa. 6Pale ta pisiya pa mpúlumii ta, paŋantal pa mpusuucan kamma mpitaakut ñínkonk ñéesuna. 7Ekee etukal ya neenowal ti pícankun, néeŋantii pícankun pa mpikincool yo. 8Pale ekee etukal ya neenowal ti etaam eenape, eyyuu néeŋantii neepuk ulant: ukee ulant wa núupukii keme (100), ukee wa áwii éhaaciil (60) niŋ ukee wa áwii niŋ ŋaasuwan (30). 9An óo an eetaake kaanuu, ásiitan.”
Heewune ha Yéesu nákup niŋ kícantiitu
10Fiye, Yéesu pinapana pa pakateyoo nkalohoo, nkacakanoo: “Weyme uwune ánninkup pakan paka niŋ kícantiitu?”
11Naañahanii: “Aluu niwufaneewufan kameye ka kiti heeyolee ha ti cáwii ca citi Pútuun pa, pale poko kawufanutee ho. 12Kaatuko an óo an eetaake afaapenanee, naataak fo muus. Pale, an óo an eetaakut, háati caahinkilis ya eyya naataake ya efeesayee teyoo. 13Ekina ewune inci ínkup neyii niŋ kícantiitu, kaatuko
nkasincan-sincan pale kacukantoo.
Nkásiitan, pale kásiyantoo niŋ fotom kámeyiyantoo.
14“Fiyuu intaakiye samat nii ayaamakoola ya Esayi fa naasoke fa, asok:
'Efínisiitan pitempo tak, pale étinisi;
efinisincan pitempo tak, pale etinicuk.
15 Kaatuko pakan paka payenke kapankaapank kunuuwii,
nkacot unuuwii,
nkámif ñíkinii.
Káhinaahin eehuu ancuk timpi kacuk niŋ ñíkinii,
timpi kási niŋ unuuwii,
timpi kámeyi lompo niŋ kunuuwii,
étikayesoonii lipe ti inci Pútuun pa, inci kati kúuñanii.' #
Esayi 6:9-10
16“Pale aluu, niyihaayih kaatuko ñíkin aluu iññicukcuk, unuu aluu núusi. 17Inci pusok aluu pánipani ya, hícump piyaamakoola niŋ hícump pakan keecoonoole kálafilafi hínum hicuku eeha innicuke ha pale kacukut ho, nkálafi hísiyu eeha ínnisiye ha pale kásiit ho.”
Káacenkin ka kiti hícantiitu ha hiti ataha piyooseen pa
18Yéesu nene asok: “Nísiitan eeha hícantiitu ha hiti ataha piyooseen pa nihisoke ha: 19Samat nii etukal ya eenowale ya ti pítin pa fa néefulanee fa, fo lompo incuke ti payenka nkási ka ekooŋan ya eti cáwii ca citi Pútuun pa, apan ecaaŋutii, Seetaani ya néekey, néelamut heesukee ha ti saanii. 20Samat nii etukal ya eenowale ya ti etaam ya eti pínankiin pa, fo lompo incuke ti payenka nkási ka ekooŋan ya, ince kahaaŋ nkasayane yo niŋ pásuuma. 21Pale páawoo kataakut ñínkonk, kafiyyantoo. Niŋ páciite púcoliyoo niŋ fotom nkakallanee kamma ekooŋan ya, ince kahaaŋ puñoho puson ti káyinan ka kiteyii. 22Samat nii etukal ya eenowale ya ti pícankun pa, fo lompo incuke ti payenka nkási ka ekooŋan ya, pale ti eloŋ ya eteyii káamiilool ka niŋ kincaakool ka kiti hisaanumate ha nihikincool ekooŋan ya, neewun etepuk. 23Pale, samat nii etukal ya eenowale ya ti etaam ya eenape ya, fo lompo incuke ti payenka nkási ka ekooŋan ya nkámeyi yo. Payenkuu nkápukii keme (100), pakakee paka áwii éhaaciil (60) niŋ fotom pakakee paka áwii niŋ ŋaasuwan (30).”
Hícantiitu hiti uli niŋ haasuwa
24Yéesu naasok kayoŋ ka hikee hícantiitu, naasokii: “Cáwii ca citi Pútuun pa cinakoolaa-nakool nii an eesuke etukal eenape ti kaakit ka kiteyoo. 25Pale an óo an ti hiŋotu, akamooloo náakey naasuk haasuwa ti uli wa, naakaay. 26Ta uli wa núuŋantii ta núupukii, haasuwa ha lompo níhifulii.
27“Ati kaakit ka, pimiikan pa pakateyoo nkakaay teyoo, nkasokoo: 'Ahámpaatiin, fo etukal eenape tom ansuke ti kaakit ka kitii? Ooto peyme haasuwa ha níhifulii?' 28Naañahanii: 'Akamool áhine eehuu.' Pimiikan pa nkasokoo: 'Fo áalafilafi upuca úfosin haasuwa ha?'
29“Naañahanii: 'Haani, kaatuko inniyeniyaa káfosin haasuwa ha, níyiniyini káanupinool uli wa neeho. 30Nikat ho hípiyankoolii niŋ uli wa fo ti kaamaañ ka. Ti oom waati, inci fasok pumaaña pa: "Níyaañ nínupin haasuwa ha innicenk ho ti kikant kati hisowee; innipayaa inniconcoolan uli wa innicoop wo ti pileefaan pa putoom."'”
Kícantiitu kiti fa cáwii ca citi Pútuun pa eficihancaloolo fa pan óo pan
31Yéesu naasok kayoŋ ka hikee hícantiitu, naasokii: “Cáwii ca citi Pútuun pa cinakoolaa-nakool nii ekoon sootoo eyya an naacoope naasuk yo ti kaakit ka kiteyoo. 32Ekoon sootoo ehaŋa káafomaati ti etukal ya púlooŋ, pale niŋ éŋantiyoo ehaŋa pafom waah óo waah ti kankaŋ ya. Niŋ éyenooniyoo enuun, pusuwa pa mpíkey mpúwuun ti unaay eteyyo.”
33Yéesu naasokii hikee hícantiitu, naasokii: “Cáwii ca citi Pútuun pa cinakoolaa-nakool nii leweñoo eyya aal naacoope naanakanool yo niŋ efol eemeeŋe, fo hímaaf ha púlooŋ híkuntii.”
34Yéesu náakup enke púlooŋ ti kayoŋ ka kenfakat ka niŋ kícantiitu, asokutii waah weeneetaat niŋ hícantiitu. 35Fiyuu intaakiye ancuk eeha ayaamakoola ya naasoke ha hitaakiyaa, asok:
“Inci fákup neyii niŋ kícantiitu,
inci fakaman heeyolee ha kápiliŋ ta púlunta pa mpiliilee ta.” #
Kícimu 78:2
Káacenkin ka kiti hícantiitu ha hiti uli wa niŋ haasuwa ha
36Púful toko, Yéesu náaful ti kayoŋ ka kenfakat ka naanako ti ekumpaan ya. Pinapana pa pakateyoo nkakaay teyoo, nkasokoo: “Cénkin unii hícantiitu ha hiti haasuwa ha heeyem ha ti kaakit ka.”
37Naañahanii: “Aŋa eesuke ya etukal ya eenape ya ayem inci, Añii An. 38Kaakit ka kiyem púlunta pa; etukal ya eenape ya eyem pakan paka pakati cáwii ca. Haasuwa ha hiyem pakan paka pakati Seetaani ya; 39akamool a eesuke ya haasuwa ha ti uli wa ayem Seetaani ya. Waati ya eti kaamaañ ka eyem pikelan caanak ence; pumaaña pa kayem pumaleekoo pa.
40“Samat nii fa nkánupine fa haasuwa ha nkasowan ho ti seemak, fo lompo efitaako ti pikelan caanak ence. 41Inci, Añii An, fapoñ pumaleekoo pa putoom, éfipunupin ti cáwii ca citoom keekaakaay ka púlooŋ kanakan an ti kaamuuyen niŋ payenka nkáhin ka heenaput. 42Efipuwantii ti seemak séeceeke meemak, toko efitaak pukooŋ niŋ kaafincool úŋiiŋ. 43Tempo, keecoonoole ka efikamiñal samat nii caanak ti cáwii ca citi Paapaa ateyii. An óo an eetaake kaanuu, ásiitan.”
Kícantiitu kiti hisaanumate heeyolee niŋ pínankiin péeciita hinoom
44Yéesu nene asok pinapana pa pakateyoo: “Cáwii ca citi Pútuun pa cinakoolaa-nakool nii hisaanumate heeyolee ti kaakit. Ayíin naalaŋan ho, nene ayol ho, naameeŋ niŋ pásuuma. Naakaay naacaanooman waah óo waah ewwa naataake, naanoom kaakit ka.
45“Cáwii ca citi Pútuun pa lompo cinakoolaa-nakool samat nii fiye: anoomana eeyem ti hiŋes pínankiin péeciita hinoom, 46ta naacuke ta énankiin éeciita hinoom meemak, naakaay naacaanooman waah óo waah ewwa naataake, naanoom yo.”
Hícantiitu hiti cala
47Yéesu nene asok pinapana pa pakateyoo: “Cáwii ca citi Pútuun pa cinakoolaa-nakool samat nii fiye: cala eewantee ti kaatii, néecokii yoon óo yoon. 48Ta neemeeŋe ta, picalafayya pa nkáñakii yo ti kantant ka. Fiye nkayeno kapiyesal soon sa, nkawas seenape sa ti usekeyu, pale nkawant seenaput sa. 49Fiyuu efitaako ti pikelan caanak ence. Pumaleekoo pa éfipikey mpíkatinool keenaput ka niŋ keecoonoole ka. 50Efipuwant keenaput ka ti seemak séeceeke wám, toko efitaak pukooŋ niŋ kaafincool úŋiiŋ.”
51Yéesu naacakan pinapana pa pakateyoo: “Fo nísiyaasi eehuu púlooŋ?” Nkañahanoo: “Ee.”
52Nene asokii: “Ooto akalaŋana óo akalaŋana ati hiti Pútuun pa éeyenoonii anapana ati cáwii ca citi Pútuun pa, anakoolaa-nakool nii ati ekumpaan aŋa náfulanii ti pileefaan pa piteyoo waah wéeyeeni focaa lompo weemaamane.”
Hipookuyee ha hiti Yéesu
53Ta Yéesu naapaye ta hisoku kícantiitu enkuu, náaful toko apikaay. 54Apucol ti saatee ya eteyoo, náayaañ kakalaŋan ti éluumuma ya eti Pusuwif pa fo ínnimii, nkasok: “Peyme áyiin a aŋe naataake ecohato eyye niŋ sempe siti íhinu weecukantee? 55Fo akina tom ayem añii ya ati apempeŋa ya? Fo íññaa ateyoo tom ayem Mari? Fo pakatuwoo tom kayem Saak, Josef, Simon niŋ Judas? 56Fo pakahoopoo kaneetaat le niŋ unaa? Ooto peyme áyiin a aŋe naameya eehuu púlooŋ?” 57Ekina ewune nkapookoo káyinan. Pale Yéesu naasokii: “Ayaamakoola, pan óo pan námakiyanee fo niŋ fúlaa lati saatee ya eteyoo niŋ ti miin ma miteyoo.”
58Yéesu áhinut toko hícump weecukantee kamma káayinanaati ka kiteyii.
Kuloonaay © Wycliffe Bible Translators, Inc. 2026.