Máciya 12
12
Yéesu Ateeteyo ati hinoom ha hiti kayeno ka
1Hikee hinoom hiti kayeno kiti Pusuwif pa, Yéesu naayeno kaafiitanool ukit weesukee tewwo waah weenakoole nii uli. Peep mpucok pinapana pa pakateyoo nkayeno kaasuutal ulat wa kapili. 2Ta pakakee ti Pufalisaay pa nkacuke ta eehuu, nkasok Yéesu: “Sincan! Pinapana pa pakatii unka ti íhinu héehinantee ha ti hinoom ha hiti kayeno ka.”
3Fiye, Yéesu naañahanii: “Fo nikalaŋut eeha Dawid, amansa ya, náahine ha akina niŋ pákawiyoo ta peep pa mpucokii ta? 4Anakaanako ti ékuut ya enfakat ya eti Pútuun pa náacoopii kúmpuul ka keesampanee ka. Akina niŋ pákawiyoo nkali ko, ántuŋ kúmpuul enkuu puwaaseena pa pakati Pútuun pa lamayii kóŋ kañaŋe ko hili. 5Niŋ ekina tom, fo nikalaŋut ti hilim ha heesiiŋanee ha hiti Móyiis nii, ti hinoom ha hiti kayeno ka puwaaseena pa keeyem ka ti páhin ti ekumpaan ya enfakat ya eti Pútuun pa, nkalecatan-lecatan hinoom ha apan kamuuyenut? 6Inci pusok aluu nii, waah weehaŋe ekumpaan ya enfakat ya uwwa le. 7Hilim ha hiti Pútuun pa hisok: 'Paket hikaw inci íllafiye pale neetaat uwaaseen.'#Hoseya 6:6 Niŋ nímeyiyaa eehuu eeha nihisoke, anti níhinaati kíiti keemuuyenut ka. 8Kaatuko inci, Añii An, yem Ateeteyo ati hinoom ha hiti kayeno ka.”
Káakuuñan ti hinoom ha hiti kayeno ka
9Yéesu ápuful toko, naakaay naanako ti éluumuma ya eti Pusuwif pa. 10Intaako toko áyiin ati epees éehute. Intaako toko lompo pakakee pakan kéelafiye hinooku Yéesu. Ekina ewune nkacakanoo: “Fo cooneecoon káakuuñan ti hinoom ha hiti kayeno ka?” 11Naañahanii: “Niŋ akee ti aluu ataakaa sáacii eenowe ti kaayeen ti hinoom ha hiti kayeno ka, fo átacaafulanii yo? 12Ñiyema puume an naahaŋe hitaaku nafaa sáacii! Ooto cooneecoon íhinu heenape ti hinoom ha hiti kayeno ka.”
13Fiye naasok áyiin a: “Pántin epeesi.” Ayíin a náapantin yo, neeñoho toko pitempo tak samat nii ekee ya. 14Pale Pufalisaay pa keeyeniye ka toko nkáful, nkayeno piteŋenool fa efikamuk Yéesu.
Yéesu, amiikan a aŋa Pútuun pa mpimamale ya
15Yéesu náameyi nii Pufalisaay pa kálafiyoolafi himuku, ekina ewune náaful toko. Kayoŋ kenfakat nkinapanoo, náakuuñan kéekuuñe ka púlooŋ. 16Naakitii káakup kiteyoo ti pakakee paka.#12:16 Niŋ ekina tom: Naakitii hisoku pakakee paka akina ayem ayme 17Fiyuu intaakiye ancuk eeha ayaamakoola ya Esayi naasoke ha hitaakiyaa, asok:
18 “Ehe amiikan a atoom aŋa inci immamale ya,
aŋa inci íllafiye ya, teyoo inci intaake pásuumayam.
Inci fawas Kunuu ka kutoom teyoo,
náatuunan písii pa púlooŋ kiti kíiti ya etoom eecoonoole ya.
19 Atáñakalool niŋ pakan paka niŋ fotom hiceeku;
an átasi hilimoo ti kíliŋ ka.
20 Atafiit kampiip kéeŋantii keeŋonciye;
atahok lompo lampi éetaahe.
Atáyekuno íhinu eehuu púlooŋ fo ta áfaahin ta pucoonool pa pipiheek.
21 Ti caacawoo písii pa púlooŋ éfipihin cíki.” #
Esayi 42:1-4
Yéesu niŋ Pelesepul
22Púful toko, nkácoopii ti Yéesu áyiin éefuume ayinaat lompo káakup kamma hísaalumant níhiwuuliyoo. Yéesu náakuuñanoo, áyiin a náayaañ káakup naalompo acuk. 23Kayoŋ ka kenfakat ka púlooŋ ínnim ko, nkusok: “Fo aŋe Añii ya ati Dawid tom?” 24Pale ta Pufalisaay pa nkásiye ta eehuu, nkasok: “Ayíin a aŋe ti caacaw Pelesepul, áhampaatiin a ati kísaalumant ka innayaan kísaalumant ka.”
25Pale, Yéesu náameyi pámiiloolalii, naasokii: “Cáwii óo cáwii céetaakoolanooliye eficinow, saatee óo saatee niŋ fotom ekumpaan éetaakoolanooliye etesiiŋo. 26Fiye niŋ Seetaani ya eyaanaa Seetaani ya, ooto kátaakoolan faŋ eteyyo neeyaake, puume cáwii eteyyo éficiyini pisiiŋo? 27Fiye, niŋ ti caacaw Pelesepul inci niyyaan kísaalumant ka, pinapana pa pakati aluu ti caacaw pakayme nkayaan ko? Ooto, efikayeno píhina aluu kíiti. 28Pale iyyema ti Kunuu ka kiti Pútuun pa inci niyyaan kísaalumant ka, ooto, cáwii ca citi Pútuun pa cícoliyoocol ti aluu. 29Niŋ fotom, puume an naayina pinako ekumpaan eti áyiin eetaake sempe, náalip waahoo, fo niŋ áyaañaa apicenk oom áyiin ati sempe? Púful toko conko afaakoos ekumpaan ya eteyoo.
30“An eeneetaat niŋ inci, apookaampook, an eeyankananutam kaaconcenool, nahancalool-hancalool. 31Ooto inci pusok aluu: Kaamuuyen óo kaamuuyen niŋ kateñal óo kateñal éfikiyiniyee kaaponket, pale eeteñale Kunuu ka keenape ka ataponketee. 32An óo an eesoke heenaput ti inci, Añii An, áfaayiniyee kaaponket, pale an óo an eesoke heenaput ti Kunuu ka keenape ka ataponketee, neetaat ti eloŋ eyye niŋ fotom eekaakaay ya ékey.
33“Niŋ aasokaa nii enuun ya eenape, sok lompo papukal eteyyo peenape, niŋ fotom, niŋ aasokaa nii enuun ya enaput, sok lompo papukal eteyyo pinaput. Kaatuko ti papukal eteyyo nekiiwee. 34Aluu mifepa emmuu! Puume aluu keenaput ka inniyina hisoku waah weenape? Kaatuko heemeeŋe ha ti yaan an, hikina nákup. 35An eenape, náfulaniifulan ti yaanoo waah weenape. Pale an eenaput, náfulaniifulan ti yaanoo waah weenaput. 36Inci pusok aluu, ti hinoom ha hiti kíiti ya, pakan paka efikakaman heewune ha nkasok kilim ka púlooŋ keetaakut ka nafaa. 37Kaatuko ti kilim ka kitii áafahinee kíiti nii eemuuyenut niŋ fotom eemuuyene.”
Píyisan pa piti ayaamakoola ya Jonas
38Púful toko, pakakee Pufalisaay niŋ pikalaŋana hilim ha heesiiŋanee ha hiti Móyiis, nkasok Yéesu: “Ahámpaatiin, úlafilafi áapiyisan unii píyisan péeyisane nii Pútuun pa púpoñiyuu.” 39Naañahanii: “Aluu ekaay eenaput apan innipook hicoku ti Pútuun pa. Fo hiŋes píyisan péeyisane nii Pútuun pa púpoñiyaam inniyaake? Háati poonool étiniyisanee, fo ínfulaa píyisan pa piti ayaamakoola ya Jonas.#12:39 Ta infiyye yoon enfakat neemelan Jonas ayaamakoola ya ati Pútuun pa. Pumuus kunoom káhaaciil yoon ya néenuusiyoo ti kantant ka kaloŋayoo (Jonas 1:17). 40Kaatuko samat nii Jonas fa naayeniye fa ti munow yoon ya enfakat ya hanakan hánant fo kunoom kíhaaciil, fo lompo inci, Añii An, fayeno hanakan hánant páhantuwa etaam ya fo kunoom kíhaaciil. 41Ta infiyye, Jonas náatuunan hilim ha hiti Pútuun pa pakati Ninew, nkáwunko umuuyen wa uteyii. Fiye, heeyem ha le hihaŋaahaŋ Jonas. Ekina ewune, ti hinoom ha hiti kíiti ya, pakati Ninew efikasiiŋo hátikin ekaay eyye nkáhin yo kíiti. 42Fo lompo incuke, amansa ya aal a ati Sepa,#12:42 Amansa ya aal a ati Sepa, akina ayem amansa aal éefulii ti mah meeyem pa caanak ca íncifulii pa (1 Pumansa 10:1-13) náafulii ti mah méelaaŋee láaŋ ápikey peti amansa ya Solomon káasiitan ecohato ya eteyoo. Fiye, heeyem ha le hihaŋaahaŋ amansa ya Solomon. Ekina ewune, ti hinoom ha hiti kíiti ya, amansa ya aal a ati Sepa afaasiiŋo hátikin ekaay eyye náahin yo kíiti.
43“Niŋ hísaalumant hífulaa ti an, nihimuusool-muusool ti káahaaŋ ka tes ti hiŋes éyekunooluma. Niŋ hílaŋaniyoot, 44nihisokoolo: 'Túulam, inci puñoho pati aŋa inci ínfulii ya.' Ti éñohoonii eteeho, nihitook ékinuma ya ñaanii, neeneeŋee, neememanoolee pitempo tak. 45Fiye, nihikaay, níhicoopii kikee kísaalumant isak niŋ kúsupak keehaŋe ho pakanc, nkinako nkikin toko. Kúnuul ka kikelan ka kiti an a aŋuu nkihaŋ páciite kíyaañ ka. Fo lompo facuk ti ekaay ya eenaput eyye.”
Yéesu niŋ miin ma miteyoo
46Yéesu ti káakup niŋ kayoŋ ka kenfakat ka, íññaa ateyoo niŋ pakatuwoo nkácolii, nkasiiŋo tíkitaaŋ kápilafi káakup neyoo. 47Akee ti kayoŋ ka naasok Yéesu: “Ehe íññaa atii niŋ pakatuwi nkasiiŋiye tíkitaaŋ, kápilafi káakup naawe.”
48Yéesu naañahanoo: “Ayme ayem íññaa atoom? Pakayme kayem pakatuwam?” 49Naaluuñan pinapana pa pakateyoo, naasok: “Payenke kayem íññaa atoom niŋ pakatuwam. 50An óo an aŋa náhin eeha Paapaa atoom eeyem a alacana náalafiye ha, oom an ayem atuwam, ahoopam niŋ íññaa atoom.”
Kuloonaay © Wycliffe Bible Translators, Inc. 2026.