Máciya 11
11
Pinapana pakati Saŋ-Patis pati Yéesu
1Púful toko, Yéesu naapa kawun kunuu pinapana pa pakateyoo ŋaasuwan niŋ pákasupak paka. Fiye, naakaay kakalaŋan niŋ káatuunan ti pisaatee pa piteyii.
2Inhemool Saŋ-Patis naayeno ti ékuluma, náasi eeha Eenucee ya ati Pútuun pa naayem ha ti íhinu, fiye naapoñ pinapana pa pakateyoo 3kapica kacakanoo: “Fo awe yem Aŋa eeyem ya ti ékey? Niŋ ekina tom, fo uñaŋaa hítuulu akee?”
4Yéesu naañahanii: “Niñoho nica nikaman Saŋ eeha ínnisiye ha niŋ eeha innicuke ha: 5kéefuume ka unka ti hicuku, payenka nkanow ka niŋ efank unka ti pikaayu, pakati kanuk ka nkakuulanee, keecotiye ka unka ti hísiyu, keekete ka nkálitaniyee, ekooŋan ya éesuume ya néetuunanee keeleke ka. 6Ayihaayih, aŋa eepookut a hitaaku káyinan kamma inci.”
7Ta pinapana pa pakati Saŋ-Patis nkakaaye ta, Yéesu náayaañ káakup ti kayoŋ ka kiti Saŋ, naasokii: “Weyme innikaaye pati káahaaŋ ka tes kaasincan? Fo haasuwa eeha eyam ya nesapalool? 8Niŋ fotom, weyme innikaaye po hicuku? Ayíin eewasiye wañ weewalla? Haani! Payenka nkawaso ka wañ weewalla, unka ti pukumpaan pa piti pumansa pa. 9Ooto weyme innikaaye po hicuku? Ayaamakoola? Ee ayaamakoola! Inci pusok aluu nii ahaŋaahaŋ ayaamakoola. 10Saŋ akina ayem aŋa hilim ha hiti Pútuun pa nihikiice ya:
'Inci fápoñii ati ekooŋan ya atoom apunowi hátikin,
kati awañali pítin pa.' #
Malaki 3:1
11“Inci pusok aluu pánipani ya, taakut an aŋa aal naapuke eehaŋe Saŋ-Patis; pale aŋa éetinee ya ti cáwii ca citi Pútuun pa ahaŋoohaŋ. 12Písik ti caanak ca citi Saŋ-Patis fo fíyooy, cáwii ca citi Pútuun pa inciyeniyee kátaakoolan,#11:12 Niŋ ekina tom: cáwii ca citi Pútuun pa inciyeno pikaayu hátikin niŋ sempe apan pakan keehiñe nkálafi co hicoopu ti sempe. 13Kaatuko piyaamakoola pa púlooŋ niŋ lompo Móyiis ti hilim ha heesiiŋanee ha, kayaamakoolaa-yaamakool heekaakaay ha pitaako fo ti caanak ca citi Saŋ. 14Niŋ nicoonaa ho kasayan, akina ayem ayaamakoola ya Elí eeñaŋe ya ékey. 15An óo an eetaake kaanuu, ásiitan.
16“Niŋ weyme inci iyyina kaakufumool ekaay ya eti fíyooy? Enakoolaa-nakool nii epuuk keeyeniye ti híliŋ nkayeno kaaceeceekool:
17'Uhapaahap#11:17 Yéesu asok: usapaasap aluu kámpiis aluu,
nikiiyut,
nuucook aluu kícimu kiti keeŋoot,
nisampooliit.'
18“Kaatuko Saŋ ákeyyookey aliyantoo, alaanantoo, nkasok: 'Hísaalumant hiyem neyoo.' 19Inci, Añii An, ínkey pilli, illaan nkasok: 'Nisincan! Aŋuu an eekase, núkumana, áwii ati pisayoola kúncoo niŋ pumuuyena.' Pale ecohato ya eti Pútuun pa, éyisaneeyisan ti páhinal eteyyo nii tooñaa.”
Pisaatee péeyinanut
20Ti pisaatee pa, pa Yéesu náahine pa hícump weecukantee, pakan paka káwunkiit umuuyen wa uteyii. Púful toko, Yéesu náayaañ kawatan oom pisaatee. Naasok: 21“Kúnuul efikiyeno ti aluu pakati saatee ya eti Kolasin, kúnuul efikiyeno ti aluu pakati saatee ya eti Petesayit. Kaatuko waah weecukantee Pútuun pa mpíhine ti pisaatee pa piti aluu. Niŋ eehuu hitaakiye ti pisaatee pa piti Til niŋ Siton,#11:21 Pisaatee pa piti Kolasin niŋ Petesayit Pusuwif, pale Til niŋ Siton kaneetaat Pusuwif. Nisincan kahooŋu mah. anti kafiyo nkáwunkiye umuuyen wa uteyii, nkayeno niŋ kúsool kiti pupootak niŋ emaamoolo píiha#11:21 Ti káyisan ewatanoolo enfakat eti umuuyen wa uteyii, pakan paka nkawaso wañ weesañate uti pahan pifil, niŋ emaamoolo píiha. (Jonas 3:5-9) kápiyisan ewatanoolo ya eteyii. 22Pale inci pusok aluu, hinak eeha Pútuun pa mpikaakaay íhinu kíiti ya, kúnuul ka kiti aluu efikihaŋ kiti pakati Til niŋ Siton.
23“Aluu pakati saatee ya eti Kafaanawum, fo éfiniseepinee alacana? Haani, efiniwananee pati keekete ka. Kaatuko niŋ weecukantee wa wéehinee wa lati aluu úhineehin hínum ti saatee ya eti Sotom,#11:23 Pakan paka pakati Sotom kakancaakanc hínum meemak, ekina ewune Pútuun pa mpúpucalool saatee ya eteyii (Púcook 18:17–19:27) anti eloŋ toko fo fíyooy. 24Pale inci pusok aluu, hinak eeha Pútuun pa mpikaakaay íhinu kíiti ya, kúnuul ka kiti aluu efikihaŋ kiti pakati Sotom.”
Eyékunoolo ti Yéesu
25Ti oom caanak, Yéesu naasok: “Inci múluu Paapaa, Ateeteyo ati patiila niŋ t’etaam, kamma ayyole eehe keecohatiye ka niŋ kéesuume ka kunuu, pale íyyisan ho keewananooliye ka nii epuuk kenkilis. 26Ee Paapaa, kaatuko fiye állafiye hipitaako ti pásuum pa pitii.
27“Paapaa atoom awufanaamufan waah wa púlooŋ. An ámiit Añii ya fo Paapaa ya, an lompo ámiit Paapaa ya fo Añii ya niŋ payenka Añii ya náalafiye ka káyisanoo.
28“Aluu púlooŋ keeyoke ka innitiyo pínapi, níkey ti inci, inci fawufan aluu éyekunoolo. 29Nitiyo pitiyo pa piti pakalaŋanal pa putoom, innikalaŋ ti inci, kaatuko inci eewananooliye yaanam néeneeni, innitaak éyekunoolo. 30Kaatuko waah ewwa inci inkalaŋanale wa aluu úciitaat hítuulu, pitiyo pa putoom mpúwiini.”
Kuloonaay © Wycliffe Bible Translators, Inc. 2026.