ਰੋਮ ਭੂਮਿਕਾ
ਭੂਮਿਕਾ
ਪੌਲੁਸ ਨੇ ਇਹ ਪੱਤਰ ਆਪਣੀ ਰੋਮ ਦੀ ਯਾਤਰਾ ਤੋਂ ਪਹਿਲਾਂ ਲਿਖਿਆ ਅਤੇ ਇਸ ਦੇ ਦੁਆਰਾ ਉਸ ਨੇ ਰੋਮ ਦੀ ਕਲੀਸੀਯਾ ਨੂੰ ਆਪਣੇ ਉੱਥੇ ਜਾਣ ਬਾਰੇ ਦੱਸਿਆ ਸੀ । ਉਸ ਦੀ ਯੋਜਨਾ ਸੀ ਕਿ ਉਹ ਕੁਝ ਸਮੇਂ ਦੇ ਲਈ ਰੋਮ ਦੇ ਮਸੀਹੀਆਂ ਵਿੱਚ ਸੇਵਾ ਕਰਨ ਦੇ ਬਾਅਦ, ਉਹਨਾਂ ਦੀ ਮਦਦ ਨਾਲ ਸਪੇਨ ਨੂੰ ਜਾਵੇ । ਪੌਲੁਸ ਨੇ ਆਪਣੇ ਇਸ ਪੱਤਰ ਵਿੱਚ ਮਸੀਹੀ ਵਿਸ਼ਵਾਸ ਦਾ ਅਰਥ ਦੱਸਿਆ ਹੈ ਕਿ ਇਸ ਦੀ ਇੱਕ ਮਸੀਹੀ ਦੇ ਵਿਵਹਾਰਕ ਜੀਵਨ ਵਿੱਚ ਕੀ ਥਾਂ ਹੈ । ਇਸ ਪੱਤਰ ਵਿੱਚ ਪੌਲੁਸ ਦੇ ਸੰਦੇਸ਼ ਦਾ ਪੂਰਾ ਵੇਰਵਾ ਹੈ ।
ਉਹ ਰੋਮ ਦੀ ਕਲੀਸੀਯਾ ਨੂੰ ਨਮਸਕਾਰ ਕਹਿਣ ਅਤੇ ਉਹਨਾਂ ਲਈ ਕੀਤੀ ਪ੍ਰਾਰਥਨਾ ਬਾਰੇ ਦੱਸਣ ਦੇ ਬਾਅਦ, ਉਹ ਆਪਣੇ ਪੱਤਰ ਦੇ ਵਿਸ਼ੇ ਬਾਰੇ ਦੱਸਦਾ ਹੈ, “ਸ਼ੁਭ ਸਮਾਚਾਰ ਦੁਆਰਾ ਹੀ ਪਰਮੇਸ਼ਰ ਦਾ ਪਾਪੀ ਨੂੰ ਨੇਕ ਠਹਿਰਾਉਣ ਦਾ ਰਾਹ ਪ੍ਰਗਟ ਹੋਇਆ ਹੈ ਜੋ ਆਦਿ ਤੋਂ ਅੰਤ ਤੱਕ ਵਿਸ਼ਵਾਸ ਉੱਤੇ ਹੀ ਆਧਾਰਿਤ ਹੈ” (1:17) ।
ਫਿਰ ਪੌਲੁਸ ਇਸ ਵਿਸ਼ੇ ਬਾਰੇ ਅੱਗੇ ਲਿਖਦਾ ਹੈ । ਸਾਰੀ ਮਨੁੱਖਜਾਤੀ, ਯਹੂਦੀ ਅਤੇ ਪਰਾਈਆਂ ਕੌਮਾਂ ਪਾਪ ਦੇ ਅਧਿਕਾਰ ਵਿੱਚ ਹਨ । ਇਸ ਲਈ ਸਭ ਦਾ ਪਰਮੇਸ਼ਰ ਦੇ ਸਾਹਮਣੇ ਨੇਕ ਹੋਣਾ ਜ਼ਰੂਰੀ ਹੈ । ਲੋਕ ਪਰਮੇਸ਼ਰ ਦੇ ਸਾਹਮਣੇ ਯਿਸੂ ਮਸੀਹ ਵਿੱਚ ਵਿਸ਼ਵਾਸ ਕਰਨ ਦੁਆਰਾ ਨੇਕ ਠਹਿਰਦੇ ਹਨ । ਅੱਗੇ ਪੌਲੁਸ ਮਸੀਹ ਦੀ ਕਲੀਸੀਯਾ ਦੇ ਦੁਆਰਾ ਮਿਲਣ ਵਾਲੇ ਨਵੇਂ ਜੀਵਨ ਦਾ ਬਿਆਨ ਕਰਦਾ ਹੈ ਜਿਹੜਾ ਇਸੇ ਨਵੇਂ ਸੰਬੰਧ ਦੇ ਨਤੀਜੇ ਨਾਲ ਮਿਲਦਾ ਹੈ । ਵਿਸ਼ਵਾਸੀ ਦਾ ਪਰਮੇਸ਼ਰ ਨਾਲ ਮੇਲ ਹੋ ਜਾਂਦਾ ਹੈ ਅਤੇ ਉਹ ਪਰਮੇਸ਼ਰ ਦੇ ਆਤਮਾ ਦੁਆਰਾ ਪਾਪ ਅਤੇ ਮੌਤ ਦੇ ਬੰਧਨ ਤੋਂ ਛੁਟਕਾਰਾ ਪ੍ਰਾਪਤ ਕਰਦਾ ਹੈ । ਅਧਿਆਇ 5—8 ਵਿੱਚ ਪੌਲੁਸ ਵਿਸ਼ਵਾਸੀ ਦੇ ਜੀਵਨ ਵਿੱਚ ਪਰਮੇਸ਼ਰ ਦੀ ਵਿਵਸਥਾ ਦੇ ਉਦੇਸ਼ ਅਤੇ ਪਰਮੇਸ਼ਰ ਦੇ ਆਤਮਾ ਦੀ ਸਮਰੱਥਾ ਬਾਰੇ ਵੀ ਲਿਖਦਾ ਹੈ । ਇਸ ਦੇ ਬਾਅਦ ਪੌਲੁਸ ਇਸ ਬਾਰੇ ਲਿਖਦਾ ਹੈ ਕਿ ਯਹੂਦੀ ਅਤੇ ਪਰਾਈਆਂ ਕੌਮਾਂ ਦੀ ਪਰਮੇਸ਼ਰ ਦੀ ਯੋਜਨਾ ਵਿੱਚ ਕੀ ਥਾਂ ਹੈ । ਅੰਤ ਵਿੱਚ ਉਹ ਸਾਰ ਕੱਢਦਾ ਹੈ ਕਿ ਯਹੂਦੀਆਂ ਦਾ ਯਿਸੂ ਮਸੀਹ ਨੂੰ ਰੱਦਣਾ ਵੀ ਪਰਮੇਸ਼ਰ ਦੀ ਯੋਜਨਾ ਦਾ ਹੀ ਇੱਕ ਅੰਗ ਹੈ । ਉਹਨਾਂ ਦੇ ਇਹ ਕਰਨ ਦੁਆਰਾ ਹੀ ਪਰਮੇਸ਼ਰ ਬਾਕੀ ਦੀ ਮਨੁੱਖਜਾਤੀ ਨੂੰ ਯਿਸੂ ਮਸੀਹ ਦੇ ਦੁਆਰਾ ਆਪਣੀ ਕਿਰਪਾ ਦੇ ਹੇਠ ਲਿਆਉਂਦੇ ਹਨ । ਉਸ ਦਾ ਇਹ ਵੀ ਵਿਸ਼ਵਾਸ ਹੈ ਕਿ ਯਹੂਦੀ ਹਮੇਸ਼ਾ ਤੱਕ ਯਿਸੂ ਨੂੰ ਰੱਦ ਨਹੀਂ ਕਰਨਗੇ । ਪੱਤਰ ਦੇ ਅੰਤ ਵਿੱਚ ਉਹ ਮਸੀਹੀ ਜੀਵਨ ਦੇ ਬਾਰੇ ਲਿਖਦਾ ਹੈ, ਖ਼ਾਸ ਕਰ ਕੇ ਦੂਜਿਆਂ ਦੇ ਨਾਲ ਪਿਆਰ ਦੇ ਰਾਹ ਬਾਰੇ । ਉਹ ਪਰਮੇਸ਼ਰ ਦੀ ਸੇਵਾ, ਦੇਸ਼ ਅਤੇ ਦੂਜੇ ਮਸੀਹੀਆਂ ਦੇ ਪ੍ਰਤੀ ਕਰਤੱਵ ਅਤੇ ਅੰਤਹਕਰਣ ਦੇ ਪ੍ਰਸ਼ਨਾਂ ਵਰਗੇ ਵਿਸ਼ਿਆਂ ਨੂੰ ਲੈਂਦਾ ਹੈ । ਪੱਤਰ ਦਾ ਅੰਤ ਉਹ ਆਪਣੇ ਨਿੱਜੀ ਸੰਦੇਸ਼ ਅਤੇ ਪਰਮੇਸ਼ਰ ਦੀ ਮਹਿਮਾ ਨਾਲ ਕਰਦਾ ਹੈ ।
ਵਿਸ਼ਾ-ਵਸਤੂ ਦੀ ਰੂਪ-ਰੇਖਾ
ਭੂਮਿਕਾ ਅਤੇ ਵਿਸ਼ਾ 1:1-17
ਮੁਕਤੀ ਦੀ ਸਰਵ ਵਿਆਪਕ ਮਨੁੱਖੀ ਲੋੜ 1:18—3:20
ਪਰਮੇਸ਼ਰ ਦਾ ਮੁਕਤੀ ਦਾ ਰਾਹ 3:21—4:25
ਮਸੀਹ ਵਿੱਚ ਨਵਾਂ ਜੀਵਨ 5:1—8:39
ਪਰਮੇਸ਼ਰ ਦੀ ਯੋਜਨਾ ਵਿੱਚ ਇਸਰਾਏਲ 9:1—11:36
ਮਸੀਹੀ ਆਚਰਨ 12:1—15:13
ਸਾਰ ਅਤੇ ਨਿੱਜੀ ਸੰਦੇਸ਼ 15:14—16:27
Currently Selected:
ਰੋਮ ਭੂਮਿਕਾ: CL-NA
Highlight
Share
Copy
Want to have your highlights saved across all your devices? Sign up or sign in
Punjabi Common Language (North American Version):
Text © 2021 Canadian Bible Society and Bible Society of India