ਰੋਮ 11

ਇਸਰਾਏਲ ਕੌਮ ਉੱਤੇ ਪਰਮੇਸ਼ਰ ਦੀ ਕਿਰਪਾ

1 # ਫ਼ਿਲਿ 3:5 ਹੁਣ ਮੇਰਾ ਪ੍ਰਸ਼ਨ ਇਹ ਹੈ, ਕੀ ਪਰਮੇਸ਼ਰ ਨੇ ਆਪਣੇ ਚੁਣੇ ਹੋਏ ਲੋਕਾਂ ਨੂੰ ਤਿਆਗ ਦਿੱਤਾ ਹੈ ? ਨਹੀਂ ! ਕਿਉਂਕਿ ਮੈਂ ਆਪ ਵੀ ਇੱਕ ਇਸਰਾਏਲੀ ਹਾਂ । ਮੈਂ ਅਬਰਾਹਾਮ ਦੀ ਸੰਤਾਨ ਹਾਂ ਅਤੇ ਬਿਨਯਾਮੀਨ ਦੀ ਕੁਲ ਵਿੱਚੋਂ ਹਾਂ । 2ਪਰਮੇਸ਼ਰ ਨੇ ਆਪਣੇ ਚੁਣੇ ਹੋਏ ਲੋਕਾਂ ਨੂੰ ਜਿਹਨਾਂ ਨੂੰ ਉਹਨਾਂ ਨੇ ਸ਼ੁਰੂ ਤੋਂ ਹੀ ਚੁਣਿਆ ਹੈ, ਤਿਆਗਿਆ ਨਹੀਂ ਹੈ । ਤੁਸੀਂ ਜਾਣਦੇ ਹੀ ਹੋ ਕਿ ਪਵਿੱਤਰ-ਗ੍ਰੰਥ ਵਿੱਚ ਏਲੀਯਾਹ ਨਬੀ ਇਸਰਾਏਲ ਕੌਮ ਦੇ ਵਿਰੁੱਧ ਪਰਮੇਸ਼ਰ ਅੱਗੇ ਬੇਨਤੀ ਕਰਦਾ ਹੈ, 3#1 ਰਾਜਾ 19:10,14“ਪ੍ਰਭੂ ਜੀ, ਉਹਨਾਂ ਨੇ ਤੁਹਾਡੇ ਨਬੀਆਂ ਨੂੰ ਕਤਲ ਕਰ ਦਿੱਤਾ ਹੈ । ਉਹਨਾਂ ਨੇ ਤੁਹਾਡੀਆਂ ਵੇਦੀਆਂ ਨੂੰ ਢਾਹ ਦਿੱਤਾ ਹੈ । ਬਸ, ਮੈਂ ਇਕੱਲਾ ਹੀ ਬਚਿਆ ਹਾਂ ਅਤੇ ਉਹ ਮੈਨੂੰ ਵੀ ਕਤਲ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ।” 4#1 ਰਾਜਾ 19:18ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਪਰਮੇਸ਼ਰ ਨੇ ਉਸ ਨੂੰ ਕੀ ਉੱਤਰ ਦਿੱਤਾ ਸੀ ? ਪਰਮੇਸ਼ਰ ਨੇ ਕਿਹਾ, “ਮੈਂ ਆਪਣੇ ਲਈ ਸੱਤ ਹਜ਼ਾਰ ਆਦਮੀ ਸੁਰੱਖਿਅਤ ਰੱਖੇ ਹੋਏ ਹਨ ਜਿਹਨਾਂ ਨੇ ਝੂਠੇ ਬਆਲ ਦੇਵਤਾ ਦੇ ਸਾਹਮਣੇ ਗੋਡੇ ਨਹੀਂ ਟੇਕੇ ।” 5ਇਸੇ ਤਰ੍ਹਾਂ ਵਰਤਮਾਨ ਸਮੇਂ ਵਿੱਚ ਵੀ ਥੋੜ੍ਹੇ ਜਿਹੇ ਲੋਕ ਹਨ ਜਿਹੜੇ ਪਰਮੇਸ਼ਰ ਦੀ ਕਿਰਪਾ ਦੁਆਰਾ ਚੁਣੇ ਗਏ ਹਨ । 6ਇਸ ਚੋਣ ਦਾ ਆਧਾਰ ਪਰਮੇਸ਼ਰ ਦੀ ਕਿਰਪਾ ਹੈ, ਆਦਮੀ ਦੇ ਕੰਮ ਨਹੀਂ । ਕਿਉਂਕਿ ਜੇਕਰ ਇਸ ਚੋਣ ਦਾ ਆਧਾਰ ਕੰਮ ਹੋਣ ਤਾਂ ਪਰਮੇਸ਼ਰ ਦੀ ਕਿਰਪਾ, ਕਿਰਪਾ ਨਹੀਂ ਹੈ ।

7ਤਾਂ ਫਿਰ ਕੀ ਹੋਇਆ ? ਇਸਰਾਏਲ ਕੌਮ ਜਿਸ ਦੀ ਖੋਜ ਵਿੱਚ ਸੀ, ਉਹ ਉਸ ਨੂੰ ਨਾ ਮਿਲੀ ਪਰ ਥੋੜ੍ਹੇ ਚੁਣੇ ਹੋਇਆਂ ਨੂੰ ਉਹ ਮਿਲ ਗਈ । ਕਿਉਂਕਿ ਬਾਕੀ ਸਾਰਿਆਂ ਨੇ ਪਰਮੇਸ਼ਰ ਦੀ ਆਵਾਜ਼ ਨੂੰ ਸੁਣਨ ਤੋਂ ਇਨਕਾਰ ਕਰ ਦਿੱਤਾ । 8#ਵਿਵ 29:4, ਯਸਾ 29:10ਜਿਸ ਤਰ੍ਹਾਂ ਪਵਿੱਤਰ-ਗ੍ਰੰਥ ਵਿੱਚ ਲਿਖਿਆ ਹੈ, “ਪਰਮੇਸ਼ਰ ਨੇ ਉਹਨਾਂ ਦੇ ਦਿਲਾਂ ਅਤੇ ਦਿਮਾਗਾਂ ਨੂੰ ਸੁੰਨ ਕਰ ਦਿੱਤਾ । ਉਹਨਾਂ ਨੂੰ ਅੱਜ ਦੇ ਦਿਨ ਤੱਕ ਅਜਿਹੀਆਂ ਅੱਖਾਂ ਦਿੱਤੀਆਂ ਜਿਹੜੀਆਂ ਨਾ ਦੇਖਣ ਅਤੇ ਅਜਿਹੇ ਕੰਨ ਦਿੱਤੇ ਜਿਹੜੇ ਨਾ ਸੁਣਨ ।” 9#ਭਜਨ 69:22-23ਦਾਊਦ ਨੇ ਵੀ ਕਿਹਾ ਹੈ,

“ਉਹਨਾਂ ਦਾ ਭੋਜਨ ਉਹਨਾਂ ਲਈ ਫੰਦਾ ਅਤੇ ਜਾਲ ਬਣ ਜਾਵੇ,

ਉਹ ਉਹਨਾਂ ਦੇ ਲਈ ਠੋਕਰ ਅਤੇ ਸਜ਼ਾ ਦਾ ਕਾਰਨ ਹੋਣ ।

10ਉਹਨਾਂ ਦੀਆਂ ਅੱਖਾਂ ਅੱਗੇ ਹਨੇਰਾ ਛਾ ਜਾਵੇ ਕਿ ਉਹ ਦੇਖ ਨਾ ਸਕਣ,

ਉਹਨਾਂ ਦੇ ਲੱਕ ਹਮੇਸ਼ਾ ਝੁਕੇ ਰਹਿਣ ।”

11ਫਿਰ ਮੈਂ ਪੁੱਛਦਾ ਹਾਂ, ਕੀ ਇਸਰਾਏਲ ਦਾ ਠੋਕਰ ਖਾਣਾ ਇੰਨਾਂ ਬੁਰਾ ਹੈ ਕਿ ਉਸ ਦਾ ਸੁਧਾਰ ਨਹੀਂ ਹੋ ਸਕਦਾ ? ਨਹੀਂ ! ਇਹ ਸੱਚ ਨਹੀਂ ਹੈ ! ਕਿਉਂਕਿ ਇਸਰਾਏਲ ਦਾ ਪਰਮੇਸ਼ਰ ਦੇ ਹੁਕਮ ਦੀ ਉਲੰਘਣਾ ਦੇ ਕਾਰਨ ਪਰਾਈਆਂ ਕੌਮਾਂ ਨੂੰ ਮੁਕਤੀ ਮਿਲੀ ਹੈ ਕਿ ਇਸਰਾਏਲ ਉਹਨਾਂ ਤੋਂ ਈਰਖਾ ਕਰੇ । 12ਪਰ ਜੇਕਰ ਇਸ ਤਰ੍ਹਾਂ ਯਹੂਦੀਆਂ ਦਾ ਪਾਪ ਸੰਸਾਰ ਦੇ ਲਈ ਅਸੀਸਾਂ ਦਾ ਕਾਰਨ ਬਣਿਆ ਅਤੇ ਉਹਨਾਂ ਦੀ ਅਸਫਲਤਾ ਪਰਾਈਆਂ ਕੌਮਾਂ ਦੇ ਲਈ ਅਸੀਸਾਂ ਦਾ ਕਾਰਨ ਬਣੀ ਤਾਂ ਫਿਰ ਸਾਰੀ ਇਸਰਾਏਲ ਕੌਮ ਦਾ ਵਾਪਸ ਮੁੜਨਾ ਕਿੰਨੀਆਂ ਜ਼ਿਆਦਾ ਅਸੀਸਾਂ ਦਾ ਕਾਰਨ ਹੋਵੇਗਾ !

ਪਰਾਈਆਂ ਕੌਮਾਂ ਦੀ ਮੁਕਤੀ

13ਹੁਣ ਮੈਂ ਪਰਾਈਆਂ ਕੌਮਾਂ ਨੂੰ ਕਹਿੰਦਾ ਹਾਂ ਕਿ ਜਦ ਕਿ ਮੈਂ ਤੁਹਾਡੇ ਲਈ ਪਰਮੇਸ਼ਰ ਵੱਲੋਂ ਰਸੂਲ ਚੁਣਿਆ ਗਿਆ ਹਾਂ, ਮੈਨੂੰ ਇਸ ਉੱਤੇ ਮਾਣ ਹੈ । 14ਹੋ ਸਕਦਾ ਹੈ ਕਿ ਇਸ ਤਰ੍ਹਾਂ ਹੀ ਮੈਂ ਆਪਣੀ ਯਹੂਦੀ ਕੌਮ ਵਿੱਚ ਈਰਖਾ ਦੀ ਭਾਵਨਾ ਪੈਦਾ ਕਰਾਂ ਅਤੇ ਉਹਨਾਂ ਵਿੱਚੋਂ ਕਈਆਂ ਨੂੰ ਮੁਕਤੀ ਦੇ ਸਕਾਂ । 15ਕਿਉਂਕਿ ਜੇਕਰ ਉਹਨਾਂ ਦੇ ਤਿਆਗੇ ਜਾਣ ਰਾਹੀਂ ਬਾਕੀ ਸੰਸਾਰ ਦਾ ਪਰਮੇਸ਼ਰ ਨਾਲ ਮੇਲ ਹੋਇਆ ਤਾਂ ਫਿਰ ਉਹਨਾਂ ਦੇ ਮਿਲਾਪ ਦੁਆਰਾ ਕੀ ਕੁਝ ਹੋਵੇਗਾ ? ਇਹ ਮੁਰਦਿਆਂ ਲਈ ਜੀਵਨ ਹੋਵੇਗਾ !

16ਜੇਕਰ ਗੁੰਨ੍ਹੇ ਹੋਏ ਆਟੇ ਦਾ ਪਹਿਲਾ ਅਰਪਿਤ ਪੇੜਾ ਪਵਿੱਤਰ ਹੈ ਤਾਂ ਸਾਰਾ ਆਟਾ ਪਵਿੱਤਰ ਹੈ । ਇਸੇ ਤਰ੍ਹਾਂ ਜੇਕਰ ਰੁੱਖ ਦੀ ਜੜ੍ਹ ਪਵਿੱਤਰ ਹੈ ਤਾਂ ਸਾਰੀਆਂ ਟਹਿਣੀਆਂ ਵੀ ਪਵਿੱਤਰ ਹਨ । 17ਜ਼ੈਤੂਨ ਦੇ ਰੁੱਖ ਦੀਆਂ ਕੁਝ ਟਹਿਣੀਆਂ ਟੁੱਟ ਗਈਆਂ ਅਤੇ ਉਹਨਾਂ ਦੀ ਥਾਂ ਤੁਸੀਂ, ਜੰਗਲੀ ਜ਼ੈਤੂਨ ਦੀਆਂ ਟਹਿਣੀਆਂ ਵਾਂਗ ਪਿਓਂਦ ਲਾ ਦਿੱਤੇ ਗਏ ਅਤੇ ਇਸ ਤਰ੍ਹਾਂ ਤੁਸੀਂ ਅਸਲੀ ਜ਼ੈਤੂਨ ਦੀ ਜੜ੍ਹ ਅਤੇ ਤਣੇ ਦੇ ਰਸ ਦੇ ਹਿੱਸੇਦਾਰ ਬਣੇ । 18ਉਹਨਾਂ ਟਹਿਣੀਆਂ ਉੱਤੇ ਹੰਕਾਰ ਨਾ ਕਰੋ ਪਰ ਜੇਕਰ ਹੰਕਾਰ ਕਰਨਾ ਹੀ ਚਾਹੋ ਤਾਂ ਇਹ ਯਾਦ ਰੱਖੋ ਕਿ ਤੁਸੀਂ ਜੜ੍ਹ ਉੱਤੇ ਨਿਰਭਰ ਹੋ, ਨਾ ਕਿ ਜੜ੍ਹ ਤੁਹਾਡੇ ਉੱਤੇ ।

19ਪਰ ਤੂੰ ਇਸ ਤਰ੍ਹਾਂ ਜ਼ਰੂਰ ਕਹੇਂਗਾ, “ਹਾਂ, ਪਰ ਟਹਿਣੀਆਂ ਇਸੇ ਲਈ ਤਾਂ ਤੋੜੀਆਂ ਗਈਆਂ ਕਿ ਮੇਰੀ ਉਸ ਨਾਲ ਪਿਓਂਦ ਲਾਈ ਜਾ ਸਕੇ ।” 20ਇਹ ਠੀਕ ਹੈ । ਉਹ ਤੋੜੇ ਗਏ ਕਿਉਂਕਿ ਉਹਨਾਂ ਨੇ ਵਿਸ਼ਵਾਸ ਨਾ ਕੀਤਾ ਪਰ ਤੂੰ ਕਾਇਮ ਹੈਂ ਕਿਉਂਕਿ ਤੂੰ ਵਿਸ਼ਵਾਸ ਕੀਤਾ ਪਰ ਇਸ ਉੱਤੇ ਹੰਕਾਰ ਨਾ ਕਰ, ਸਗੋਂ ਡਰ । 21ਕਿਉਂਕਿ ਜੇਕਰ ਪਰਮੇਸ਼ਰ ਨੇ ਉਹਨਾਂ ਅਸਲੀ ਟਹਿਣੀਆਂ ਭਾਵ ਯਹੂਦੀਆਂ ਦਾ ਲਿਹਾਜ਼ ਨਹੀਂ ਕੀਤਾ ਤਾਂ ਉਹ ਤੇਰਾ ਕਿਸ ਤਰ੍ਹਾਂ ਕਰਨਗੇ ? 22ਪਰਮੇਸ਼ਰ ਦੀ ਕਿਰਪਾਲਤਾ ਅਤੇ ਕਠੋਰਤਾ ਦੋਨਾਂ ਉੱਤੇ ਧਿਆਨ ਦੇਵੋ । ਉਹ ਉਹਨਾਂ ਦੇ ਨਾਲ ਕਠੋਰ ਹਨ ਜਿਹੜੇ ਡਿੱਗ ਗਏ ਹਨ ਪਰ ਤੁਹਾਡੇ ਉੱਤੇ ਕਿਰਪਾਲੂ ਹਨ ਜੇਕਰ ਤੁਸੀਂ ਉਹਨਾਂ ਦੀ ਕਿਰਪਾ ਦੇ ਪਾਤਰ ਬਣੇ ਰਹੋ, ਨਹੀਂ ਤਾਂ ਤੁਸੀਂ ਵੀ ਕੱਟ ਦਿੱਤੇ ਜਾਵੋਗੇ । 23ਇਸੇ ਤਰ੍ਹਾਂ ਜੇਕਰ ਯਹੂਦੀ ਆਪਣੇ ਅਵਿਸ਼ਵਾਸ ਨੂੰ ਤਿਆਗ ਦੇਣ ਤਾਂ ਉਹਨਾਂ ਨੂੰ ਫਿਰ ਪਿਓਂਦ ਲਾਈ ਜਾ ਸਕਦੀ ਹੈ ਕਿਉਂਕਿ ਪਰਮੇਸ਼ਰ ਫਿਰ ਪਿਓਂਦ ਲਾਉਣ ਦੇ ਯੋਗ ਹਨ । 24ਕਿਉਂਕਿ ਜੇਕਰ ਤੁਸੀਂ ਜਿਹੜੇ ਜੰਗਲੀ ਜ਼ੈਤੂਨ ਦੀਆਂ ਟਹਿਣੀਆਂ ਵਰਗੇ ਹੋ ਅਤੇ ਵੱਢੇ ਜਾਣ ਦੇ ਬਾਅਦ ਅਸਲੀ ਜ਼ੈਤੂਨ ਦੇ ਨਾਲ ਪਿਓਂਦ ਕੀਤੇ ਗਏ ਹੋ ਤਾਂ ਯਹੂਦੀ, ਜਿਹੜੇ ਅਸਲੀ ਜ਼ੈਤੂਨ ਦੀਆਂ ਟਹਿਣੀਆਂ ਵਰਗੇ ਹਨ, ਪਰਮੇਸ਼ਰ ਦੇ ਲਈ ਉਹਨਾਂ ਦੀ ਆਪਣੇ ਹੀ ਰੁੱਖ ਨਾਲ ਪਿਓਂਦ ਲਾਉਣੀ ਕਿੰਨੀ ਸੌਖੀ ਹੋਵੇਗੀ ।

ਸਾਰਿਆਂ ਉੱਤੇ ਪਰਮੇਸ਼ਰ ਦੀ ਕਿਰਪਾ

25ਮੇਰੇ ਭਰਾਵੋ ਅਤੇ ਭੈਣੋ, ਇਹ ਇੱਕ ਗਹਿਰਾ ਭੇਤ ਹੈ ਜਿਹੜਾ ਮੈਂ ਚਾਹੁੰਦਾ ਹਾਂ ਕਿ ਤੁਸੀਂ ਜਾਣੋ । ਇਹ ਤੁਹਾਨੂੰ ਆਪਣੇ ਆਪ ਨੂੰ ਬਹੁਤ ਬੁੱਧੀਮਾਨ ਸਮਝਣ ਦੇ ਹੰਕਾਰ ਤੋਂ ਬਚਾਵੇਗਾ । ਇਹ ਭੇਤ ਇਹ ਹੈ ਕਿ ਇਸਰਾਏਲ ਦੇ ਦਿਲਾਂ ਦੀ ਕਠੋਰਤਾ ਹਮੇਸ਼ਾ ਤੱਕ ਨਹੀਂ ਰਹੇਗੀ । ਇਹ ਬਹੁਤ ਸਾਰੀਆਂ ਪਰਾਈਆਂ ਕੌਮਾਂ ਦੇ ਮਸੀਹ ਦੇ ਕੋਲ ਆਉਣ ਤੱਕ ਰਹੇਗੀ । 26#ਯਸਾ 59:20ਇਸ ਤਰ੍ਹਾਂ ਸਾਰੀ ਇਸਰਾਏਲ ਕੌਮ ਨੂੰ ਮੁਕਤੀ ਮਿਲੇਗੀ । ਇਸ ਬਾਰੇ ਪਵਿੱਤਰ-ਗ੍ਰੰਥ ਇਸ ਤਰ੍ਹਾਂ ਕਹਿੰਦਾ ਹੈ,

“ਸੀਯੋਨ ਤੋਂ ਮੁਕਤੀਦਾਤਾ ਆਵੇਗਾ,

ਉਹ ਯਾਕੂਬ ਦੀ ਸੰਤਾਨ ਦਾ ਸਾਰਾ ਅਵਿਸ਼ਵਾਸ ਦੂਰ ਕਰੇਗਾ ।

27 # ਯਿਰ 31:33-34 ਮੈਂ ਉਹਨਾਂ ਦੇ ਨਾਲ ਇੱਕ ਨੇਮ ਬੰਨ੍ਹਾਂਗਾ,

ਜਦੋਂ ਮੈਂ ਉਹਨਾਂ ਦੇ ਸਾਰੇ ਪਾਪਾਂ ਨੂੰ ਦੂਰ ਕਰਾਂਗਾ ।”

28ਜਿੱਥੋਂ ਤੱਕ ਸ਼ੁਭ ਸਮਾਚਾਰ ਦਾ ਪ੍ਰਸ਼ਨ ਹੈ, ਯਹੂਦੀ ਲੋਕ ਤੁਹਾਡੀ ਖ਼ਾਤਰ ਇਸ ਸਮੇਂ ਪਰਮੇਸ਼ਰ ਦੇ ਵੈਰੀ ਹਨ ਪਰ ਆਪਣੀ ਚੋਣ ਦੇ ਕਾਰਨ ਅਤੇ ਪੁਰਖਿਆਂ ਦੀ ਖ਼ਾਤਰ ਉਹ ਉਹਨਾਂ ਨੂੰ ਅਜੇ ਵੀ ਪਿਆਰ ਕਰਦੇ ਹਨ । 29ਕਿਉਂਕਿ ਪਰਮੇਸ਼ਰ ਦੇ ਵਾਅਦੇ ਅਤੇ ਬੁਲਾਵੇ ਹਮੇਸ਼ਾ ਅਟੱਲ ਹਨ । 30ਤੁਸੀਂ ਵੀ ਜਿਹੜੇ ਪਰਾਈਆਂ ਕੌਮਾਂ ਦੇ ਹੋ, ਭੂਤਕਾਲ ਵਿੱਚ ਪਰਮੇਸ਼ਰ ਦੇ ਅਵੱਗਿਆਕਾਰ ਰਹੇ ਹੋ ਪਰ ਹੁਣ ਤੁਹਾਨੂੰ ਪਰਮੇਸ਼ਰ ਦੀ ਦਇਆ ਦਾ ਵਰਦਾਨ ਮਿਲਿਆ ਹੈ ਕਿਉਂਕਿ ਯਹੂਦੀ ਲੋਕ ਪਰਮੇਸ਼ਰ ਦੇ ਅਵੱਗਿਆਕਾਰੀ ਹਨ । 31ਇਸੇ ਤਰ੍ਹਾਂ ਉਸ ਕਿਰਪਾ ਦੇ ਕਾਰਨ ਜਿਹੜੀ ਤੁਹਾਨੂੰ ਮਿਲੀ ਹੈ, ਯਹੂਦੀਆਂ ਨੇ ਪਰਮੇਸ਼ਰ ਦੀ ਅਵੱਗਿਆ ਕੀਤੀ ਹੈ ਕਿ ਉਹ ਵੀ ਪਰਮੇਸ਼ਰ ਦੀ ਕਿਰਪਾ ਦਾ ਵਰਦਾਨ ਪ੍ਰਾਪਤ ਕਰਨ । 32ਕਿਉਂਕਿ ਪਰਮੇਸ਼ਰ ਨੇ ਸਾਰੇ ਲੋਕਾਂ ਨੂੰ ਅਵੱਗਿਆ ਦੇ ਕੈਦੀ ਬਣਾਇਆ ਹੈ ਕਿ ਉਹ ਸਾਰਿਆਂ ਉੱਤੇ ਆਪਣੀ ਕਿਰਪਾ ਪ੍ਰਗਟ ਕਰ ਸਕਣ ।

ਪਰਮੇਸ਼ਰ ਦੀ ਵਡਿਆਈ

33 # ਯਸਾ 55:8 ਪਰਮੇਸ਼ਰ ਦੀਆਂ ਅਸੀਸਾਂ ਕਿੰਨੀਆਂ ਮਹਾਨ ਹਨ ! ਉਹਨਾਂ ਦੀ ਬੁੱਧ ਅਤੇ ਗਿਆਨ ਕਿੰਨੇ ਡੂੰਘੇ ਹਨ ! ਉਹਨਾਂ ਦੇ ਫ਼ੈਸਲਿਆਂ ਦਾ ਭੇਤ ਕੌਣ ਪਾ ਸਕਦਾ ਹੈ ? ਉਹਨਾਂ ਦੇ ਰਾਹਾਂ ਨੂੰ ਕੌਣ ਸਮਝ ਸਕਦਾ ਹੈ ? 34#ਯਸਾ 40:13ਪਵਿੱਤਰ-ਗ੍ਰੰਥ ਇਸ ਬਾਰੇ ਕਹਿੰਦਾ ਹੈ,

“ਪ੍ਰਭੂ ਦੇ ਮਨ ਨੂੰ ਕਿਸ ਨੇ ਜਾਣਿਆ ਹੈ ?

ਕੌਣ ਉਹਨਾਂ ਦਾ ਸਲਾਹਕਾਰ ਹੋ ਸਕਦਾ ਹੈ ?

35 # ਅੱਯੂ 41:11 ਕਿਸ ਨੇ ਉਹਨਾਂ ਨੂੰ ਕਦੀ ਕੁਝ ਦਿੱਤਾ ਹੈ,

ਕਿ ਉਹਨਾਂ ਤੋਂ ਉੰਨਾ ਹੀ ਵਾਪਸ ਲਵੇ ?”

36 # 1 ਕੁਰਿ 8:6 ਉਹ ਹੀ ਸਾਰੀਆਂ ਚੀਜ਼ਾਂ ਦੇ ਸਿਰਜਨਹਾਰ ਹਨ, ਉਹਨਾਂ ਦੇ ਦੁਆਰਾ ਸਾਰੀਆਂ ਚੀਜ਼ਾਂ ਦੀ ਹੋਂਦ ਹੈ, ਉਹਨਾਂ ਦੇ ਲਈ ਹੀ ਸਾਰੀਆਂ ਚੀਜ਼ਾਂ ਹਨ । ਪਰਮੇਸ਼ਰ ਦੀ ਵਡਿਆਈ ਅਨੰਤਕਾਲ ਤੱਕ ਹੋਵੇ ! ਆਮੀਨ ।

Currently Selected:

ਰੋਮ 11: CL-NA

Highlight

Copy