Yela 106
106
Korowii wer waa doa tɛ o nɛra
1Hé kpɛɛ Korowii!
Hé kpɔ jam tɛ Korowii
dɛkalkɛ o wer,
o nyina waa dɛ nyin yaa
ta jaɡa dɔe.#1We 16:34
2Umee dɛ́ won baɡle
wejena waa ɛa
kɛɛ dɛ kpɛɛro kɛrɛdɛ nɔ?
3Nɛra baa dɛ teŋɛ o Mmarare
ta, ba waa toɡre
saŋ bɛlbwa la,
ba na som.
4N Naa Korowii, he dɛ
ba he nɛra chae yaa,
lii n wa,
he dɛ ba ba lɛɛ yaa,
he cha n ɡe,
5ásɛ n dɔ wedɛɛɡa he nɛra
aa dɛ ba dɔe la ane,
n ne ba bwa dɔ silɛɛ,
ásɛ n ne he nɛra haa lee ba
cheɡ la hɛɡre kohona.
6Ya ɛ wechɔɡa kɛ ya
naawa ken,
ya ɛ nyubinikpeɡ dɛ koni.
7Ya naawa fa ta hen Korowii
nyokpowe-ɛɛla waa mun
noɛ, ɡɛ saŋ
baa lɔ Ijipt harɛ ta la.
Ba soh nyina haa nyin ba la
keraŋwɛnɛ bwa, dɛ ɛɛ
deŋnekpeɡ Mposwɛm la ta.
8Kɛ he lɛɛ ba ɡɛ haa baɡ ba
nyoa la, dɛ baɡle
ɡɛ haa dɔ kpeɡri kohona.
9He kɔr Mposwɛm
asɛ o hweeh,
asɛ he tɔ he nɛra sie
ba valɛ
harɛpɛɛ ta kɛŋɔ,
pua hɛŋle ɡbo harɛ ta ken
dɛ ɛɡɛ le o baŋ.#Kaa 14:21-22
10He lɛɛ ba le ba dɔma nɔn ta,
nɛra baa hah ba la nɔn ta,
11dɛ ɡel nee bɔle
ba dɔma bwa nɛ,
beŋkpoŋ kwaraa ta kae.
12Belaa he nɛra yarada
waa haa baɡ ba nyoa la,
dɛ ɡo yela kpɛɛre.#Kaa 15:1
13Kɛ ba soh waa haa ɛa
tɛɛ ba buɡ la ta,
ba ta bwara sɔɔhnɛ,
dɛ no waa haa bol ba be.
14Ba pɛla lawɛ kondikwa,
asɛ dɛ daah hen Korowii
na, pua hɛŋle ɡbo
harɛ ta bela.#Kaa 17:2-4
15Anomanta, he tɛɛ ba
kwaa baa soŋe la,
dɛ berɛ kpɔ weechɔɡa
ta ba nɛ.
16Ba sie beɡre Mosis
ne he bonɔɔ Arɔn
haa lee ba cheɡ,
ba do ɡoroŋ tɛɛ la nɛɛ
pua hɛŋle ɡbo harɛ ta
bela.#Kur 16:1-35
17Belaa harɛ pere
asɛ Datan le o bini,
dɛ tɔ Abiram
ne o haah ne bii nɛ.
18Korowii ɡelɔ nii le nyundua,
dɛ ba le nɛra
baa teŋɛ ba nɛɛ la nɛ,
dɛ fuh nyubinikpeɡ tena
baa lɔ ba bini.
19Ba kpɔ suuɡaswɛm
ɛ nabale Sinai Bwejen ta,
dɛɛ tomɔ kɛ voɡ ken.#Kaa 32:4-6
20Ba kpɔ jirima baa kpɔ
tɛ hen Korowii la,
berɛ kaa tɛ kon o mar
aa le nabale, waa dɛ
chwe kpɔɡa.
21Ba soh hen Korowii,
haa cheɡɛ nyokpowe-ɛɛla
ta, dɛ lɛɛ ba
le Ijipt harɛ ta la wa.
22Nyokpowaa haa ɛa Mposwɛm
ta, ne ɔmewaa
haa ɛa bela kan kohona.
23He baah diu dɛ fee ŋɔ
hɛɛ chɔɡ baa,
kɛ Mosis waa ɛ he bonɔɔ,
he leo tɛ he te la soŋe,
dɛ sɔɔh he bandia nyoa,
he ta ban chɔɡɛ kpa.#Kaa 32:10-14
24A habɔɔ, ba vɛoh kɛ baa jo
harɛpare ondɛɛɡe la taa,
dɛkalkɛŋɔ ba ta he waa
haa baɡ ba nyoa la
yaradae.
25Ba soɡe ba tɛnte deene
bini dɛɛ naɡre wa,
ba ta he waa la ta teŋɛ.
26Anomanta, he ŋwɛɛrɔ
baɡ ba ŋɔ, hɛɛ ɡeloo
bá serewe pua hɛŋle
ɡbo harɛ ta,
27dɛ́ lɔ ba naanar peɡre
nɛra baa wola hen Korowii
tomɛ bini, ásɛ ba
serewe harɛfala ta.
28Baa tel Peɔ la, ba kpɔ ba te
ka do voɡ Baal lɔɡa
dɛɛ tomɔ,
dɛɛ di saraha kwaa
baa ɛa tɛ voɡa aa
wola mkpa dɔe.#Kur 25:1-13
29Ba we-ɛɛla ɡelɔ
hen Korowii baah di,
asɛ he ɡel weechɔɡa
ba le ba nɛ.
30Kɛ Fenehas iro, dɛ tɛr
nɛra baa di a bolchɔɡe la
deŋne,
asɛ hen Korowii ɡel
weechɔɡa la nyoa sɔɔh.
31Nɛra lii waa waa ɛa la
kɛŋɔ waa aa toɡra,
a chɔ le baa liira
saŋ bɛlbwa dɛɛ la.
32Ba ɡelɔ hen Korowii baah di
ba nɛɛ
bule waa lɔ Mɛreba la ta,
a kpɔ sibeɡra ta Mosis nɛ.
33Ba ɛ hen Korowii Doma
deŋnekpeɡ, anomanta,
Mosis piɡro bol waa
o fe aa wola liire tɛɛ ba.
34Ba ta nɛra baa wola
hen tomɛ kpoorɛ
ɡɛ haa do ba la,
35kɛ ba sɛoh ba bii ɛɛ kpɔ dɔŋa,
a che a ta, ba kpɔ
ba voɡa toma da la.
36He nɛra tomɛ ba voɡa la,
asɛ a ɛ bela dɛ laɡ ba.
37Ba kpoo ba bibaala
ne bihaahna ɛ sarahare
tɛ Keenan voɡa.
38Ba kpoo bii baa wola
wechɔɡa bɛlbwa ɛɛ pɛɛpɛɛ,
dɛ ɛ sarahare tɛ voɡa
aa lɔ Keenan, asɛ ba chal
kpɔ doŋa kah harɛ la.
39A cheɡɛ ba we-ɛɛla ta,
ba kpɔ doŋa kah ba te,
ba waa ta kasinteŋ dɔe
tɛ hen Korowii.
40Anomanta, he baah di
he nɛra nɛɛ kohona,
asɛ he ki ba we-ɛɛla.
41He vɛɛh ba tɛ nɛra
baa wola hen Korowii tomɛ
la, asɛ ba do
ba lɔɡa dɛɛ tom ba.
42Ba dɔma fiɡ ba
dɛ ɡel ba do ba lɔɡa.
43Keraŋwɛnɛ bwaa
he lɛ he nɛra,
kɛ dɛ ba sie ta lɔ lwɛmkpeɡ
we-ɛɛla ta, a kaa ba ne
wechɔɡa kohona ta.
44Kɛ baa lɔ wenaale ta la,
he chaŋ ba dɛ no
ba suna baa dɛ di.
45He koh ba waa dɛ lii
fɔo he ne baa fɔwa la,
dɛ che he nyina waa
kana la ta, dɛ charɛ he liire.
46He ɡelɔ nɛra baa dɛ fiɡ ba la
bwa berɛ na ba sum.
47N Naa Korowii yaa dɛ tomɛ,
lɛ yaa dɛ́ berɛ lawɛ yaa
le harɛre ta ba,
ásɛ ya kpɔ jam tɛɛ dɛ́ kpɛɛ
he sɔn waa do ɡoroŋ la.#1We 16:35-36
48Hé kpɛɛ Korowii
Israel tena aa dɛ tomɔ,
hé kpɛɛro
saŋ bɛlbwa dɛɛ la.
Gel nɛra bwa ŋɔ, “Aamen.”
Hé kpɛɛ Korowii!
Currently Selected:
Yela 106: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
